SALAYSAY: Panangidumduma, negatibo nga aramid (Umuna a paset)

Maysa a negatibo nga aramid ti nalabes a panangidumdumatayo iti maysa wenno sumagmamano a tattao ket di makatulong daytoy iti napudno a pannakirelasiontayo.  Saan a nasayaat a maimula daytoy biddut nga aramid kadagiti ubbing ken agtutubo ta awitenda iti panagdakkelda wenno iti panagtaengda. No kastoy ti maimula iti panunot kadagiti ubbing wenno agtutubo, maaddaanda laeng iti nailet a lubong. Saanda a nawaya nga agdakiwas iti inda kapkapnekan. Saanda a makasirmata iti biag a natalinaay. Saanda a produktibo nga umili iti gimong.

Bueno, adtoy ngarud ti maysa nga estoria a mangdakamat iti nasao a tema…

Iti nagpinta iti maris asul-langit a bunggalo ti pamilia Olivares iti Barangay San Antonio, kasarsarita ni Nita ti asawana a ni Melo mainaig iti panagkasangay ti kakaisuna nga anakda a babai, ni Beth. Agtawenton daytoy iti sangapulo ket tallo, innem laengen nga aldaw ti palabsen. Kayatda a naragsak ti panagkasangay ti anakda.

“Mmm, bertdey ni Beth nga anakmo inton Domingo, lakay. Ania ti saganatayo?”

“Aya? Bertdeyna, aya? He-he, diak pay ket malagipen. Lakay sa met dataon ta mananglilipatakon!”

“Ahu, kunwarika pay laeng met, hi-hi! Aginlilipat kunam a! Saanmo ngamin a kayat ti aggastos para iti kakaisuna nga anakmo. Kabisadokon ti kasta nga ugalim, hi-hi!”

“Saan met a kasta, a, baket, he-he-he!”

“No saan, malagipmo ngarud ti inkarim idi iti anakmo?”

“Adda aya inkarik?”

“Ket wen! Inkarim idi a no agtawenen iti sangapulo ket tallo wenno umuna a tawenna iti kinatin-edier ket mangangayka iti dakkel a party ditoy balay. Awisenna amin a gagayyemna, dagiti maestra ken dagiti maestrona, ti prinsipalda ken dagiti support staff ti eskuelaanda.”

“Wen, wen, ania pay ngarud. Nalpas! Gastos a dakkel daytoy. Sapay no di nagngina ti gagatangen ita.”

“No inkarim kenkuana, di tungpalem, hi-hi! Tagtagiuray dayta ta anakmo. Tin-edierton ti kakaisuna nga anakmo. Isu a masapul a tungpalem ti karim kenkuana!”

Tapno makasigurado, kinasarita met ti ama ti anak.  Iti panunotna, kakaisuna nga inanak, saanda ketdin a maited ti pakaragsakanna? Kabaelanda met. Nangato ti saadna iti opisina a pagtartrabahuanna. Dakkel ti sueldona.

“Mn, tungpalenyo a, Tatang, dayta ti kariyo kaniak idi naudi a nagbertdey-ak,” kinuna ti anakda.

“Agawiska ngarud dagiti gagayyemmo, dagiti titsermo ken am-ammom ditoy balay?

“Wen a, ta bertdey parti ngarud. Inkarim pay dayta. Ken inkarim pay a no addaak iti honor roll ket bale blow out dayta.”

Immanugot ngarud ti ama. Magagaran met ti ina. Kinasarita manen ni Nita ni Melo nga asawana.

“Adda ngarud umanay a gastuenta, lakay?”

“Inka mangiruar idiay banko a, ania ngarud nay. Uray ta pakaragsakan met ti kakaisuna nga anakmo. Rinugiannan ti nagimbitar?”

“Wen a. Kas iti naibagbagana kaniak.”

“Mano ngata ti imbitaranna tapno ammo ti isagsagana? Narigat ti matukkolan iti aklo. Nakababain no kuan.”

“Dayta ti diak ammo. Damagekto kenkuana no sumangpet. Bassit met ngata ti ayabanna, saan nga adu. Manakem met isunan…”

(Maituloyto)