SALAYSAY: Pantasia ken Pananggundaway

Ti pantasia ket rumbeng a bukodan ti asinoman a makinnakem. Saan a rumbeng a maammuan ti sabali, uray ti pagpanpantasiaan. Saanen a nasken nga umadayo pay ta maysa laeng dayta a pantasia. Natural laeng iti tao no dadduma a seknan iti pantasia. Agtayab met no maminsan ti utek. Agampayag. Nupay mapasamak daytoy, rumbeng nga agingga laeng dita. Ta no rummuar pay, amangan no maalimonmo ti bukodmo nga anges. Ta no maminsan, agkiddawka iti ragsak ngem liday ti sumangbay wenno vice versa. Isu a rumbeng laeng ti panagparbeng ken pagtalinaeden iti daga dagiti saka.

Kas ken ni Ambros, maysa a taxi driver. Pudno ngata tay kunada, basta driver, sweet lover? Ngem saan amin nga aldaw ket magemgeman ti tao. Dumteng met ti pananginum iti bukod a sabidong.

Kas iti naminsan nga aldaw, nagpasada manen ni Ambros. Manipud iti adayo bassit a barangay ti nakailugananna kadagiti dua a pasaherona a mapan iti maysa nga eskuelaan. Nagpaliiw ni Ambros. Nakaaruat ti lalaki nga agtutubo  iti nalabaga a baag ken gurlisan iti asul ken nakatsinelas iti inyipit a nalabaga. Nakatsaleko met laeng iti kas iti maris ti baagna. Adda iggemna a pika ken hanggap ken panakkelen ti inyabagana a sakupitna.

Naragsak ti rupa ti lalaki a makitungtongtong iti kaduana nga agtutubo a nakaaruat met laeng iti tapis, nakatsinelas iti saan nga inyipit, nadalungdongan ti ulona iti sabongan nga scarf.  Saan a matagtagari ti kaab-abayna ken kasla alusiisen iti saan nga ammo a rason.  Katakatawaan ken sangkasurdo ni nakabaag ti kaduana.

“Rumbeng laeng nga ipannakkel ti nariingan nga aw-awid kadagiti appo, saan kadi, manong?” kinuldit pay ti lalaki a natarabit ti abaga ni Ambros.

“Wen a! Pudno la unay dayta kunam. Saan a rumbeng nga ibain ti nagtaudan no di ket sidadayaw koma nga ipannakkel daytoy,” insungbat ni Ambros, ngem pasaray taldiapanna ti sarming iti ngatuenna sana paludipan ti saan a matimtimek a kadua ti nakabaag. Napudaw ket maibagay la unay ti gurlisan a nalabaga a tapisna; puraw ti blusana nga adda balidbidna iti manggas ken laylayan a kamaris met laeng ti tapisna. Nasiertonan a globules wenno beads ti adda iti tapungorna nga inabbonganna iti scarf. Anian a naglapana! naisanamtek ni Ambros. Ket simiag ti garawigaw a pampanunotna. Uray kanionenda no kasta kalapsat ti masikkarudna! Immawer naminpinsan iti lagipna ni masikog a baketna a pinanawanna iti kaserada.

“Ania ti makunam kadakami, manong?” sinaludsod ti nakabaag.

“Natarakika. Agminar dagiti masmasel iti pammagim. Nagpintas met ni ading. Nakayawannak pay. Kas kenkuana ti arapaapko a katakunaynay iti biag,” nakuna ni Ambros sana kinerman ti nakatapis.

Naragsakan ti nakabaag. “Nangngegmo ti kinuna ni manong? Agsaoka met a!” inkalbitna iti kaabayna.

Ngem nagmisuot ketdi ti nakatapis a kasla saanna a nagustuan ti imbaga ti nakabaag.

“Apay nga agmisuotka! Husto met ti ibagbaga ni manong,” inkantiaw manen ti nakabaag.

Ad-addan a simro ti kinabuangger ni Ambros.  “Nabayagen nga arapaapko met ti makaagek iti nakatapis. Baroak pay met ket ambisionko ti makaasawa iti kas kapintas ni ading,” impalapalna.

Nagkatawa ti nakabaag. Sinutilna manen ti kaduana. Ngem nakarkaron ti sipnget ti rupa ti nakatapis.

“Dika kadi maragsakan ta uray ni manong ket nakayawan ta nagpaiduma a lapsatmo?” kinalbitna manen ti kaabayna.

“No la koma ta maagkak ni ading, maikkat la ketdi ti bannogko nga agpaspasada…” impasaksak met ni Ambros.

“O, nangngegmo, kiss kano kuna ni manong,” inggarakgak ti nakabaag.

Naalsem ti isem ti nakatapis, ket induronna pay ti nakabaag.

Ad-adda a timmured ni Ambros. “Mabalin kadi uray maysa laeng a kiss? Uray iti pingping no isu,” tinaliawna ti kaabay ti nakabaag.

“Uray ta addatayon iti sango ti eskuelaan. Wen, kunam metten a….” kinuna ti nakabaag.

Impaigid ni Ambrose ti taksi iti sango ti eskuelaan. Linuktan ni nakabaag ti panakkelen a sakupitna ket  inruarna  ti sangagasut a pisos sana inyawat ken ni Ambros.

“Pagbigyamon, ni manong, agkam iti nakakinkintal sakbay a bumabata,” kinunana iti kaduana.

Uray la naitayok ti pantasia ni Ambros idi inagkan ti nakatapis ti kannawan a pingpingna. Impiduana pay. Kasla naitayok iti langit. Anian a naglamuyot ti bibig a naidennet iti pingpingna. Anian a nagbanglo!

“Agyamanak unay, ading gapu iti agekmo.  Ngem kayatko a maammuanyo a naglibakak kadakayo. Addaanakon iti asawa, uppat nga annak nga agsasaruno a naipultit ken maysa a dandanin maibuang,” impudnona.

“Okey laeng, manong, have a nice day…” insungbat ti nakabaag.

Nagruar dagiti dadduma pay nga estudiante iti ruangan ti eskuelaan. Siguro,  paspasungadenda dagiti dua.

“Daniel! Arnold!” inlaawda.

Naisardeng ni Ambros iti panangiyatrasna iti taksi. Tinaliaw ni Ambros dagiti dua. “Daniel ken Arnord?” sinaludsodna.

“Dakami dayta, manong. Cordillera Day ita, agselebrar ti eskuelaan, isu a naka-costumekami…”

Napanganga ken nakudkod ni Ambros ti teltelna a di nagatel. No palaluen ti manarita, kasla kinirog nga udang ti labbasit ti rupana.

Ti adal ti istoria: Bukodam ti pantasia, ta para kenka laeng dayta. Saan a maiparbeng a maammuan wenno aramiden a panggundaway iti sabali.#