SALAYSAY: Paskua, panawen a panagkaykaysa ti sangkataoan

PASKUA manen. Dimteng manen ti panawen a nagkaykaysa ti sibubukel a sangkataoan para iti maymaysa a panggep, maymaysa a tignay, maymaysa a rikna, maymaysa a pannakigamulo ken makipaggamulo iti ibibileg ti nagan ni ayat, kappia ken talna. Kangrunaan ti amin, ti pannakigamulo iti panagrukbos ti ayat iti sangkataoan. Pannakarikna ti awan kapadana a ragsak. Ti bileg ni ayat a maparnuay ket iladawanna ti kapkapnekan nga ar-arapaapen a turongen ti humanidad. Ta ayat ti kangrunaan ti amin. Ti ayat nga ubbog ti kinaasino no apay a ti tao ket timmao wenno naiparsua. Ket iti panagsaknap kadaytoy, agtalinaed ti kappia iti isu amin. Agari. Agsaknap. Dayta metten ti pannakarikna iti talna wenno talinaay. Daytoy ti tartarigagayan ti amin.

Saan laeng a panawen ti ragragsak, nagpaiduma a ragragsak, ti paskua no di ket kangrunaanna iti amin, ti panagyaman iti Namarsua iti nabuslon a paraburna nga imburayna kadatayo. Saan laeng a lagipen ken selebraran ti pannakaiyanak ni Jesus no di pay luktan wenno panangilukat manen ti barukong tapno sumrek ni ayat. Iti kasta, iti isusungad ti baro a tawen, sumrek met ti nabuslon a grasia ken bendision. Saan a pagduaduaan ti kinaragsak ti lubong no dumteng ti kastoy a panawen.

Uray dagiti saan a Kristiano ket makariknada iti naisangsangayan a kinaragsak ken makipagragsakda met kadatayo a Kristiano. Ti Katoliko ti kangrunaan nga agakem itoy a selebrasion. Nupay adda dagiti dadduma a relihion iti uneg ti Kristianismo a di mamati unay itoy a pasken ken mangontra iti kinarangyana, saan met a mailimed ti kinaragsakda a makaimatang iti mapaspasamak a phenomenon. Makipagragragsakda ken makipasetda. Adda panagkaykaysa ken pannakikaykaysa ti amin.

Nupay kasta, maliklikan koma ti nalabes la unay a ragragsak a masansan a mangiyadayo kadatayo iti napudpudno a kaipapanan. Ta no maminsan, iti pananggandat a mangsurot iti taray ti kabaruanan a panagbiag, masansan a malipatan no apay nga adda kastoy a panawen nga intay selebraran. Masansan a maipalagip ti saan koma a panagari ti komersialismo iti pudno a panggep. Ta no bilang agtinnag a kasta, adda tendensiana ti pannakalipat nga iti naminsan, adda naipasngay iti kulluong, ti naipasngay a nangsubbot kadagiti basbasol ti lubong, nga isu ti kangrunaan a lagipen. Ket iti dayta a pannakaipasngayna, maipasngaytayo koma met para iti natibtibker pay a baro a pammati iti baro a biag.

Saan koma a liplipatan ti kinaadda dagiti sabali a parsua a gumawgawawa a makipaset iti daytoy nainlubongan a selebrasion. Saantay nga awanen dayta a pannakipasetda. Saantay met a liplipatan a nupay awananda iti kabaelan a mangtun-oy iti panggep, saan a masasaan a pasetda ti maymaysa a rikna. Ti panangidiaya ti ukrad a dakulap, ukrad a takiag a kabuyog ti isem nga awanan ti laokna a panaginkukuna, sadiay ti pakariknaan iti nagpaiduma a kinaisangsangayan. Awan ngatan ti kaaspingna a rikna no dayta ti mapasamak. Ta ti mensahe a sinappuyot itoy a panawen, saan laeng a naikutan no di pay imparanud. Dayta a panangiranud ket buklenna ti nair-irut pay nga anag ken kaipapanan ti talingenngen. Nga isu koma ti kapkapnekan a turongen ti amin.

Nagpaiduma daytoy a panawen. Maluktan koma amin nga isip ken rikna ket makipagmaymaysa iti napudpudno a panggep ken kaipapanan.

Naimbag a Paskuayo amin!