Footer

SALAYSAY: Politika ditoy pagilian, pampamilia

Adu dagiti kakailiantayo nga addaan iti nasged a tarigagay nga agserbi iti pagilian. Adu kadakuada ti addaan iti sirmata ken bision a mangiturong iti pagiliantayo iti nadur-as a direksion ngem awan laeng ti gundawayda wenno saanda a maikkan iti gundaway nga agserbi kadatayo. Ngamin, awan ti dakkel a partido a mangiduron ken mangsuporta kadakuada. Dakkel pay a pakaarusanda ti kaawan ti kabagianda a politiko, wenno dida naikamang iti nabileg a tao nga adda koneksionna iti politika. Kaarigda iti kamelio nga aglasat iti abut ti dagum tapno magaw-atda ti arapaapda nga agtugaw iti mabutosan a puesto ken agserbi kadagiti tattao.

Pagarigan laengen dagiti dadduma a nagipila iti certificate of candidacy (CoC) para iti kinapresidente wenno kinabise presidente. Nupay kualipikadoda nga agtaray iti kinapresidente wenno kinapresidente agsipud ta adda met naganda – nupay saan a nalatak a kas kadagiti artista ken dagiti putot ken kabagian dagiti napeklan a politiko wenno nangato nga opisial ti gobierno, imbilang ida ti Commission on Elections a “nuisance candidate.”

Apay a makuna ti Comelec ti kasta? Ngamin, pagduaduaan ti poll body no kabaelanda a sakupen ti intero a pagilian iti panagkampaniada wenno adda met la masnop a pondoda nga aramatenda iti panagkampaniada.

Kinapudnona, naglak-am ti Comelec iti pammabalaw idi diniskualipikana ti sumagmamano a tattao a nagipila iti COCda para iti kinapresidente kas kada Nicanor Perlas, maysa nga environmentalist, ken ni Vetallano Acosta, standard bearer ti Kilusang Bagong Lipunan (KBL), ni dati a Cebu Gov. Lito Osmeña ken ni Gen. Danilo Lim a nagipila met iti kandidaturada para senador iti baet a kualipikado dagitoy ken kabaelanda ti mangiwayat iti nalawa a panagkampania iti sapasap a pagilian.

Ngem itay nabiit, nagkirem ti Comelec iti daytoy a nagbalin a pagtaktakderanna ket impalubosna ti pannakairaman da Perlas ken Acosta para presidente ken uppat a senatorial candidates a pakaibilangan da Osmena ken Lim para iti panagpipili inton Mayo 10, 2010.

Madakamat ditoy nga immun-una a diniskualipa ti Comelec da Perlas ken Acosta nga agkandidato para iti kinapresidente gapu iti rason a dida kabaelan ti mangiwayat iti kampania iti intero a pagilian.

Iti biang ni Perlas, kuna itan ti Comelec a saan a mailugar iti pannakalais ti poll body agsipud ta maysa a tao ni Perlas nga addaan iti maraem a track record iti serbisio publiko ken immaw-awat pay kadagiti pammigbig kadagiti gapuananna ditoy ken iti ballasiw-taaw.

Iti research nga insayangkat toy nagsurat iti internet, naammuanna a ni Perlas ket maysa a propesor iti Doctoral Program on Applied Cosmic Anthropology, Asian Social Institute, Presidente ti Center for Alternative Development Initiatives iti Manila, nakasuraten iti nasurok a 100 nga artikulo ken monographs a pakairamanan ti maysa a best selling book, “Shaping Globalization: Civil Society, Cultural Power and Threefolding”, a naiyulog iti nasurok 9 a lengguahe, facilitator, consultant ken mammagbaga kadagiti ahensia ti UN, dagiti delegasion ti Pilipinas iti United Nations, donor agencies ken civil society organizations.

Makita ngarud a kualipikado ni Perlas, ad-adda pay a kualipikado ngem dagiti sumagmamano nga agtaktakem a senador ken agngayangay a para senador ken uray dagiti dadduma a kandidato iti kinapresidente iti pagilian.

(Adda tuloyna)