SALAYSAY: Rangtay a kumamang iti sugpon ti kasapulan dagiti lumugar (Umuna iti Dua a Paset)

TI KAAWAN ti rangtay a kumamang iti Sugpon, Ilocos Sur ti kangrunaan a problema dagiti lumugar ditoy. Dayta ti naduktalan dagiti pangpangulo dagiti nadumaduma nga ahensia iti ipapanda iti daytoy nga ili itay nabiit kas paset ti programa ti gobierno probinsial a mangidanon kadagiti serbisio kadagiti nasulinek nga ili iti Ilocos Sur.

Babaen ti outreach program ti gobierno probinsial a “Kakailian nga Agindeg kadagiti Barbaranggay  Sangsangkamaysa nga Ag-rangay Tayo” (KABSAT), naidanon ti serbisio ti gobierno itay Pebrero 20 iti Sugpon babaen ti panangidaulo ni Gov. Deogracias Victor “DV” Savellano ken dadduma pay a provincial officials.

Naangay ditoy ti maysa a medical ken dental mission babaen dagiti doktor ken nars nga inkuyog ti gobierno probinsial, naited ti 150 a monoblock chairs kadagiti day care centers iti Sugpon, makinaria iti agrikultura  para kadagiti mannalon kas iti kuliglig, generator ken 20 rolio a hose, water pumps, kalding a Boer, teksas a manok.

Nagiwaras ti Department of Agriculture iti libre a tilapia fingerlings ken native mango ken mahogany seedlings, idinto a 60 a sako ti bagas ti imbunong ti National Food Authority. Naiwaras pay dagiti agduduma a ramit iti pagadalan, BHW kits, nebulizers, weighing scales, suction catheters ken financial assistance a sag-P12,000 kada barangay.

Indeklara ti Department of Agrarian Reform ti sibubukel a Sugpon kas Special Agrarian Reform Community.

Nangipaay ti Smart/PLDT iti 3 minutos a libre a tawag kadagiti adda kabagianda  sadiay ballasiw-taaw. Naipaay pay ti libre a seminar para kadagiti barangay tanod, barangay health workers ken out-of-school youth ken panagsanay dagiti umili iti panagtarimaan iti electric fan ken plantsa.

Immuna a naisayangkat ti KABSAT iti Buguibog, Salcedo, naisaruno ti Quilang, Galimuyod, idi Enero daytoy a tawen, iti Alilem. Bagi ti Sugpon iti bulan ti Pebrero.

Kinuna ni Mayor Guillermo Amoyen a nabayagen nga idawdawatanda iti tulong iti gobierno nasional daytoy a problemada a rangtay a maipatakder iti paset ti Amburayan River a sumalput iti Porporiket, Sudipen, La Union. Adda met naibaon a nagsurbey ngem  nagpatingga la ditan gapu ta nalawa kano unay daytoy ken bassit laeng dagiti lumugar iti  Sugpon a mabenepisiaran.

(Adda tuloyna)