Salaysay: Rangtay a kumamang iti sugpon ti KASAPULAN dagiti lumugar

Buklen ti Sugpon iti 6 a barangay ngem daksanggasat ta ti laeng poblasion ti addaan iti koriente. Solar energy ti us-usaren dagiti lima a barangay.Kinuna ni Mayor Amoyen a no tiempo ti panagtutudo, tallo a balsa ti maus-usar a pagballasiwda, dua manipud iti pribado ken maysa ti inted ti gobierno probinsial. Iti bulan pay laeng ti Mayo, saganaanen dagiti lumugar ti matutudo ket ag-stockdan kadagiti kasapulanda iti balay kangrunaan kadagiti agas a pang-emerhensia ta daytoy ti karirigatan a paaddaen.

“Isu a narigat unay ti kasasaadmi ditoy gingginget ti bambantay ta maudikamin iti panagprogreso,” innayon ni Mayor Amoyen.

Impalgak ti mayor nga aganay P14 milion laeng ti internal revenue allotment (IRA) ti Sugpon ket inannugotna a bassit unay daytoy nga agserbi iti ili. Kinunana a no maikkat ti 20% development plan ken ti sueldo para kadagiti nasurok 30 nga empleado, makuna nga awanen ti mabati a maiyalokar para iti inprastruktura.

Segun pay ken ni Amoyen, dagiti produktoda a tabako, mais, sagad (tiger grass), laya ken ube laeng ti pamastrekanda. Gumatangda pay iti bagas manipud iti sabali nga ili ta sumagmamano laeng ti talon a mabalin a pagmulaan iti agricultural crops.

Pagsayaatanna ta adda ti ube nga ibilangda a “One town, One Product” iti ilida. Daytoy ti ilaklako dagiti lumugar iti Good Shepherd ken Tamcamco Company sadiay Siudad ti Baguio iti P12.00 kada kilo. Daytoy a produktoda ti ar-aramiden dagiti nasao a kompania nga ube jam a magustuan a gatangen dagiti turista a sumangsang-at iti Baguio.

Sabali a saksakiten ti nakem ni Mayor Amoyen ti pannakabirngas ti ilida a marihuana country agsipud ta dagiti maipadpadamag a pannakaduktal ken pannakaraut dagiti plantasion daytoy maiparparit a mula, mailanlanad a ti Sugpon ti pagtataudanda, banag a saan a pudno.

Segun iti mayor, masarakan dagiti nasao a plantasion iti nagbeddengan ti Ilocos Sur ken iti Bakun, Kibungan ken La Union, saan nga iti Sugpon a kas iti maipadpadamag.

“Daytoy ti kayatmi a maikkat ta makadadael met iti dayawmi a taga-Sugpon,” kinuna ni Mayor Amoyen.

Kadagiti immun-una nga interbiona iti media, indawat ni Mayor Amoyen iti itutulongda iti pannakaikkat daytoy nga imahe ti Sugpon agsipud ta awan ti kinaagpaysona, kasta met a nalinteg ken sumursurot kadagiti paglintegan dagiti umili ti Sugpon.

Maysa pay a prioridad a programa ni Mayor Amoyen ti pannakapaadda ti barangay health station iti ilida agsipud ta kasapulan unay daytoy gapu iti kaadayoda iti ospital.