Footer

SALAYSAY: Sibilianisasion wenno militarisasion?

Iti nalawlawag a pannao, gapuanan ken kinapasnek ti kangrunaan a
polisia a sursurotenda bayat ti panagtakemda iti militar. Daytoy a
prinsipio ti inkuyogda iti sibilian a pagannonganda.

Kadagitoy nangato nga opisial, efficiency is the name of the game ket bunga daytoy, dakkel ti maitulongda iti panagdur-as ti pagilian a mangitag-ay iti pagimbagan ken kalidad ti panagbiag dagiti umili.

Ngem iti sabali a bangir, adu ti komontra iti pannakadutok dagiti military ken police officials kadagiti nangato a puesto iti gobierno.

Kuna dagiti kritiko nga agparparang nga awan ti panagtalek ti turay kadagiti adda iti pribado wenno publiko a sektor a mangannong kadagiti pagrebbengan a mait-ited kadagiti military ken police officials.

Impetteng dagitoy a kritiko nga adu dagiti makabael a propesional kadagiti pagannongan iti turay a mabalin a mangipakat kadagiti progresibo a pampanunot para iti panagdur-as ti ahensia a pakaipuestoanda.

Apay, kunada, a dagiti military men ti mairanud iti puesto a rumbeng a dagiti sibilian ti mangimaton?

Adda pay dagiti kritiko a mangibagbaga nga adda latta nakasagana a puesto kadagiti agretiro a military ken police officials kas maysa a panagbayad iti administrasion iti naipaay dagitoy kadagiti tiempo a kasapulan unay ti suportada.

Mabalin a paglibakan dagiti agtuturay daytoy nga alegasion dagiti kritiko ngem kitaentayo ti napalabas.

Makuna nga idi tiempo daydi Pres. Ferdinand Marcos a nangrugi ti pannakaited kadagiti military officials iti dakkel nga akem iti pannakaipagna ti turay. Intultuloy daytoy dagiti simmarsaruno nga administrasion a pakaibilangan da Aquino, Ramos, Estrada ken Arroyo.

Nagramut ti Edsa revolution a nagtungpal iti pannakapadisi daydi Pres. Ferdinand Marcos iti mapapati a napaay a kudeta nga isayangkat koma ti maysa a grupo ti militar babaen ti panangidaulo ti Reform the Armed Forces Movement. Indeklara da Minister of Defense Juan Ponce Enrile ken Fidel Ramos, hepe ti Philippine Constabulary (Philippine National Police itan) ti panangibabawida iti suportada ken ni Marcos ket nangipasdekda iti sarikedkedda iti Camp Crame.

Nagpanawagan daydi Archbishop Jaime Cardinal Sin kadagiti umili iti panaggrugrupoda iti sanguanan ti Camp Crame tapno salaknibanda da Enrile ken Ramos.

Paseten ti historia ti napasamak. Napadisi ni Marcos ket sinuktan ni Corazon Aquino a kas presidente.

Kas panangsubadna ken ni Ramos, pinagbalin ni Cory daytoy a chief of staff ti Armed Forces sa sekretario ti National Defense.

Kalpasan ti panagtakem ni Aquino, ni Ramos ti inyendorsona a kandidatona para presidente.

Nagtultuloy daytoy a polisia ti gobierno idi nagtugaw ni Ramos a Presidente. Kasta met idi panawen ni Joseph  Estrada.

Ngem segun iti Confederation for the Unity, Recognition, and Advancement of Government Employees (COURAGE), kimmaro daytoy a polisia iti agdama a panagturay ni Pres. Arroyo nga iti panagkitana ket mangipaay iti peggad saan laeng nga iti sibilian a burokrasia no di pay iti demokrasia a mismo.

Naipeksa daytoy ti presidente ti COURAGE a ni Ferdinand Gaite kalpasan ti pannakadutok ni Vice Admiral Tirso Danga a kas hepe ti National Printing Office.

Mabalin nga adda pamkuatan ni Gaite a mangkondenar iti pannakadutok ni Danga a hepe ti NPO, ti ahensia a mangimaton iti pannakaimprinta dagiti balota para iti eleksion.

Karaman ni Danga kadagiti opisial a militar a nadakamat ti naganna mainaig iti kontrobersia ti Hello Garci  no sadino a naibutaktak babaen ti tape ti timek ti maysa a babai a katimtimek ni Pres. Arroyo a makipatpatang iti maysa a komisioner iti Commission on Elections mainaig dagiti butosna.

       (Adda tuloyna)