Footer

Salaysay: Son of bits, kabilgan a literatura iti agdama

Nagkamaliak iti spelling? Saan. Saan a beast wenno bitch, a kas iti son of a bitch no di ket bits a talaga. Bits, a kas iti bits and pieces.

“Son of a bits” ti kabibilgan a literatura iti agdama a panawen. Awan ngatan ti mangontra kadaytoy. Isuna  laeng ta saan a maymaysa ti author a kas kadagiti sangapulo a literatura a nangimpluensia iti lubong. Aduda dagiti author. Lalo dagiti para kadagiti ubbing. Ngamin para iti amin daytoy a literatura. Ken nangited iti dakkel la unay a panagbalbaliw iti lubong. Nangpatay kadagiti daan nga ay-ayam. Nangikkat kadagiti kadaanan nga aramid.

Daytoy ti maika-11 a literatura a nangimpluensia iti lubong ken iti agdama a panawen. Saan laeng a nangimpluensia no di pay binaliwanna ti rupa ti  lubong. Uray sadino: uneg ti balay, eskuelaan, trabaho, transportasion, pagtagilakuan, musika, kultura,  ken aminen a sektor ket nastreknan.

Nupay ad-adu nga amang ti maitedna a pagimbagan, adda met dagiti nadadael kadaytoy a literatura. Lalo kadagiti ubbing, naiyaw-awan ti inda panagiskuela. Ngem kadagiti met laeng agis-iskuela, limmag-an ti aramid, pimmardas ti trabaho,  immadu ti pagsukisokan, limmaka ken pimmardas ti panagsukisok.

Pimmartak ken limmag-an ti trabaho. Immadu iti maaramidan. Mapangnamnamaan a katulongan. Daytoy laengen a sinurat ken daytoy a basbasaenyo, iti man hard copy ken soft copy ti Tawid  News Magasin ket bunga met laeng ti literatura ti “son of bits”.

Ta ania aya ti makunkuna  a literatura  ti “son of bits”? The literature of computing. Ti literatura ti kompiuter.

Literatura ti kompiuter. Dagiti programa a sinurat dagiti programmers ken software engineers. Nagduduma daytoy ken iti amin a sektor a kas iti nakuna idi damo.

Dakkel a tulong ken  panagbalbaliw iti biag ti tao ti kompiuter. Amin san  ket patarayen ti kompiuter. Ti utek itan  ket nakakonekta iti kompiuter. Kadagiti dadduma, agdependarda payen iti kompiuter.

Nupay adu ti pagimbagan a maitedna, adda met dagiti naiyaw-awan nga  ubbing gapu ta a nagbalinda nga adik iti kompiuter babaen kadagiti ay-ayam. Agmalmalem dagita  nga  ubbing a  dida sumrek iti eskuelaan. Dagiti dadduma met kupitanda dagiti nagannak kadakuada wenno agtakawda  tapno laeng adda  maikompiuterda. Nabileg ti literatura ti “son of bits” ta kabaelanna a baliwan ti biag ti maysa a tao ken  tenglen ti utek ti maysa a tao. Lalo kadagiti naadik iti ay-ayam.

Son of bits. Ti bits ditoy, kayatna a sawen  ti smallest unit of measurement of data and information. Naiyababa manipud iti binary digits.

No “son of bits” kunana, “anak ti kompiuter” wenno iti ababa a pannao, agar-aramat wenno agus-usar iti kompiuter iti amin nga aramid, trabaho ken ay-ayam, iti panagadal ken panagsukisok ken amin-amin.

Kinapudnona, saanko a bukod a putar daytoy a “son of bits”. Nangegegko laeng daytoy a balikas iti padak a lektiurer iti literatura sadiay DMMMSU Mid La Union Campus. Inadawna met dayta  nga imbagana manipud iti lektiurer iti dinar-ayanna a press conference sadiay Visayas. Nga isu ti  ibagbagak ita.

Wen, nabileg ti kompiuter. Nabileg la unay.  Maimpluensia unay ti computing system a nangited iti sapasap a panagbalbaliw.#