SALAYSAY: Taraon ti Biag: Nalipatan nga Akem

Adda kadi met malipatan nga akem? Wenno responsibilidad ken kinaasino? Nalabit nga adda. Saantayo laeng a maik-ikkan iti importansia ta napatpateg nga amang ti agdama nga ar-aramidentayo ngem ti rumbeng ken kaskenan koma a pangibaw-ingantayo iti atension ken panawentayo. Iti panaglabas ti panawen, sapulentayo dayta rumbeng koma nga agpaay kadatayo ngem saantayo a makita ta nabaw-ingen ti imatangtayo. Mangpataud iti riribuk daytoy no di maaluadan.

Kas kadagiti agassawa a Ruben ken Alyssa. Agtrabaho ni Alyssa a kas manager iti banko idinto ta immikkat iti trabahona ni Ruben tapno asikasuenna pay ti panagbasana iti Law. Agsipud ta pangadaywen ti trabaho ni Alyssa, matmaturog pay ti nasurok dua a tawen nga anakda no mapan agtrabaho ket agsipud ta rabiinto metten a sumangpet, masansan a nakaturogen daytoy. Iti ababa a pannao, naas-asideg ti rikna ti anak iti amana ngem iti inana.

Makumikom ti ina kadagiti trabahona, kadagiti klienteda ken para iti bukodna a bagi. Isu nga amin a kasapulan ti ubing, ti ama ti mangipaay.

No aguummong ti pamilia, kakabagian ken gagayyem, kabayatan a naragsak ti kakatawaan ti ina, ti ama makumikom a mangsuksukat ti lampin ken kawes ti anakda, agpagatas, ken agpaturog iti daytoy. Ad-adda a ti ama ti mangpadigos ken mangpelles iti anakda. Naruay ti buya a kabayatan ti diskusion, adda ti ama iti ummong dagiti inna ken dagiti ubbing.

Saan nga inikkan ni Alyssa iti importansia dayta a situa-sion iti panaglabas dagiti bulan ken tawen. Kaykayat met ti ina ti situasion, a nagbaliktad ti akemda ken ni lakayna.

Maysa nga aldaw, adda dinar-ayan dagiti agassawa a party ti opisina ti babai. Natural a marabianda. Agur-uray ti anak idi sumangpet dagiti dadakkelna. Adda segga ti ubing iti dayta a kanito. Adda di mailadawan a kinaragsak ti ubing. Nagtaray ti ubing a sumabat. Nairana nga immuna ti ina, ngem imbes nga umarakup kenkuana ti anak, limmisi ket timmaray nga agpaarakup iti ama. Agkatkatawa dagiti agama nga immuneg iti salas idinto a nabati nga agmalmalanga ti ina, dina ammo ti aramidenna iti dayta a situasion.

No agpasiarda, adda panawen nga agalburito ti anak, natural a pasardengen ti ina, ngem saan a sumardeng ti anak ta birokenna ti amana. Adda panawen a saan a kayat nga awaten ti anak ti aniaman a makan ken mainom manipud iti ina malaksid ti aggapu iti ama. Masansan a mapasamak a no ti ina ti agaywan, agsangit ti anak no dina makita ti amana.

Iti naminsan a nagsakit ti ubing ket naospital, nagsangit idi saanna a makita ti amana nga agbambantay kenkuana uray no adda ti ina iti sibayna. Sapulen ti ubing ti nakairuamanna nga apros ken dungngo. Kaykayat ti ubing ti maturog iti barukong ti ama wenno agpaubba daytoy kabayatan ti pannaturogna. No makariing, ti ama ti umuna a sapulenna uray adda iti sibayna ti inana.

Nangibunga daytoy a situasion ti pamilia iti pagpampanunotan. Ta saan kadi a ti ina ti nanginaw ken nangisikog ti anak? Ta saan kadi nga iti uneg ti siam a bulan ket inan-anusan ti ina nga inawit ti anak sakbay a naipasngay? Saan kadi a dandani impatay ti ina ti panangiyanakna iti anak? Ta saan kadi nga immuna a nakaturog ti maladaga iti arakup ti ina? Saan kadi nga iti ina ti immuna a nakaramanan ti ubing iti taraon? Apay itan a kaykayat ti ubing ti amana ngem ti inana?

Ngem nalipatan ti ina ti agdadata a kinapudno nga aramiden a mismo dagiti dadakkel ti panangtarabay iti anak, saan a maymaysa laeng kadakuada. Nalipatanna ti panawen a rumbeng koma a kaduaenna ti ama a mangiparikna iti pammateg iti anakda.

Adda dagiti situasion a malipatan ti responsibilidad wenno mabaybay-an gapu iti bukod a pakakumikoman, iti trabaho, ken dadduma pay. Masapul ti pannakatimbeng dagiti pasamak. Masapul a sanguen ti kinapudno nga adda pay dagiti nasken nga ipaayan iti imatang a saan laeng a ti agdama nga aramid. Kasapulan ti balanse a panangpadakkel iti annak. Ti ama ken ti ina, saan a maysa laeng kadakuada, ti mangakem iti pagrebbengan a mangpatanor iti anak.

Kadagiti aramid ti pakatimonan ti anak. Awitna dayta iti inna panagdakkel.#