Footer

Ti kabalio ken ti kutsero (Umuna iti dua a paset)

No maminsan, nasapa a maibukirad dagiti mata dagiti ubbing iti agdadata a kinapudno. Ken adda panawen a saan a mapanunot ti manakman ti maysa a banag ngem mapanunot dagiti ubbing. Mapanunotda dagiti babassit a banag a di unay maikaskaso ken maitaltalek. Agsipud ta agur-unongda kadagiti adal iti biag wenno “taraon ti panunot” nga imutektekanda. Iti panagimutektekda iti kinapudno, yaonda met dagiti saan a gagangay a saludsod.  Nasken ngarud a masungbatan dagiti saludsodda iti pakapnekanda ta dayta ti mangidalan kadakuada iti naraniag a masakbayan.

No saan a masungbatan dagiti saludsod dagiti ubbing iti pakapnekanda, agtultuloyto latta ti panagsaludsodda wenno saan, no maumadan iti kasasaludsod, baybay-andan a saandan a malawlawagan ken ikkan iti panangimutektek. Adda  wenno dakkel ti tendensiana a kadagiti masanguanan nga aldaw, saanda met a masolbar ti dumteng kadakuada a parikut.

Ta apay a saanda a makasolbar iti sumangbay kadakuada a parikut? Agsipud ta saanda a naipaayan iti pannakapnek kabayatan nga agur-urnongda kadagiti adal iti biag. Adda missing link. Isu a napateg la unay a sungbatan iti positibo amin a saludsod dagiti ubbing agsipud ta dagiti maadalda ti pagkaptanda nga agturong iti naraniag a masakbayan.

Iti naminsan a  panangipasiarmi kadagiti pito a kaanakanmi ken appomi nga ubbing iti Vigan, napasamak ti saan a gagangay a saludsod ti maysa nga ubing. Saludsod a saan a gagangay nga agtaud iti ubing a kalleppasna ti Preparatory II.

Iti sango ti provincial library wenno iti sikigan ti munisipio ti nagdissaaganmi. Idi kitaek a saggaysa dagiti ubbing, naisabali ti ayan ni April. Naipigket dagiti matana iti kalesa. Gagangay ngamin a saan a makakitkita iti kalesa dagiti taga-Siudad dagiti Saleng. Adda met ketdi dagiti kabalio iti Wright Park ngem saanda unay a mapmapan sadiay.  Ken maysa, awan ti kalesa sadiay.

Idi rimmuarkami iti St. Paul Cathedral, nasiputak manen ni April a timmaray a napan iti sanguanan dagiti nakaparking a kalesa iti ampir ti simbaan. Kasla agpampanunot iti nauneg ti ubing. Serioso ti langana. Saan nga agtagtagari. Mirmiraenna dagiti kabalio.

Iti panunotko, adda la ketdi mulmulmolan ti panunotna. Pinaliiwko iti nalimed. Kasla maburburtiaan. Saan a gagangay daytoy a mapalpaliiwko kenkuana. Ti sigud a natarabit ken nakulit nga ubing, saan itan a matagtagari? Adda la ketdi  mulmulmolan ti panunotna a saanna a maiyebkas!

Naragsak dagiti ubbing bayat ti inkam panangbaybay iti Heritage Village, iti panaggatangda kadagiti tagilako ken panagbuyada kadagiti kadaanan a balbalay. Idi makakitada iti bakante a swing, nagiinnunada a napan nagtugaw. Adda iti tengnga ti maysa kadagiti tugaw a sumango iti abagatan ni April.

Adda limmabas a kalesa manipud iti amianan. Pinaliiwko ni April idi makabatog ti kalesa. Insursurotna ti panagkitana iti kalesa. Saan ngata a napnek iti panagkitana ta timmaray nga immasideg. Nasiputak nga iti ulo ti kabalio ti turong  dagiti matana. Napan innala ti amana, ken kinibinna nga insubli iti swing.

Apaman a nakatugaw, kinunana a dagus: “Ayyuya ngay nga abonganda ti mata ti kabalio ditoy, isu?” Inwarasna ti panagkitana kadakami a kakaduana.

Awan ti nakatimek. Maysamaysa ket naikuleng. Napaumel. Kasla awan ti mangayat a mangsungbat iti saan a gagangay a saludsod.

(Maigibusto)