Footer

SALAYSAY: Ti Libut ken ti Oratio Imperata (Maudi a paset)

Maipaganetget ken maipalagip a nalaing ken kankanayon a maigidiat la unay ti popular devotion iti liturgy. Agdumada la unay. Agsupadi dagitoy a dua iti pakaiturongan iti pammati.

Iti liturgy, the official public worship of God by the Church as the Body of Christ.

Dagiti pito a sakramento iti simbaan dagiti makunkuna liturgy. Kas iti Liturgy of Eucharist wenno ti Nasantuan a Misa. Ti Buniag,  Konpirmasion,  Penance and Reconciliation, anointing of the sick wenno ti panangpulotan iti masakit, ti holy orders ken ti matrimonia wenno kallaysa dagiti innem pay a liturgy.

Gapu iti sagsagabaen a tikag a pinarnuay ti El Niño iti agdama, adda dagiti sumagmamano a diocese, a kas iti Cebu ken Basilan a nangibilin a nasken ti panangibabaet a panangikararag iti Oratio Imperata iti liturgy kangrunaanna iti Nasantuan a Misa. Maaramid ti panangiyebkas iti kararag kalpasan ti komunion. Naynay a ditoy ti pangiballaetan iti Oratio Imperata. Kalpasanna, agtuloy met la ti maudi a paset ti Nasantuan a Misa.

Maysa nga Obligatory Prayer wenno nagtaud iti pammilin manipud a mismo ken apo Obispo ti Oratio Imperata. Obligado nga aramiden amin a kameng ti simbaan. Obligado nga aramiden iti ritual ti simbaan. Maipaganetget a nasken nga aramiden ti sibubukel a diocese wenno amin a mamati ta maysa dayta a pammilin manipud iti Obispo.

Maigidiat la unay iti popular devotion ta awan a pulos ti pammilin dagiti agrebbeng iti simbaan, kadagiti papadi wenno ti Obispo iti diocese no di laeng kabukbukodan nga aramid wenno discretion dagiti deboto wenno dagiti mamati. Ipalubos ti simbaan daytoy basta saan la ketdi a lumaksid no di ket paamnuten ken papigsaenna pay ti pammati . No la ketdi agserbi a kas paratignay ti pammati, saanen a biangan ti simbaan.

Maipaset wenno maiyebkas ti Oratio Imperata iti liturgy a kas lualo wenno kararag para iti sangsanguen nga agdama a pagpeggadan wenno kalamidad. Gagangay ti panagkiddaw iti intervention ti Mannakabalin iti pakarikutan ti sapasap. Kas iti agdama, gapu iti nalabes a tikag a nangdidigra kadagiti mannalon, maigunamgunam met iti sibubukel a diocese ti kanayon a panangibabaet a panangikararag iti Oratio Imperata.

Saan laeng nga iti tikag ti pakaiballaetan ti Oratio Imperata. Mabalin nga ibilin ti Obispo daytoy uray ania man a sagabaen ti sapasap nga umili a makita ken mariknana a mismo. Kas ken ni Manila Archbishop Gaudencio Cardinal Rosales nangiyetnag iti pammilin ti Oratio Imperata idi Mayo idi napan a tawen gapu iti krisis ti H1N1 virus iti pagilian ken iti sibubukel a lubong. Kasta pay ti naaramid simmangbay ti El Niño met laeng idi 1997.

Daytoy ti paggidiatan ti popular devotion ken liturgy. Ti libut ken ti Oratio Imperata. Ngem popular devotion man wenno liturgy, saanen a nasken a husgaan ti kaimudinganda ta agpadada a mangpabileg iti pammati.#