SALAYSAY: Ti Tobacco Festival ti Candon City (Maikadua a paset)

TOBACCO QUIZ BEE. Silulukat daytoy a pasalip kadagiti amin a pagadalan iti maikadua a distrito ti Ilocos Sur a nakipartisiparan dagiti agbasbasa iti kolehio, sekundaria ken elementaria. Naggapu ken insagana ti Farm Technology Services Department ti National Tobacco Administration iti Batac-Ilocos Sur dagiti saludsod.

Ti National Tobacco Administration ti nangplano ken nangiwayat kadagiti nadakamat a programa iti ngato.

STREETDANCING COMPETITION

Rinibribu ti nagbuya ken nagpadaan iti kalsada iti malem ti Marso 28, 2009 tapno buyaenda ti tinawen nga streetdancing competition.

Naisentro ti tema iti tabako, amin nga streetdancers ket masapul nga ipakitana ti kultura ni Ilokano nangruna iti pakainaigan ti panagmula iti birhinia a tabako.

Siam dagiti nagsasalip manipud iti pagadalan iti sekundaria ken kolehio a nakabase iti Candon City.

Manipud alas dos iti malem a pannakairugi ti streetdancing, inanusan dagiti tattao ti pudot ken kettangda a nagtakder iti kalsada tapno laeng mabuyada dagiti ingget-lap-it ti lungayda nga streetdancers manipud iti daan a city hall agingga iti South Central School quadrangle.

Naaramid ti showdown iti quadrangle. Idi malpas, inyalat ti University of Northern Philippines ti P50,000 a premio; maikadua ti Ilocos Sur Polytechnic State College ken maikatlo ti Candon National High School.

DAGITI DADDUMA PAY A PROGRAMA

Malaksid kadagiti nadakamat iti ngato, saan a pinalabes dagiti rinibu a tattao dagiti dadduma pay a pabuya kas ti Mr. and Ms. Bikini Ilocandia 2009 a naangay idiay Candon Beach Front iti Barangay Darapidap, Candon City; Search for Miss Gay Ilocandia 2009; Ilocandia Singing Idol; konsierto ti Philharmonic Orchestra; SK Night; Administration-Barangay-Balikbayan Night; ken Pammadayaw.

Naangay pay ti Fiesta Anunciacion ni Santa Maria babaen ti panakaaramid ti rosario manipud iti kalamay a naikabil iti sabot iti sango ti St. John de Sahagun Parish Church ken misa babaen ken ni Fr. Vicente Avila; ti Golden Anniversary Priesthood ni Fr. Leobardo Inofinada; wreath laying ken pannakalagip iti Ikkis ti Candon ken Ballet Recital.

SPORTS. Pakairamanan kadagiti isports a di pinalabes dagiti umili ti 2nd Leg ti National Motocross; Airsoft Competition a pinartisiparan dagiti naggapu iti Baguio City, Laoag City, Vigan City ken dadduma pay a lugar; DZTP 9-Ball Challenge; Taekwondo Championship; 2009 Mayor Allen Singson 10-K Run; National Chess Tournament; Candon City Soccer Festival; 2009 Mountain Bike Fun Ride; Amateur Boxing Tournament; ken Beach Volleyball.

DAGITI BISITA

Kangrunaan a nagbalin a bisita da Senador Francisco Pangilinan, Ramon Revilla, Jr. Deputy Speaker Eric Singson ken ni Gobernador Deogracias Victor Savellano.

Nakipagragsak met da Cris Nelson, agdama a managing director ti Philip Morris, ken ni Winston Uy ti Universal Leaf Philippines, Inc. bayat ti salip iti panagdubla. Ti kompania da Nelson ken Uy dagiti kangrunaan nga aggatgatang iti tabako iti Ilokandia. Nakipagbilot dagiti dua ken sinursuroda ti umno a panagdubla ken panangsusop iti dakkel a tabako.

Impaneknek manen dagiti babbaket ken lallakay iti Candon ti laingda nga agdubla iti pasalip.

“Maysa a kultura ken kannawidan ni Ilokano ti panagdubla manipud pay kadagiti ap-apongtayo,” kinuna ti maysa a baket.

(Adda tuloyna)