SALAYSAY: Ti Tobacco Festival ti Candon City (Umuna a paset)

Ti Candon City ti kadakkelan ti produksion iti tabako iti intero a pagilian ti Filipinas.

Tinawen, sumurok-kumurang a tallo a milion a kilos manipud iti sumurok-kumurang 1,000 nga ektaria ti kataltalonan ti mamulmulaan iti tabako.

Kaadduan ditoy a maimulmula ket birhinia a tabako. Awan pay maysa a porsiento ti maimula a native ken burley a tabako.

Maigapu iti daytoy, kadakkelan ti Candon City iti bingay manipud iti excise tax iti tabako wenno tay maaw-awagan ti RA 7171. Umab-abot iti P18 milion ti pondo a mait-ited iti Candon iti tinawen a pakaipanpanapan iti pro-yekto iti agrikultura kas iti farm to market roads, livelihood programs ken dadduma pay nga infrastructure projects ken programa a makatulong kada-giti mannalon ti tabako.

Malaksid iti daytoy, ti panagmula iti tabako met laeng ti kangrunaan a gapu iti panaglupos ti panagbiag dagiti mannalon. Nakapagbasa dagiti annakda, nakapag-abroad ti asawada ken nakaipatakderda iti balayda gapu iti tabako.

Uray ditoy Candon, makuna a gapu iti tabako a narang-ay a lugar agsipud ta ti bingay ti siudad iti excise tax daytoy a produkto ti pagtaudan dagiti pondo kadagiti proyekto nga inprastraktura ken dagiti programa a nakatulong kadagiti mannalon.

Nangruna iti daytoy a tawen a saan unay a nagbalin a mannakigayyem ti presio ti mais kadagiti mannalon, ti tabako ti nangsalbar kadagiti mannalon tapno makaangesda bassit iti daytoy a panawen ti krisis.

Kabayatanna a nagay-ayam laeng iti P13 tunggal kilo ti mais babaen ti subsidy ti gobierno probinsial ti Ilocos Sur kadagiti mannalonna, ti tabako ket ginanasna ti P60-90 a presiona.

Dagitoy ti gapuna no apay nga adda latta maangay a Tobacco Festival iti Candon City. Maysa daytoy a panangbigbig iti tulong ti bulong tapno rumang-ay ti lugar.

Iti daytoy a tawen, imparangarang manen dagiti agtuturay ditoy siudad ti panangital-ona iti tabako babaen ti nangayed a Candon City Tobacco Festival 2009.

TI FIESTA TI TABAKO

MISS VIRGINIA TOBACCO. Nairugi ti naragsak a piesta idi Pebrero 21 babaen ti pannakaisayangkat ti screening ken pannakapili kadagiti 12 a kandidata para iti Miss Virginia Tobacco 2009. Naggapu dagiti nalalapsat a babbalasang kadagiti tobacco producing provinces a pakairamanan ti Ilocos Sur, Ilocos Nortre, Abra, La Union ken Pangasinan.

Iti tinawen a pannakaang-angayna, kanayon a pusek ti Candon Civic Center a pakaipabpabuyaanna. Iti daytoy a tawen, naaramid idi Marso 27 ti programa.

PANAGDUBLA. Tallo a kategoria ti pasalip mainaig iti panagdubla iti tabako: pinnaatiddog, pinnaaduan, ken pinnaspasan. Nupay silulukat kadagiti amin a mannalon, kaadduan kadagiti makisalsalip dagiti babbaket ta isuda ti eksperto nga agdubdubla.

Pakairamanan iti naisayangkat dagiti sumaganad:

1. Panagdubla iti maysa a metro a kaatiddog ken maysa a pulgada a kalukmeg sa masindian. Pagpartisiparan daytoy ti tallo a tao tunggal grupo nga aggapu iti barangay wenno kooperatiba. Ti umuna a makadubla, makasindi ken makaipug-aw iti asuk ti mangabak.

2. Pinnaatiddog ti madubla. Iti uneg iti lima a minuto, mangdubla dagiti makisalip iti maysa agingga iti dua metro a kalukmeg, ket no sino ti kaatiddogan, isu ti mangabak.

3. Pinnaaduan ti madubla. Iti uneg ti lima a minutos, mangdubla iti agatiddog iti innem a pulgada ken kalukmeg a maysa a pulgada ket no sino ti kaadduan ken kapintasan iti nadubla ti mangabak.

4. Pinnaatiddog iti naluto a bulong ti birhinia. Mangitugot dagiti makisalip ti nalutoda a bulong ti tabako. No sino ti tallo a kaatiddogan, isu ti nangabak.

5. Pinnaspasan iti panagsusop iti tabako iti uneg iti lima a minutos.

(Adda tuloyna)