SALAYSAY: Typhoon Pepeng: Biktima iti Kinaparato ni Ilokano

Uray iti sanguanan ti kalamidad, rummuar latta ti kinamanagrabak ni Ilokano. Uray iti baet ti laklak-amentayo a didigra gapu iti nagsaruno a bagyo a nangsanot iti pagiliantayo ken nangisangbay iti kalamidad, maisamiratayo latta ti umisem, agkatawa ken makinrinnabak.

Pammaneknek a narabaw ti raragsakantayo a Filipino. Saan a kabaelan dagiti didigra ken trahedia a pukawen ti naisaguday kadatayo a panagray-aw wenno panangted-ray-aw kadagiti kailiantayo.

Kas iti nangegmi iti kangitingitan ti panangsanot ni Bagyo Pepeng iti Amianan a Luzon a pakairamanan ti Ilocos Sur.

Gapu ta impigsana manen ti tudo, napanak naglinong iti maysa a tienda. Iti uneg, nakapigpigsa ti timek ti maysa nga anaunser a mangipatpatangatang kadagiti situational reports mainaig iti Bagyo Pepeng. Ibagbagana ti saan a pannagna dagiti tattao iti kalsada a lumabas iti maysa a pagadalan ditoy siudad.

Narigat a makalasat ti lugan iti kalsada ta adda napattog a kayo!” imballaag ti anaunser.

Diak nagawidan ti immisem iti nangegko. Nupay kasta, diak kinomentarian ti nangegko. Naikaglis la ti dila ti anaunser, nakunak iti nakemko.

Ngem iti simmaruno a panagipadamagna, nakuna ti anaunser: “Adu dagiti naidanon a report ditoy a napattog a saba gapu iti nakapigpigsa nga angin!”

Kinalbitnak ni Manong Andres, ti akinkukua iti tienda: “Maestro, ipattogmo man ketdi ta botelia ti arak iti basom bareng matumba wenno matuang dagiti kayo ken saba!”

Iti dayta a malem, saannak a nakapan iti papanak. Natumbaak iti kaadu ti arak nga impattog ni Manong Andres iti basok! Iti bartekko, nasalaponko ti malukong ket naipattog ti napudot a kaldo pinapaitan a pulotanmi.

Nupay dakkel a didigra ti inyeg ni Bagyo Pepeng, nagbalin met a biktima iti kinaparato ni Ilokano.

Nangegmi daytoy a tungtongan dagiti miron. Kinuna ti maysa a miron: “Iti panagintek ni Bagyo Pepeng ditoy Ilokos, maragsakan la ketdi ni Manong Peping a kaarrubami ta saan a makapan iti karayan agkammel iti ikan.”

Apay ngarud?” sinaludsod ti kaabayna.

Ayna, naglapana ti pagkammelanna iti takdang!” nagpaggaak ti miron. Nagdusngi dagiti kaabayna ta nagsapri, ngem saan a naggapu iti sagumaymay no di manipud iti ngiwat ti miron.

Kas iti panagintekna iti asideg ti Laoag City iti dua nga aldaw, maysa a kailian ti nagteks iti radio a saan a makapanawpanaw ni Bagyo Pepeng ta ur-urayenna ti bagnet ken longganisa a balonna. Maysa pay ti nangiteks a mabalin nga adda nasirpat ni Pepeng a nasippukel a balasang isu a dina kayat ti pumanaw iti Ilokos. Sabali laeng ti nagkuna a di makapanaw ni Bagyo Pepeng ta ur-urayenna ni baketna a sumangpet. Sabali pay ti nagsutil a saan koma a Pepeng ti nagan ti bagyo no di Andres agsipud ta kasla ni Andres (ander) di saya a mabuteng a pumanaw a di makasangpet nga umuna ni baketna. Ti sumungsungad a Bagyo Quedan ti dakdakamaten ti nagteks nga iyur-uray ni Bagyo Pepeng.

Nadakamat ti maysa a forecaster a posible a makitipon ni Bagyo Pepeng ken ni Bagyo Quedan iti ilalabas ti naudi a mapan iti Japan. Maysa a sutil ti nangegko a nagkuna a maysa a macho ni Bagyo Pepeng ken hot babe ni Bagyo Quedan ta aginnurayda nga agkanaig sadanto agkuyog a pumanaw ditoy Ilokos.

Ngem saan a napasamak dayta a panagmaymaysa dagiti dua a bagyo.

Maysa nga anaunser ti nagkuna a sosial ni Bagyo Quedan ta ganggannaet a pagilian ti kayatna a pagpasiaran idinto a lokal a turista ni Bagyo Pepeng ta ditoy Ilokos ti napilina a pagintekan. Nagsanamtek ti maysa a gayyemmi iti daytoy a nangegna. “Napimpintas ti guyod dagiti babbai dita Barangay Uno ngem dagiti babbai a Haponesa,” nakunana.

Dimo la ketdi magawidan ti saan nga agkatawa iti daytoy nga impalapal ti maysa met laeng nga anaunser: “Bakla ni Pepeng ta dina kayat ti sumurot ken ni Quedan agsipud ta mapan daytoy agpasiar iti Okinawa, Japan!”

Sumagmamano laeng dagitoy a nangegmi bayat ti iduduprak ni Bagyo Pepeng iti Amianan a Luzon a pakairamanan daytoy probinsiatayo. Ipaneknek dagitoy a rabrabak nga ammo ni Ilokano ti umisem wenno agkatawa uray iti sanguanan dagiti didigra a sagsagabaentayo.#