SALAYSAY: UNP Quimmarayan Campus, sentro ti panagsukisok… (Umuna iti Dua a Paset)

SAAN a talaga a malapdan ti itatayok ti University of Northern Philippines (UNP) iti babaen ti administrasion ni Dr. Lauro B. Tacbas a nailayon manen a kas presidente ti kaunaan ken kakaisuna nga unibersidad ditoy Ilocos Sur. Kalpasan a naiyestablisar ti UNP Sinait Campus sumagmamanon a tawen ti napalabas, adtoy manen a maipasdek ti UNP Quimmarayan Campus iti Barangay Quimmarayan, Sto. Domingo, Ilocos Sur nga agbalin a sentro ti panagsukisok ken panagdur-as (research and development) iti benneg ti agrikultura. Nairugi daytoy idi Agosto 22, 2007 babaen ti pannakaipresentar ti masterplan ti pito ektaria a lote. Abay a mismo daytoy ti daga a minulaan ti Philippine Coconut Authority (PCA) iti niog.

Naipakita pay kadagiti dimmar-ay a pakairamanan da pasado Diputado Salacnib Baterina, Sto. Domingo Mayor Floro Tadena, dagiti opisial ti UNP, media ken dagiti agindeg iti lugar dagiti demo farms para iti panagsukisok iti rice production,  indigenous root crops a pakairamanan ti baro a produkto a Yacon wenno Smallanthus Sp., inland fisheries ken aquatic resources  ken pakaipabuyaan iti agro-forestry ecological technology. Ni Rev. Fr. Reynaldo Rebebes ti nangbendision iti aglawlaw ti campus.   

   

Adu a pannubok

   

Dandani di natuloy daytoy a proyekto ti UNP. Sakbayna, indiaya ni Diputado (idi) Salacnib Baterina ken ni Dr. Tacbas ti pannakaipasdek ti sabali pay a campus iti Sto. Domingo, Ilocos Sur ngem saan nga inawat a dagus ti presidente gapu ta adda rigrigatna a patauden ti pondo tapno mairugi ti proyekto. Kayat ngamin ti UNP Board of Regents a masigurado a makatulong ti nasao a proyekto kadagiti agindeg iti Quimmarayan.

Saan a nauma ti diputado a nangkombinsir ken ni Dr. Tacbas tapno awatenna daytoy a proyekto a namnamaenna a makatulong unay iti pannakapabaro iti wagas ti panagtalon ken mangpaadu iti apiten babaen ti pannakausar dagiti baro a teknolohia. Ket iti yaabuloy ti naud-udi idi napalabas a kalgaw, dinardaras ni Dip. Baterina nga inasikaso ti papeles ti daga manipud kadagiti private donors tapno agbalin a kukua ti gobierno iti laksid nga agpason ti terminona kas representante ti umuna a distrito ti probinsia.

Ngem nagbalin a problema ti panagkitakit dagiti sangapulo a madama a manggamgamulo iti daga a maikkatdan kas agtalon. 

Impalawag dagiti opisial dagiti bentahe ti pannakaipasdek ti campus iti lugar. Naited a libre dagiti lote a nagsaadan dagiti balbalay dagiti maseknan a pamilia. Paset pay ti katulagan a talonenda latta ti daga agingga a di pay nairugi ti pannakabangon dagiti pasdek. Ited amin ti UNP dagiti kasapulanda, manipud iti hybrid a bin-i, ganagan, pestisidio ken dadduma pay a farm inputs ken iti bingayan a 50/50. Dagitoy met laeng a pamilia ti prioridad a maala nga agtrabaho no mairugi ti konstruksion.

            (Maituloyto)