SALAYSAY: Uray dagiti ubbing, magustuanda ti malunggay ice cream ti San Ildefonso (Umuna a paset)

Parikut ti kaaduan a nagannak ti saan a panangayat dagiti ubbingda nga agsida iti nateng. Adu nga ay-ayo, panangipapilit, ken ungetda no dadduma tapno laeng agsida dagiti ubbing iti nateng. Adda payen dagiti naipatpatalastas iti telebision a bitamina a naaramid kano manipud iti nateng. Sikat pay itan ti commercial jingle a “Makulay ang Buhay sa Sinabawang Gulay” a mangitantandudo iti panagsida dagiti ubbing iti natnateng.

Idi Hulio 2007, bayat ti pannakaselebrar ti National Nutrition Month  nga addaan iti tema a “Healthy Lifestyle ng Kabataan, Landas sa Kinabukasan”,  nangpanunot ti katugtugawna idi a mayor ti San Ildefonso, Ilocos Sur, ni Mayor Christian Daniel Purisima, iti maysa a proyekto a mayataday iti selebrasion. Pinaayabanna ngarud ni Willy Pamo, maysa kadagiti agar-aramid iti sorbetes iti Barangay Bungro tapno  mangisayangkat iti maysa nga eksperimento – ti panagaramidna iti ice cream manipud iti bulong ti marunggay. Arintukiaden idi ni Willy a mangawat iti proyekto ti mayor ta dina pay  napadasan ti nagaramid iti sorbetes manipud iti nateng ket adda amakna a saanna a malako no saan a naimas ti aramidenna. Numona ta P1,000 ti magastos iti maysa saangan.

Inay-ayo ketdi ni Mayor Purisima ni Willy a mangituloy iti eksperimento ket bayadanna ti  amin a magastos aniaman ti agbalin a resulta daytoy. Naimas man wenno saan, awan ti mapukaw ti agaramid.

Anian a ragsak ni Willy idi agballigi ti eksperimentona. Naimas ti nagbanagan ti umuna a sorbetes a nateng nga inawaganda iti malunggay ice cream. Idi naramanan ni Mayor Purisima daytoy, nakunana a saan a mabainan no iparamanna  met ken ni Gob. Deogracias Victor  Savellano a maysa kadagiti kagagetan a mangitantandudo iti panagpaadu iti marunggay kadagiti amin a paraangan. Kinuna ni Mayor Purisima a makatulong ti malunggay ice cream tapno lalo pay nga agballigi ti kampania ni Gobernador Savellano a mangpaadu iti marunggay.

Binagkat ti grupo ti mayor ti maysa a karitela (tay iduron ti sorbetero bayat ti panagbatingtingna iti bassit ken natinggaw a kampanana) ti sorbetes  ket imparamanna ti baro a produkto ti ilina bayat ti Ilocos Sur Heritage Culinary Tour ken 2nd Chefs on Parade a naangay iti siudad ti Vigan idi Agosto 26-29, 2007. Nagustuan ni Gob. Savellano  ti ice cream agraman dagiti agkakalatak a chefs iti pagilian a pakairamanan da Heny  Sison, Ed Quimson, Nancy Reyes-Lumen ken dadduma pay a nakipaset iti okasion. Sinublisubli dagiti sangaili ti napan nangkarga kadagiti basoda idinto a maymaysa ti naibagada: malaksid a naimas, napnuan sustansia pay daytoy a klase ti sorbetes.

Saan la a dita a nagpatingga ti panagdayawda iti malunggay ice cream ti San Ildefonso. Insuratda pay daytoy kadagiti national newspapers a pagpapaayanda a kas columnist. Ditan a nangrugi ti panaglatak ti malunggay ice cream.

Kinuna ni Mayor Purisima a ti marunggay ice cream ti maysa  a solusion iti parikut ti kaaduan a nagannak a panangpakan dagiti annakda iti nateng.

“No saanda a kayat ti nateng, pakanenyo ida iti malunggay ice cream. Itoy a wagas, manganda iti nateng a dida nadnadlaw ken malapdan pay ti panagungetyo,” siiisem a kinuna ti mayor.
          (Maigibusto)