Footer

SALAYSAY: Vigan: Sentro ti Turismo iti Amianan (Maudi a paset)

Saan
met a paatiw ti Vigan no pagsisipan iti adal ti pagsasaritaan.
Masarakan iti dayaen ti katedral ti Divine Word College of Vigan. Iti
amianan-a-laud ti simbaan, adda idi ti Saint Paul’s College of
Ilocos Sur nga imatonan dagiti mamadre.
(Maysan
a commercial establishment ti pasdek ti SPCIS. Naiyalis ti SPCIS iti
Bantay, Ilocos Sur. – Ed.)

Iti Barangay Tamag, masarakan ti University of Northern Philippines,
ti kangrunaan nga unibersidad iti Amianan a daydaywen dagiti
agbasbasa manipud iti Abra, La Union, Cagayan, Ilocos Norte ken uray
pay dagiti taga-ballasiw-taaw kas iti Thailand, Korea ken dadduma pay
nga Asiano a pagilian.

Saan met a paudi ti Immaculate
Conception Minor Seminary ken Ilocos Sur National High School, Nan
Chong School, malaksid laeng ti Ave Maria Business School ken Macro
Computer School. Dua pay a pagadalan ti sekundaria ti naipasdek a
pagbasaan dagiti agindeg iti akindaya ken akinlaud a barbarangay iti
siudad tapno saandan a mapan pay iti poblasion.

Ngem maysa a naipangruna a sirmata
dagiti agtuturay ditoy nga indauluan ni Mayor Eva Marie S. Medina ti
pannakaisubli ti kinasiudad ti Vigan. Babaen ti maysa a resolusion
nga impasa ti Sangguniang Panlungsod ken iti panangesponsor ni
Diputado ti First District (idi) Salacnib Baterina iti gakat iti
Kamara, ken iti kaaspingna a gakat iti Senado babaen ken ni Sen.
Aquilino Pimentel, naanamongan ti panagbalin ti Vigan a maysa a
component city.

Babaen ti aglaplapusanan a butos
dagiti agnaed, naratipikar nga agbalin a siudad ti Vigan idi Enero
22, 2001.

Ar-aramiden dagiti turayen ti
Vigan amin a kabaelanda iti panagbalinna a narang-ay a siudad a di
maisakripisio ti ladawanna a “siudad iti daan a lubong”. Makita a
dida napaay gapu iti agtultuloy a pannakapreserba dagiti daan a
pagtaengan ken pasdek nga adda dakkel a pakainaiganna iti nadaeg a
pakasaritaan ti pagilian.

Gapu iti daytoy, inlista ti UNESCO
ti Vigan a kas maysa kadagiti heritage cities iti sangalubongan. Kas
maysa a tawid ti sangalubongan, pagrebbengan ti komunidad dagiti
nasion a preserbaen, taginayonen, salimetmetan ken protektaran daytoy
a siudad uray iti panawen ti gubat.

Pammaneknek pay ti panagballigi
daytoy a programa ti turay ti yaadu dagiti turista a sumarungkar iti
Vigan aglalo iti piesta ti konbersion ni San Pablo, Semana Santa ken
Tres de Mayo ken iti selebrasion ti solidaridad dagiti heritage
cities iti lubong.

Iti bulan ti Enero, malaksid ti
panangrambak iti panagsiudad ti Vigan, maselebraran pay ti konbersion
ni San Pablo, patron ti siudad, iti kinakatoliko. Iti pannakarambak
iti Semana Santa, rinibribu a sangaili ken turista ti agdudupudop iti
siudad tapno ditoyda a pabaruen ti pammatida kas katoliko. Iti umuna
a lawas ti bulan ti Mayo ti pannakarambak ti Viva Vigan Festival of
the Arts. Malaksid iti trade fair, kangrunaan a tampok ti parambak ti
Binatbatan Festival a pakaitanduduan ti produkto nga abel. Iti met
Setiembre 7 ti pannakarambak ti Heritage Cities Solidarity Day.
Malaksid kadagiti nadumaduma nga aktibidad, kangrunaan nga araken
dagiti tattao ti Repazzo de Vigan a pakabuyaan dagiti nadumaduma a
panawen a nagdalanan ti siudad, manipud idi tiempo ti Kastila, ti
idadateng dagiti Amerikano, ti pannakasakup ti Vigan kadagiti Hapon,
ti panagraira dagiti sakasaka, ti pannakaipasngay ti R.A. 7171, ti
panagbalinna a siudad ken dadduma pay a nagluposan ti siudad babaen
ti panangidaulo dagiti agtuturay.

Saan a malibak nga umad-adu dagiti
turista nga agpa-Vigan aglalo iti pannakaipasdek ti Vigan Heritage
Village. Babaen daytoy a proyekto, matarimaan ti sigud a kalalanga
dagiti napili a pagtaengan ken pasdek idi tawen 1850 agingga iti
1900.#