SALAYSAY: Yunnatmo dagiti Imam (Umuna a paset)

No dagiti laeng agayat kadakayo ti ayatenyo, adda aya magunggonayo? Uray dagiti managbasol, ayatenda met dagiti agayat kadakuada. Ket no dagiti laeng mangipaay kadakayo iti imbag ti ipaayanyo iti imbag, adda aya magunggonayo? Uray dagiti managbasol, kasta met ti aramidda! No dagiti laeng ammoyo a mangisublinto kadagiti bulodenda kadakayo ti pabulodanyo, adda aya magunggonayo? Uray dagiti managbasol, pabulodanda dagiti managbasol ta namnamaenda a maisubli met laeng ti impabulodda.  Saan a kasta ti aramidenyo! Ayatenyo ketdi dagiti kabusoryo ket ipaayanyo ida iti imbag. Agpabulodkayo, ngem diyo namnamaen a masupapakankayo. No aramidenyo dagitoy, dakkelto ti gunggonayo ket annakkayto ti Kangatuan a Dios. Ta naasi ti Dios kadagiti di makaammo nga agyaman ken kadagiti managdakdakes. Masapul a manangaasikayo a kas ken ni Amayo a manangaasi.

Dagita dagiti nababagas a binatog iti Biblia nga inadawtayo manipud iti Lucas 6:32-36 nga intay ikkan iti biag!

“Umutangka iti kuarta, kunam, Saling?”

“Kasta koma, Tata Braulio. Agsakit ngamin ti buridekmi iti pneumonia ket kasapulanmi ti dakkel a gatad nga igatangmi iti agas ken pagbayadmi iti ospital. Pangaasiyo, Tata Braulio, tulongandakam’ koma. Awanen ti ammomi nga asitgan.”

“No adda la ketdi ikolateralmo, mayatak nga agpautang! Nasken nga anakam met, a!”

“T-tata Braulio…”

“No saanmo a kayat, mabalinmon ti pumanaw, adu ti aramidek. Diak kayat iti masinga, nalawag? Isu nga ibagamon no adda ikolateralmo.”

“K-kasapulan kadi pay dayta, tata?”

“Natural! Ammok aya no saanka a makabayad? Ania ti pangigawidak iti kuartak, aber?”

Saan a nakatimek ni aburido a Saling. Makasangsangiten. Saannan nga ammo ti aramidenna. Dina met ngarud ammo no asino koma pay ti asitganna, malaksid ken ni Tata Braulio a kabaknangan iti San Pascual.

“Adda titulo ti dagayo?”

“Awan, tata, makitaltalonkami laeng.”

“No awan dagayo, uray dokumento ti nuang, mabalin! Inka alaenen ti dokumento ta itedmon kaniak sakbay nga ikkanka iti kuarta!”

Nangngeg ni Nana Toniang dagita nga insawang ni Tata Braulio ken ni Saling. Apaman a nakapanaw ni Saling, kinasarita ni Nana Toniang ti lakayna tapno palagipanna iti naimbag nga aramid.

“Masakit ti anak ni Saling, lakay, apay a kasdiay pay laeng ti inaramidmo? Saan a manakem nga aramid dayta.”

“Toniang, addaka manen dita a kunak. Dika ketdi maragsakan iti ar-aramidek ta ammok nga ipataray ken kumita ti kuartak!”

“Ngem kaasi met daydiay tao. Nangruna la unay ti anakna a masakit. Adda pay idiay ospital. Dika la maasianen?”

“Maasian? Maasian…?” naggarakgak ti lakay.

“Masakit la ngaruden ti anakna, nayonam pay laeng ti dagensenna? Umno kadi dayta nga aramidmo? Panunotem man.”

“Ayna, Toniang, namin-anon nga imbagak kenka a saanka a makibiang iti ar-aramidek! Nasaysayaat no kastoy ti pangitapoganta iti kuartata tapno umadu pay!”

“ Ania koma ti rason nga agpaaduka iti kuartam…?”

“Ha? Kayatmo a sawen, Toniang, saanka  maragsakan iti sagsagrapem a kinanam-ay?”

“Wen! Uray nagadu ti pirakmo no dimo ammo ti tumulong kadagiti agkasapulan iti tulong, awan serbina dagita a kinabaknangmo. Saanmo a maitugot dagita no matayka…”

“Ket no dagitanto met pataypatay ti pampanunotem!”

“Saan a ti kinaadu ti kuartam wenno sanikuam ti pagibasaran iti kinabaknang ti maysa a tao no di ket adda daytoy iti panunotna ken iti aramidna…”

Ngem saan a dimngeg ni Tata Braulio. No ania ti linaon ti panunotna, dayta ti mapaturay.

Nagsubli ni Saling nga awitna ti dokumento ti nuang a pagtaltalon ni lakayna. Dagus a pinautangan ni
Tata Braulio.  Intudingna ti aldaw a panagbayad ni Saling iti inutangna agraman iti interes. Kinunana pay a no di makabayad ni Saling iti naituding nga aldaw, guyodenna ti nuang.

Kanayon a bagbagaan ni Nana Toniang ti asawana. No dadduma, umanayen dayta a pagsubanganda.

Naminsan,  kinasarita manen ni Nana Toniang ni Tata Braulio.

“Awan kadin ti nabatbati nga asim iti padam a tao, Braulio? Ania kadi aya ti linaon dayta pusom ta dika man la denggen ti pakaasida?”

“Kaasi?” Ti kunam, saanko inautangak?  Intedko ti kasapulanda, ania pay la ti maibagam, dugang a bakbaketan? Mabusorak man iti ar-aramidem! Dayta la sao a sao ti ammom!”

(Adda tuloyna)