Saleslady, ginandatna puoran pagtagilakuan

TAGUDIN, Ilocos Sur – Pinuoran ti maysa a saleslady dagiti tagilako a bag iti stall a banbantayanna sadiay Tagudin Yellow Market idi Pebrero 9, daytoy a tawen. Daytoy ti impulong ni Victoria Andrada y Almazan, 70, awanan asawa, ken makinkukua iti Tasem General Merchandise iti Tagudin, Ilocos Sur kadagiti kameng ti Tagudin Police.

Segun it salaysay ni Andrada, natiliw ti CCTV ti merkado ni Raquel Leal y Alperez, 43, naasawaan, saleslady iti nasao a pagtagilakuan, ken residente iti Brgy Farola, Tagudin, Ilocos Sur, a nanggangat iti papel usarna ti lighter sana imparabaw kadagiti lakoda a bag, santo dardaras a rimuar iti pagtagilakuan.

Maysa a tricycle driver ti nakakita iti asuk manipud iti nasao a pagtagilakuan. Immarayat dagiti aglaklako iti kaarruba a pagtagilakuan ket naliklikan ti panagramaram ti apoy.

Kalpasan ti insidente, napan ni Andrada iti opisina ti merkado tapno sukisoken ti CCTV footage ket ditan a naduktalanda ti inaramid ti saleslady-na. Aggarup Php 4,800 ti gatat ti nauram a bag.

Addan ni Leal iti ikot ti Tagudin PS para iti naan-anay nga inbestigasion. (Tawid News Team)