Salsaludsod makatawen kalpasan panagtakem ni Pres. Benigno Aquino III (Maudi a paset)

Saan kanon a makinginnernger ni Pnoy ken ni Rep. GMA. Napintas la unay. Ta awan ti banagen wenno maala iti uray ania a kita ti pannakiapa aglalo no maysaka a public official. Ipamaysa ketdi ti panagserbi. Saan a paapekto kadagiti kritisismo. Malagip nga itay nabiit, nagpinniltakda ken ni GMA nga itan ket maysa a kongresista.

Agkurkurangtayo iti bagas. Iti napalabas a tawen, nagangkat ti administrasion iti agdua million a metriko a tonelada idinto a 1.3 million metriko tonelada laeng ti makuna a pagkamtudan ti suplay. Nadadaelantayo la ketdi iti bagas kadagiti bodega ti NFA. Ta apay la ngaminen a kasta kaadu ti inangkattayo a bagas? Dakkel ti kita dita, adda agkuna. Ngata? Asino ngarud dagiti nairanud?

Ngem impannakkel ni Pnoy nga iti umuna a tawen laeng a panagserbina kadatayo, naibabana ti panagkurkurangtayo iti bagas iti 600,000 metriko tonelada. Maipuon daytoy kadagiti farm-to-market roads nga insayangkatna, dagiti irigasion ken agtultuloy a panagadal tapno mapasayaat pay ti produksiontayo iti bagas. Wen met ngamin. Ta di kadi ditoy pagiliantayo ti nagadalan, pagad-adalan dagiti kaarrubatayo a pagilian para iti pannakapabaknang ti/dagiti dagdagada?

Makabang-ar man ti kuna ni Pnoy nga inton tawen 2013 supisienten ti suplaytayo iti bagas. Saan met ketdi nga adayo a magun-odan daytoy basta ipapuso dagiti opisialtayo ti trabahoda. Malagip nga idi panawen daydi Pres. Marcos, nagun-odan ti pagiliantayo ti kinasupisiente ti suplay gapu kadaydi programana a Masagana ’99. No nagtultuloy koma daydi, saan nga adayo nga ageks-eksporttayo itan iti bagas. Adu koma metten a mannalon ti nakaalut-ot iti rigat. Ken adu koma metten nga annak ti nakaaon iti pitak. Ti nasakit a kinapudno, ti pitak a kagubgubal dagiti nagannak kadakuada, isu pay laeng ti pitak a kagubgubalda agingga ita.

Saan a mailibak nga iti tunggal mensahe ni Pnoy, adda dita ti panangsukitna iti rikna/karirikna ti naglabas nga administrasion. Daytoy koma ti liklikan ti Pangulo ta awan pagbambanagan ti pagilian no pinniltak lattan ti mapaspasamak. Igaedna ketdi ti mangkita kadagiti pormula a pagimbagan ti kaaduan.

Iti   umuna a tawen ni Pnoy, makuna a pasado pay laeng. Nupay kasano kadagsen dagiti kunkunana a “tinawidna” a parikut, saan a nagkitakit a nangsolusion, mangsolsolusion kadagitoy. Kas met laeng kunaen dagiti political analyst, ti umuna a tawen a panagserbi a kas Pangulo ti kalalag-anan. Namnamaen ketdi ti idadagsen daytoy iti isasangbay dagiti sumarsaruno a tawen.

Ngarud, rumbeng ti pannakikaysatayo tapno naannayas latta ti pannakaipataray ti pagiliantayo. Saantayo laeng nga agpannuray iti maaramidan ti gobiernotayo. Makibadangtayo. Ta maymaysa laeng daytoy pagiliantayo. Agkaykaysatayo ketdi tapno maragpattayo daytoy ikarkari ti Pangulo a Nalinteg a Dana a saan ket a dayta lattan mangkitkita iti mabalin a pangumsiantayo kenkuana.#