Salsaludsod makatawen kalpasan panagtakem ni Pres. Benigno Aquino III

KOMENTARIO NI JOBERT M. PACNIS

NO panagasawa koma, umuna nga anibersario ti kallaysa ni Presidente Benigno Aquino III ken ti pagiliantayo itay Hunio 30. Ket mabalin a masaludsod no ania ti naaramidanna a kas amatayo a Pilipino. Maipalagip nga idi katugtugawna iti Malakaniang, adu dagiti inkarkarina a pagimbagan ti sapasap. Kinunana pay a datayo ti “bossna” banag a nangpatibker iti pammatitayo nga awan ti sabali nga adiendana no di ti mangtungpal iti pagayatantayo nga umili ken mangipaay kadagiti maitutop a kasapulantayo a naragsak, nasalun-at ken nabaludbod a panagbiag.

Ngem kalpasan ti makatawen, ania dagiti nagbalbaliwan ti panagbiagtayo? Adda ngata met laeng natungpal ti pannakaamatayo kadagiti inkarkarina?

Nakaay-ayat man a rekado ti isasango kadatayo ni Presidente Aquino ti panangi-turn over ti PAGCOR ti P1 bilion iti Departamento ti Edukasion babaen ken ni Sek. Armin Luistro para iti pannakaipatakder ti agarup agsangaribu a classroom tapno masolusionan ti pagkurangantayo itoy.

Napintas dayta a damag. Uray kaskasano, saan met laeng a makuna a nabaybay-an ti sistema ti edukasion. Makuna nga adda met laeng iti prioridad ti Pangulo.

Ngem kinontra ketdi daytoy dagiti militante a grupo. Segun kadakuada, nabaybay-anen ti edukasion ta napalugodan dagiti unibersidad ken kolehio a nagingato iti tuition fee-da kadaytoy a panagseserrek. Nayon manen a rigat kadagiti nagannak a kakaasi la ngaruden nga agpabpabasa, ad-adda pay a maparigat. Inayon ditoyen ti bassit a sueldo dagiti mangmangged nga itay laeng kallabes, naaprobaran ti bariabaria laeng a nayon ti sueldoda.

Rumbeng koma ngarud a kitaen ni Presidente Aquino daytoy a banag. No adu dagiti saan a makapagturpos gapu iti kinangina ti tuition fee, pagturongan dagiti saan a makapagbasa? Dagiti ag-drop iti katengngaan ti panagadalda? Umadu dagiti out of school youth a mabalin pay a pagtaudan ti naun-uneg a parikut ti pagilian.

No arisiten a naimbag ti mensahe ti Pangulo, agturongen ti pagiliantayo iti Nalinteg a Dalan. Ar-aramiden kano ti administrasionna dagiti addang tapno masolusionan dagitoy “natawidna” a parikut. Umuna ditan ti limmobo nga utang ti NFA (National Food Authority) iti agmaysa dekada a panagturay ti kalkalpas nga administrasion. Daydi P12.9 bilion nga utang daytoy nga ahensia iti uneg ti tawen 1972-2000, immaboten iti P176.8B iti panawen ni dati a Presidente GMA.

Dakkel daytoy nga utang. Ngem di nga imposible a mabayadan dagitoy no napudno dagiti agtuturay. Sabagay, numero uno a pakaidayawan ni Presidente Aquino ti nasaknap a kampaniana kadagiti korap nga opisial. Agtultuloy koma ngarud daytoy tapno madalusan ti sibubukel a sistema. Saan koma a yaleng-aleng ti programa iti korupsion.

(Adda tuloyna)