Salt, maisayangkat iti Candon watershed area

CANDON CITY –  Kinuyog ni Mayor Allen Singson dagiti propesor ti Don Mariano Marcos Memorial State University-Bacnotan itay nabiit tapno kitaenda ti nagdur-asan ti maisaysayangkat nga sloping agricultural land technology (SALT) para iti pannakapasayaat ti Candon watershed rehabilitation and development project ditoy.

Babaen daytoy a programa, maagdan-agdan a kas terraces ti turod a paset ti watershed area tapno mamulaan kadagiti nadumaduma a nateng ken kaykayo.

Naipasdek metten ti dua a tangke iti tuktok ti bantay nga agkarga iti danum manipud iti sibibiag a bubon a maaramat a pagsibog kadagiti mulmula iti aglawlaw ti watershed kas iti mangga, Davao pomelo, narra, mahogany, gmelina ken dadduma pay.

Manamnama nga agbungan iti mabiit dagiti naimula a 15,000 a pinia ditoy.#