Tawid News Magazine

Saluadan ti dignidad iti pananggun-ud ti edukasion

ITI PANAGSUBLI ti klase wenno blended learning kalpasan ti sumagmamano a lawas kabayatan ti panawen ti Paskua, sumubli ti nakaro a rigat dagiti estudiante, nagannak ken mangisursuro gapu ti naidumduma nga “stress” iti wagas ti panagadal kabayatan ti pandemia ti Coronavirus disease 2019 a nangapektar ti biag dagiti Pilipino ken dagiti umili iti nagduduma a pagilian iti sangalubongan.

Nagsubli dagiti estudiante, nagannak ken mangisursuro a mangibaklay iti nagpaiduma a tuok ken rigat iti wagas ti panagadal ta saan pay laeng a marugian ti face-to-face learning ta awan pay ti lehitimo a nabakunaan iti Pilipinas kontra Covid-19. Kadagiti masungadto pay laeng a bulan nga addanto maaprobaran a bakuna para ti mass vaccination dagiti Pilipino a mangiturong iti “new normal” a wagas ti panagbiag pakairamanan ti pannakaiwayatton ti “face-to-face learning” kadagiti uneg dagiti classroom iti pagadalan.

Kabayatan ti panagur-uray ti panagsubli dagiti estudiante kadagiti pagadalan, anusanda dagiti nagannak wenno kapamilia ken dagiti mangisursuro ti narigat ken nagastos a “blended learning” tapno saan a masayang ti makatawen a pannakabakante dagiti agad-adal kabayatan ti kangitingit ti Covid-19 pandemic.

Napateg unay ti edeukasion kadagiti Pilipino ta daytoy ti tulbek ti panagdur-as ti panagbiag ken mangipaay iti dayaw dagiti makaturpos iti nangato nga adal agraman dagiti pamiliada. Dayta ti gapu a dagiti nagannak a makaamiris iti kinapateg ti edukasion ket ikagumaanda nga isakad ti panagadal dagiti annakda ta dayta ti kapatgan a maisagut ken maipatawidda kadagiti annakda nga agnanayon. Nagasat dagiti estudiante a nagtaud kadagiti pamilia a nasayaat ti kasasasaadda iti panagbiag, wenno dagiti addaan kadagiti nagannak a kabaelanda ti agsakripisio ken agpakarigat para kadagiti annakda tapno maisakadda ti panagadalda. 

Adu dagiti estudiante a saan a kabaelan nga isakad dagiti nagannak ti panagadalda gapu iti rigat ket ikagumaanda met ti makabasa para iti naranraniag a masakbayanda. Adu dagiti nagballigin a working students ken scholars a nakaturpos iti panagadalda ken naaddaan iti nasayaat a pagsapulan ken nadur-as a panagbiag.

Dayta ti gapu nga adu dagiti estudiante a narigat ti kasasaadda iti panagbiag a nakasagana a mangaramid amin a pamuspusan tapno maisakadda ti pangadalda uray ita a panawen ti pandemia a nagastos ti panagadal gapu iti blended learning. Nagdagsen a panunoten dagiti report nga adu dagiti estudiante a mangisukat wenno mangilako ti dayawda tapno adda igatangda kadagiti usarenda a laptop, cellphone ken dadduma pay a gadget, ken para ti internet connection tapno makasurotda iti online learning a paset ti blended learning nga ipakpakat ti Department of Education para kadagiti grade school students, ken ti Commission on Higher Education para iti kolehio ken graduate studies.

Naipadamag ti panagraira dagiti “online sites” ken grupo iti social media nga ayan dagiti estudiante a mangilaklako kadagiti lamolamo a ladawanda. Sabali pay dagiti maipadpadamag a “virtual sex” wenno mangusar ti internet para ti prostitusion. Sabali pay dagiti addaan ti “sexual scholarship” ken dagiti kadawyan a wagas ti prostitusion.

Mabalin a para kadagiti dadduma nga umili ket narabaw dayta a rason a pangisukat ti dignidad ti maysa nga estudiante. Ngem saa a rumbeng a husgaran wenno kedngan ida ta saan nga agpapada ti kananakem ken kasasaad ti panagbiag.

Maibasar iti panagadal, kimmaro ti “online prostitution” ita a panawen ti pandemia gapu iti kinarigat ti panagbiag ken limitado ti garaw dagiti tattao. Babaen ti online, maisayangkat dagiti transaksion ken virtual sex, kasukat ti kuarta. Nagkas-ang ta maipadpadamag nga adu dagiti estudiante a teen-agers dagiti mainanaig iti kastoy a wagas ti pagsapulan. Isukatda ti dignidadda iti kuarta para kadagiti kasapulanda iti panagbasada ken kapritsoda iti panagbiag. Napeggad dayta nga ar-aramiden dagitoy nga agtutubo ta babaen ti seksual a pannakainaigda ken mabalinda a makaala iti sexually transmited diseases pakairamanan ti makapatay ken awan ti agasna a Human Immunodefficiency Virus a gapu ti acquired immunodeficiency syndrome. Iti panaglakoda met kadagiti labus a ladawan dagiti agtutubo ket possible nga agnanayonto dayta a mantia ti panagbiagda a mangapektonto ti masakbayanda nangruna ti bangonendanto a bukodda a pamilia.

Nagadu dagiti dakes a pinarnuay ti Covid-19 iti benneg ti salun-at, ekonomia ken edukasion. Idi sakbay ti Hunio 2019 a kadawyan a panaglukat ti school year ket impetteng ni Presidente Rodrigo Duterte a kaykayatna nga uray awan ti agklase kabayatan ti pandemia. Ngem naallukoy isuna ti academe nangruna ken ni Education Secretary Leonore Briones a maituloy ti school year a saan a maikompromiso ti salun-at dagiti estudiante ken mangisursuro babaen ti blended learning a buklen ti online, modular ken media. Nakasigsigurado idi dagiti pammatalged ti DepEd ken CHED, ngem mapaneknekanen a saan nga epektibo dagiti impampanakkelda a blended learning.

Naindaklan a paggastosan dagiti estudiante ken nagannak iti igatangda kadagiti gadget ken para ti load ti internet connection a nagbuntog ken masansan nga agpukawpukaw. Nagadu met a pondo ti gasgastosen ti gobierno iti panagisagana ken pannakaidanon dagiti modules kadagiti estudiante, ngem saan met a mismo a dagiti agad-adal dagiti pudno nga agsungbat kadagiti learning kits. Nakasaysayang met ti dakkel a pondo a mausar iti pannakaisagana dagiti education programs iti telebision, radio ken social media ta limitado met nga estudiante dagiti intresado ken addaan iti access-na. Adu dagiti problema iti agdama a wagas ti panagadal kabayatan ti pandemia, ngem amin dagitoy ket nasken nga ibaklay dagiti estudiante, nagannak ken mangisursuro. Agdanggay koma ti gobierno ken pribado a sektor nangruna dagiti adda iti benneg ti Simbaan a ti pannakagun-od ti edukasion ket saan nga umadu ti prostitusion tapno masaluadan ti dignidad ken salun-at dagiti estudiante.

Exit mobile version