Saluadan ti industria ti tabako a birhinia tapno agtultuloy ti progreso – R.A. 7171 Principal Author

VIGAN CITY — Nasken ti panangsaluad ti industria ti tabako a birhinia tapno agtultuloy ti panagprogreso nga ipapaay dagiti adu a pondo manipud iti Republic Act 7171 babaen ti panagtitinnulong dagiti mannalon, negosiante ken opisial ti gobierno.

Dayta ti inyetnag a kapanunotan ni Philippine Councilors’ League National President ken Narvacan Sanguniang Bayan Member Luis “Chavit” Singson kadagiti kameng ti Ilocos Sur Integrated Press iti naangay a Kapihan iti Amianan Media Forum.

Inaklon ni SBM Singson a pangta iti industria ti tabako ti agtultuloy a kampania iti intero a lubong kontra panagsigarilio gapu iti dakes nga epektona iti salun-at, ken ti awan-sarday a pannakaingato ti “sin tax” iti sigarilio.

Inlawlawagna a kas Principal Author ti Republic Act 7171 Fund a pagtataudan ti Tobacco Excise Tax Fund manipud pay idi   1992 a nangipaayen ti billion a pondo kadagiti probinsia nga agmulmula iti tabako a birhinia, ket kinanunonganna dagiti nagkauna a pannakaingato iti “sin tax” dagiti sigarilio, ngem no manayonan manen ti buis dagiti sigarilio ket ad-adda pay a mangpangina ti presio a narigaten a magteng dagiti Pilipino.

Impaganetgetna a no ngumato pay ti buis ken presio ti sigarilio iti Pilipinas ket kayariganna ti panangpatay ti ganso nga agit-itlog ti balitok. Inlawlawagna nga addan dagiti dadakkel a kompania ti tabako dagiti nagkaykaysa wenno nagtipon, ken adda metten dagiti in-inut a nagserra a mangipakita ti panagrigat ti industria. Impakaammona nga iti mabiit ket maysa a brand ti sigarilio ti aramiden ti kompaniana a mailako iti Pilipinas iti P60 ti kada kaha, ken mailako sadiay ballasiw-taaw iti $4 tunggal kaha kas gannuat a mangparegta ti industria ti tabako.

Inrakurakna a nasken nga usaren koma a nasayaat dagiti lokal a gobierno ti R.A. 7171 fund para ti sapasap a panagprogreso nangruna iti Ilocos Sur nga umaw-awat ti kadakkelan a bingay kangrunaanna ti panagtulong kadagiti mannalon ken agmulmula iti tabako a birhinia.

Impalgakna nga inkeddengna ti agkandidato a para mayor sadiay Narvacan tapno mabantayanna ti pannakaipakat dagiti pondo ti lokal a gobierno nangruna ti R.A. 7171 Fund. Impasingkedna a maulitda manen ken ni Atty. Pablito Sanidad, katiketna a para bise mayor ti Bileg Party ti panagballigi ti panagkaduada idi 1971 idi nangabak isuna kas gobernador ti Ilocos Sur, ken bise gobernador met ni Sanidad.

Makabalubal da SBM Singson ken Atty. Sanidad da sigud a Narvacan Mayor Edgardo Zaragoza, ken Vice Mayor Fayinna Pilar Zaragoza Delgado ti PDP Laban. 

Impatalged pay ni SBM Singson a nasayaat ti salun-atna. Impakaammona a tapno mapaneknekan dagiti umili no sino kaniada ken ni Ex Mayor Zaragoza a para mayor ti nasalsalun-at ket maangay ti “Unity Walk” a pakakitaan ti kinakired ti panagpagna iti bigat ti Marso 25, 2019 manipud iti sango ti Municipal Hall ken agrikus kadagiti kalsada iti sentro ti Narvacan. Iti isyu ti panagbalubal iti kina-kongresista iti Umuna a Distrito da incumbent Congressman Deogracias Victor “DV” Savellano ken former Representative Ronald Singson, ket impasingkedna nga awan ti suportaranna kadakuada, ken agtalinaed isuna nga agtengtengnga. Inlawlawagna nga addan kadagiti mayor ken lokal nga opisial ti ikampaniada kadagiti dua a kandidato a para kongresista ta anakna ti sigud a congressman ken abalayanna met ti agdama a kongresista