LINAGIP ken pinadayawan dagiti Pilipino idi “Araw ng Kagitingan” dagiti maingel a bannuar a nangidaton ti biag ken panawenda a nakiranget idi Maikadua a Gubat iti Sangalubongan tapno magun-od ti wayawaya ti Pilipinas kadagiti nangsakup a ganggannaet.
Iti agdama a panawen, iti sango ti kadagsenan a krisis iti lubong kalpasan ti World War II, rimsua ti nakabutbuteng a gubat kontra iti saan a makita a kabusor a ginubuay ti pandemia ti Coronavirus Disease 2019 a nangapektaren iti minilion a tattao ken nangkettelen iti nagadun a biag, ken nangdaleb iti ekonomia dagiti adu a pagilian.
Ditoy Pilipinas, kas kadagiti dadduma a pagilian, Iti gubat kontra iti daytoy nakabutbuteng ken saan a makita a kabusor ket pinarnuayna dagiti baro a maingel ken bannuar iti ranget kontra Covid-19 – dagiti health workers a pakaibilangan dagiti doktor, nurses ken amin a makikaykaysa iti pannakasaluad ti salun-at. Adu kadakuada a gapu iti panangipategda iti propersionda a mangsalbar ti biag ken maagasan dagiti masakit ket ipuspustada ti biag ken salun-atda.
Adun a health workers dagiti naakaran ken natay gapu iti Covid-19. Kaaduanna ket naakaranda iti virus gapu iti panangakemda kadagiti annongenda nangruna ti panangtamingda kadagiti pasiente.
Iti laksid ti saan a magatadan a sakripisio dagiti medical frontliners kontra Covid-19, adu nga umili iti saan a makabigbig dayta natan-ok nga akem dagitoy a health workers. Imbes a pagyamanan ken ikararaganda ida ket aglaklak-amda pay iti nakaro a deskriminasion ta kaalumiim ida dagiti dadduma ket saanda a kayat a makaasideg wenno makadenna. Nasakit nga awaten para kadagiti health workers a kadurmen ida dagiti dadduma a tattao kabayatan nga agserserbida tapno makaispalda iti biag.
Nasaksakit manen kadagiti inosente a health workers a sapasap a maakusaranda nga agserserbi kadagiti ospital ken pagagasan a pangukuartaanda dagiti pasiente ti Covid-19. Kayariganna dayta a maradradan iti asin ti agdardara a sugatda gapu ta ar-aramidenda aminen a kabaelanda iti laksid ti peggad, kinakurang kadagiti personal protective equipments, sueldo ken benepisio, ken suporta ti gobierno ket pannakaumsi ken pannakapadpadakes pay laeng ti lak-amenda.
Adu kadagiti kapamilia dagiti health workers a naapektaran ken natay gapu ti Covid-19 dagiti agrekreklamo iti kinabayag a pannakaproseso dagiti naituding a benepisio ken pribelehioda. Saan met a mailibak ti kinababa ti sueldo ken benepisio dagiti government health workers no maidilig kadagiti polis, soldado ken unipormado ken dadduma pay nga agserserbi iti gobierno. Ad-addan a nababbaba iti sueldo ken benepisio dagiti health workers nga agpapaay kadagiti pribado nga ospital.
No kabaelan ti gobierno nga ikkan ti nagngato a sueldo ken benepisio dagiti agserserbi kadagiti saan unay a narisgo a trabaho, apay koma a saan a maipada dagiti medical frontliners kontra Covid-19? No maikkan iti rinibu a clothing allowances dagiti mangisursuro iti gobierno uray awan ti face-to-face classes, apay a saan a makompleto ti PPE dagiti health workers? No agtultuloy ti pannakaarado ken pannakasukat dagiti napintas pay a pasdek ken imprastraktura, apay a saan a maikkan dagiti medical frontliners iti natalged a pagyanan iti asideg dagiti pagpaayanda nga ospital?
No agtultuloy ti dakes a pannakatrato ti gobierno ken dagiti umili kadagiti Covid-19 medical frontliners, ken umad-adu latta dagiti baro a kaso, nakaam-amakto ti pagbanagan ti Pilipinas.
Iti itatayok ti bilang dagiti kaso ti Covid-19 iti nagduduma a paset ti Pilipinas nangruna sadiay National Capital Region ken kabangibangna a probinsia ket nagadun dagiti health workers a naapektaran ken nagsakit iti virus. Napunpunno metten dagiti ospital kadagiti pasiente iti Covid-19.
Impaatiddogen ni Presidente Rodrigo Duterte ti enhanced community quarantine iti NCR Plus Bubble tapno mapababa dagiti kaso ti Covid-19 ken ma-decongest dagiti ospital ken makainana dagiti medical frontliners.
Segun iti report ti Department of Health, uray dagiti ospital sadiay Cordillera Administrative Region ken Cagayan Valley Region ket nadanondan ti maximum capacity dagiti pasiente gapu ti kaadu dagiti agpospositibo iti Covid-19 iti inaldaw.
Iti Ilocos Sur, manipud idi naideklarar ti pandemia ket nagbalin a low-risk area ngem kellaat ti itatayok dagiti kaso ti Covid-19 idi napalukayan ti iseserrek dagiti aggaou iti sabali a lugar. Mapunpunnon agiti government hospitals kadagiti pasiente ti Covid-19.
Timmayok dagiti kaso ti Covid-19 gapu kadagiti baro a klase a nalaklaka a makaakar nangruna ti United Kingdom Variant. Adu met dagiti nasukir nga umili a saan a sumursurot kadagiti health and quarantine protocols. Saan a maaklon ti gobierno nga uray dagiti natudingan nga ahensia a manglapped ti panagraira ti Covid-19 ket adu dagiti nagkurangan ken nagbiddutanda.
Saanen a nakaskasdaaw ti itatayok manen dagiti kaso ti Covid 19 iti Pilipinas ta uray kadagiti dadduma a nabaknang a pagilian kas ti Estados Unidos ket saanda a naan-anay a nakontrol ti panagraira ti virus. Ti pagsayaatanna kadagiti babaknang a pagilian ket naan-anay ti suporta ti gobiernoda kadagiti health workers ken ospital. Saanda pay a problema ti bakuna.
Saan a kas iti Pilipinas a mabaybay-anen dagiti health workers ket agkurkurangen dagiti ospital. Problema pay ti limitado a bakuna ken kaadu dagiti mabuteng ken saanna a kayat ti agpabakuna. Iti agtultuloy a pannakiranget dagiti Pilipino kontra pandemia. Kasapulan ti naan-anay a panangsuporta ken panangsaludo ti gobierno ken pribado a tattao kadagiti health workers kas maingel a bannuar iti gubat kontra Covid-19.