Same sex marriage: moral wenno immoral?

Sinurat ni Danny Antalan

Adda ti pagsasao a saan amin a naikalintegan ket moral ken saan amin nga immoral ket saan a nainkalintegan. Ta adda dagiti nalinteg nga agtaltalinaed nga immoral iti panirigan ti maysa a sektor wenno indibidual. Nupay kasta, mabalin met a ti immoral nga adda iti linteg ti agbanag nga adda iti moralidad… ngem bayat iti panaglabas ti panawen.

Itay nabiit, dagiti umili ti Ireland (a yan dagiti nagkaadu a Filipino a mangmangged ken migrante) ti nangbutos no umannugotda kadi ken maipalubos ti panagkasar ti agpada a lalaki iti lalaki; babai iti babai?

Nagsao dagiti Irish. Saanda a kayat a ti la lalaki ken babain ti agkasar. Naglaplapusanan ti immanamong iti panagkasar ti agpada a lalaki ken agpada a babai. Agasem, 62 a porsiento ti mayat.

Ket wen, kayatna sawen, dagiti bakla ti addaan karbengan a maikasar iti ay-ayatenna a lalaki; kasta met ti tomboy a maikasar iti babai. Wen, kasla ken ni Elton John ken ni David Furnish; ken ni Aiza Seguerra ken ni Liza Dino a baketna ken dadduma pay.

Maysa a napeklan met a Kristiano ken kaadduanna ti Katoliko iti pagilian ti Ireland. Daytoy a pagilian ti kaunaan a lugar a nangisayangkat ti plebisito no anamongan dagiti umilina wenno ibasurada ti linteg a mapalubosan ti panagkasar ti lalaki iti lalaki ken iti babai iti babai. Aglaplapusanan ti resulta a mabalin nga agkasar ti bakla iti boyfriendna ken ti tomboy iti girlfriendna. Maysan a karbengan a suroten ti gobiernona, nupay ammok nga agkedked pay laeng ti simbaan iti panangkasar kadakuada. Kinapudnona, uray la impalgak ni Cardinal Pietro Parolin ti Vatican a daytoy ket “defeat of humanity.”

Ngem balligi daytoy iti biang ti LGBT community wenno Lesbian (tomboy), Gay (bakla), Bisexual (silahis) ken Transgender. Balligi iti karbenganda a makidenna nga addaan iti papel kadagiti ay-ayatenda. Karbengan a maaddaanda iti testamento a di ket agdendenna nga awan ti kasar. Kas maysa nga anak ti nasion, ragsakda nga adda met daytoy nga arapaapda.

Sakbay itoy a panagbubutos, addan dagiti pagilian a nangipasa iti linteg tapno mapalubosan ti kastoy met laeng a klase ti panagasawa. Dagiti pagilian a pakairamanan ti Netherlands, Belgium, South Africa, Sweden, Portugal, Iceland, Argentina, Denmark, Brazil, France, Uruguay, New Zealand, England and Wales ken Luxemberg. Kabayatanna, iti United States, adun dagiti estado ti addaan linteg a mabalinen ti agkasar ti agpada a lalaki ken babai.

Adu pay ti sumarsaruno. Ditayo la ammo, amangan no nakalinia metten ti Pilipinas nga umarakop itoy a wagas.

Ngem nupay dagiti pagilian a maannamongan ti kastoy a kasar ket dagiti pagilian a yan ti kaadduanna ket Kristiano. Ngem ti simbaan met laeng (nangruna ti Romano Katoliko) ti kangrunaan a mangtubtubngar itoy a kasasaad. Ibilang latta ti simbaan a di mayannurot iti adal ti Kristianismo ti panagkasar ti agpada a lalaki ken babai. Saan latta a mabalin a maaklon ti simbaan ta ibilangda latta a daytoy ket maysa a dakkel a basol.

(Adda tuloyna)