Sangadyip a naputed a tarikayo, nasamsam

CANDON CITY – Sangadyip a naputed a tarikayo ti sinamsam dagiti polis kalpasan nga awan ti naipakita ti drayber a dokumento iti pannakapukan ken pannakaibiaheda idi malem ti Hunio 16.

Segun iti report, naikarga dagiti illegal a tarikayo iti maysa a galvanized jitney a nairehistro iti nagan ni Perlita Echalar ti Barangay Ubbog, Santiago, Ilocos Sur idinto a nainagan ti drayber a ni Danny Dhin Marquez y Raiz, 39, naasawaan, mannalon, ken residente iti Barangay Al-aludig, Santiago, Ilocos Sur.

Agdagup iti 30 board feet dagiti naputed a kayo ti mahogany ken GMelina a mapattapatta nga agbalor iti P13,158.00.

Idi awan ti maipakita ni Marquez a permit ti pannakapukan ken pannakaibiahe dagiti kayo, impanda dagitoy agraman ti drayber iti police station para iti naan-anay nga inbestigasion.#