STA. CATALINA, Ilocos Sur – Maysa a sangaili ditoy nga ili ti nagreport iti polis a biktima iti pammaltog sadiay Barangay Pangada idi parbangon ti Agosto 22.
Nagreport ni Domingo Cabaloan y Agtarap, edad 47, addaan asawa ken agnaed iti Laoag City, Ilocos Norte, a napaltogan bayat ti yiisbona iti sirok ti mangga iti paraangan ti nagturoganna a balay idi agarup 4:00 ti bigat ti Agosto 22 a nagsagrapanna iti dunor iti dua nga imana ken luppona ken puon ti nakayospitalanna iti Gabriela Silang General Hospital.
Segun iti report, rimmuar ti biktima idi agarup 10:30 ti rabii ti Agosto 21 ket mapapati a napan nakiinom sadiay Barangay IX, Vigan City. Dandanin tengnga ti rabii idi naggawid iti Barangay Pangada ken naturog.
Nakariing ti biktima iti pumarbangon ket napan immisbo ket ditoyen ti mapapati a nakapaltoganna.
Di pay ammo ti kalibre ti paltog a nausar ken no asino ti nangpaltog iti biktima.#
