Sangapamilia, natambang; ama, nagudas

SARRAT, Ilocos Norte – Saanen a nakalasat daytoy barangay kagawad iti pannakagandat ti biagna iti maikadua a gundaway.

Iti panagimbestiga dagiti polis, nagudas ni Carlito Malaqui, kagawad ti Barangay Parang, ditoy nga ili, kalpasan a pinaltogan dagiti armado a tattao bayat ti panagdaliasatda a sangapamilia a nakalugan iti motorsiklo sadiay Barangay Parang.

Nagsagrap ti anakna a ni Irish, 9, iti sugat iti gurongna ket naitaray iti Gov. Roque Ablan, Sr. Memorial Hospital. Saan a naan-ano ti asawana a ni Josephine.

Nakarekobre dagiti inbestigador iti 13 a kapsula a nagtaud iti cal .45 iti crime scene.

Segun iti polis, napaltogan ni Malaqui idi 2009 ngem nakalasat.#