Sangapamilia, natiliw a nagpukan iti kayo iti communal forest

SUGPON, Ilocos Sur – Napintas ti panggep ngem linteg ti linteg ket masapul nga ibaklayda ti maitutop a pannusa.

Daytoy ti leksion ti sangapamilia kalpasan a natiliwda a nagpukan iti kayo iti pay met maiparparit a lugar.

Iti agarup 3:00 ti malem ti Abril 23, nagreport iti polis ni Timoteo Saliw-an y Manabag, 54, naasawaan, caretaker iti Bangar, La Union communal forest ken residente iti Sitio Sawangan, Brgy. Danac, Sugpon, Ilocos Sur nga adda mapaspasamak nga illegal logging iti kabakiran a sakup ti communal forest a masarakan iti Mt. Tambol, Barangay Danac ditoy nga ili.

Inreport ni Saliw-an ti insidente kalpasan a naammuanna manipud ken ni Carlito Capucap y Manang, 33, naasawaan, mannalon ken agnaed iti nasao a barangay a nakitana nga agpukpukan iti kayo da Urbano Taypew, Palesta Bugtong ken Sanny Taypew, agpapada a residente iti Sitio Culliang Tacadang. Kibungan, Benguet iti nasao a communal forest.

Nagturong da Saliw-an, kaduana da Brgy. Kagawad Agusto Baguso, Barangay Tanod Bartolome Sunggay ken Lorenzo Ansong ken Carlito Capucap, residente amin iti Sitio Sawangan, Brgy. Danac, Sugpon, Ilocos Sur iti nadakamat a lugar ket nadanonda ditoy ti asawa ni Urbano Taypew a nainaganan Bening Taypew, ken dagiti annak daytoy a da Raul Taypew ken Jun Taypew agraman dagiti riniritda a lumber manipud iti kayo nga obyen a pakaibilangan ti 8 pedaso a 2x3x21 ken maysa a 2x6x21.

Ngem idi masitar dagiti suspek a naglabsingda iti RA 705, kinuna ni Bening Taypew nga usarenda koma dagiti riniritda a lumber para iti pannakatarimaan ti marmarba a balayda.#