Sangguniang Kabataan, breeding ground ti political dynasties?

Komentario ni Tatang Lakay

(Maikadua a paset)

 

Agduduma ti reaksion dagiti agtuturaytayo iti singasing ti Comelec a saanen a maangay ti eleksion para iti Sangguniang Kabataan kas pakpakauna ti pannakawarana.

Kas kuna ni Comelec Chairman Sixto Brillantes, Jr., agsipud ta napaay daytoy iti missionna a mangiyadal a politikal kadagiti agtutubo.

“Saanen a kasta kaimportantena (SK),” kinuna pay ni Brillantes.

Iti met biang ni Comelec Commissioner Lucenito Tagle, masapul a mawaran ti SK agsipud ta nagbalinen daytoy a “breeding ground” dagiti political dynasties.

Adda pamkuatan ni Tagle a nagkuna iti dayta agsipud ta kapaliiwan a kaaduanna kadagiti agtutubo a napili iti SK ti asideg a bagi dagiti agtuturay iti barangay, iti ili wenno iti probinsia, partikular kas SK chairman, wenno federated president ket nakapagtugawda a kas ex-officio member iti sangguniang panlungsod, sangguniang bayan ken iti sangguniang panlalawigan.

Iti napalabas nga eleksion ti SK, rimsua dagiti alegasion ti pannakaipakat dagiti nadumaduma a “narugit” a wagas tapno mangabak dagiti kandidato dagiti tradisional a politiko kas iti mapapati a panaggatang iti butos, panangipasiar kadagiti botante a suportado kadakuada iti maysa a lugar a daydaywen dagiti turista wenno iti maysa a pagilian iti Asia maysa a lawas sakbay ti eleksion.

“Awan ti makitatayo a napateg a naaramidan ti SK. Adu dagiti kaso a dagiti nagannak ti nakibiang iti panaggatangan iti butos, irregularidad iti SK elections,” kinuna pay ni Tagle idinto a linagidawna ti pannakaisarang dagiti agtutubo iti narugit a politika iti kagangganusanda.

Idi sibibiag pay ni Department of Interior and Local Government Jesse Robredo, nadakamatna a napaliiwna a dagiti naabak iti SK election ket saanda a timmulong iti pannakaipakat dagiti programa dagiti nangabak para iti pannakaitandudo dagiti agtutubo.

Ken ni Robredo, kayarigan ti kastoy a kita ti politika ti tradisional a politika a “saantayo a kayat dagiti agtutubotayo a pakipasetan.”

Maysa a maraem nga abogado no eleksion ti pagsasaritaan, ni Atty. Romulo Macalintal ti nangidagadag a ma-abolish ti SK agsipud ta saanna a natungpal ti panggepna a mangipaay iti panagsanay a politikal kadagiti agtutubo.

Napaliiw ngamin ni Macalintal  a kaadduanna nga annak dagiti politiko dagiti nagkandidato para iti SK nga ad-adda pay a nangpadagsen iti problema ti dinastia ti politika.

Kinapudnona, nasuroken a sangadosena a gakat ti naidatag iti napalabas a Kongreso para iti pannakawara ti SK.

Iti biang ni Senador Edgardo Angara, pabor a mapukaw ti SK agsipud ta malaksid a saan a produktibo dagiti aktibidad nga ar-aramiden dagiti agtutubo, nakarkaro pay ti pannakaisaangda iti narugit a politika.

Ken ni Angara, saan a produktibo a proyekto ti komunidad dagiti torneo ti basketbol a maangay no piesta wenno summer vacation, dagiti pasala wenno jam sessions nga angayenda kas pangparagsak iti maysa a parambak wenno pasken, dagiti pasalip kas iti Miss Gay.

Iti biang ni Angara, nakarkaro pay ti pannaka-expose dagiti agtutubo iti politika – estilo Pilipinas – ket maseknan unay iti pannakailukat ti naganus ken masuksukog ken nalaka a maimpluensia a pampanunot iti politika ti Pilipinas ken dagiti saan a onorable nga aramid.

Idi senador pay ni dati a senador Aquilino Q. Pimentel, Jr., nangipila iti gakat a mangpukaw iti SK.

Maipalagip a ni Pimentel ti nangbuangay iti SK babaen ti pinutarna a Local Government Code.

Iti panangisingasingna iti pannakapukaw ti SK, kinuna ni Pimentel nga iti obserbasion dagiti tattao, napukawen ti SK ti kinapategna kas mekanismo a mangi-inbolbar kadagiti agtutubo iti panagdur-as ti komunidad.

Nupay kasta, no mapatuloy ni Pimentel, agtuloy nga adda representasion dagiti agtutubo iti sangguniang bayan, sangguniang panlungsod ken sangguniang panlalawigan agsipud ta adda singasingna a karaman dagiti pannakabagi dagiti agtutubo a mabutosan, kas kadagiti lokal nga agtuturay kabayatan ti regular nga eleksion a maangay tunggal tallo a tawen.

Adda met manipesto ti Federation of Students a mangitawtawag iti pannakapukaw ti SK. Apay? Kapaliiwan ngamin a kaadduanna kadagiti SK officials ti estudiante ket magudua ti imatangda iti panagbasada ken iti idadar-ayda iti linawas a pannakisessionda.

Kuna ti Federation of Students nga adu nga SK officers ti nangisukat ti panagadalda iti sueldo ken dadduma pay a benepisioda iti linawas a pannakisessionda iti sangguniang bayan, sangguniang panlungsod ken sangguniang panlalawigan.

Wen met ngamin, nagbalin nga aleng-aleng ti panagbasada agsipud ta agsusueldoda metten iti dakkel kas ex-officio member iti konseho ti munisipio, siudad ken probinsia!

(Maigibusto)