Sangguniang Panlalawigan, kontra IRR ti Sin Tax Law

VIGAN CITY – Nagtignay ti sangguniang panlalawigan ditoy a mangkontra iti baro nga implementing rules and regulations ti Sin Tax Law a masirmata a mangapekto iti naannayas a pannakaipatungpal dagiti proyekto ken programa pakaseknan dagiti agmulmula iti tabako kas intuding ti RA 7171.

Indagadag ni Bokal Robert Tudayan ti panangaramidda iti maysa a resolusion a mangkontra iti nasao nga IRR agsipud ta adda probiso daytoy a mangapekto iti nasayaat nga implementasion dagiti proyekto para iti pagimbagan dagiti mannalon ti tabako kas intuding ti RA 7171.

Sakbayna, iti session ti sangguniang panlalawigan, kinuna ni Bokal Robert Tudayan a “makaalarma” ti impormasion a naammuanda idi timmabunoda kada Provincial Legal Officer Mhelygene Tesoro, ken ti Provincial Planning Office iti forum nga inangay ti National Tobacco Administration.

Kinuna ni Tudayan a kas sinaguday ti RA 10351 wenno Sin Tax Law, mangisubmite ti Department of Budget and Management, iti pannakikonsultana iti Department of Agriculture, iti rules and regulations iti alokasion ken disbursements dagitoy a pondo iti saan a nalablabes ngem 180 nga aldaw manipud iti effectivity ti nasao a linteg.

Inlawlawag ni Tudayan a ti dakdakamaten laeng ti RA 10351 ket ti RA 8240 a pakaseknan ti burley ken birhinia a tabako.

“Ngem nangiyisio metten ti DBM, DoF, BIR, DoH, ken DA iti joint circular iti IRR ti RA 10351 ket  nairaman metten ti RA 7171,” kinuna ni Tudayan.

Segun iti daytoy nga IRR, sakbay a maruk-atan ti pondo ti RA 7171, mangisubmite ti lokal a gobierno iti DBM kadagiti proyekto a kayatda a punduan tapno mairaman dagitoy iti General Appropriations Act (GAA).

Iti agdama, maited dagiti pondo manipud iti RA 7171 kadagiti lokal a gobierno ket daytoy ti maiyalokar kadagiti nadumaduma a proyektoda kas intuding ti nasao a linteg.

Kanaig daytoy, kinuna ni Gov. Ryan Singson a saan a rumbeng a mairaman ti RA 7171 iti baro nga   implementing rules and regulations ti Sin Tax Law agsipud ta adda bukod nga IRR ti RA 7171.

Kinunana a ti gobierno probinsial ti agaprobar kadagiti proyekto, saan ketdi a maisubmite dagitoy iti NTA tapno mairamanda iti listaan dagiti proyekto a mapondoan iti babaen ti General Appropriations Act.

Ti trabaho laeng ti NTA ket ti mangmonitor iti produksion ti tabako, saan nga

Ngem iti press release manipud iti NTA a naiggaman ti Tawid News, kinuna ni NTA Administrator Edgardo Zaragoza a dagiti latta met lokal a gobierno, babaen dagiti mayor wenno gobernador ti agpili kadagiti kayatda a proyekto wenno programa nga isayangkatda kadagiti lugarda.

“Saan nga inagaw ti Sin Tax Law ken ti IRR dayta a bileg kadagiti lokal nga ehekutibo,” innayonna.

Kinunana a gapu pay  iti baro a pagalagadan iti pannakairuar ken pannakausar ti pundo manipud iti koleksion iti excise tax, kas ipekpeksa met ti RA 10351, addan gundaway dagiti nadumaduma nga stakeholder iti industria a mangkita no ti implementasion dagiti proyekto wenno programa ket agserbi met laeng kadagiti mannalon, ti industria ti tabako ken ti panagdur-as dagiti amin nga ili.

Ngem inyunay-unay ni Singson nga adda autonomia dagiti lokal a gobierno ken “adda sangguniang panlalawigan a pagisubmitean kadagiti listaan dagiti proyekto.

“Isu(da) ti agaprob kadagiti proyekto… apay pay laeng nga isubmite iti NTA?” kinuna ti gobernador.

Kinuna ni Singson a transparent amin a listing dagiti proyekto ti gobierno probinsial ket nawaya ti asinoman a mapan iti kapitolio tapno kitaenna dagitoy.

“Ania ti assurance ti NTA nga aprobaranna dagiti isubmitetayo a proyekto?” sinaludsod ni Singson idinto a dinakamatna dagiti proyektona iti Narvacan a saan a palubosan ti gobierno lokal ti nasao nga ili.

Ngem inlawlawag ni Zaragoza a sabali ti IRR ti RA 10351 a rimmuar idi Pebrero ken ti baro a pagalagadan a pagtitinnulongan ita a sursuraten ti Department of Budget and Management, ti DA ken ti NTA a para iti RA 7171 ken RA 8240.

Impanamnama pay ni Zaragoza nga aniaman a rummuar a pagalagadan para iti RA 7171, addanto pammatalged a probision ditoy a dagiti pundo nga agtaud kadagiti koleksion iti excise tax ket mapan laeng kadagiti pagimbagan ken pagdur-asan dagiti mannalon, ti sibubukel nga industria ti tabako, ken dagiti amin nga ili.

Kabayatanna, indagadag ni Tudayan a mangaramidda iti maysa a resolusion a maipatulod iti DBM a mangkontra iti sumagmamano a probiso ti IRR ti Sin Tax Law a mangapekto iti naannayas nga implementasion dagiti proyekto kas intuding ti RA 7171. (Karaman ti report ni Neyo Valdez)