Sangguniang panlalawigan ti Ilocos Sur suportaranna ti HB 6069

VIGAN CITY – Suportaran ti sangguniang panlalawigan ditoy ti House Bill 6069 idinto a dina kanunongan ti resolusion ti sangguniang panlungsod iti Zamboanga a mangkontra iti daytoy.

Kinuna ni Bokal Jeremias “Jerry” Singson a suportaranda ti House Bill 6069 ken kontraenda ti resolusion ti sangguniang panlungsod ti Zamboanga a mangkontra iti daytoy agsipud ta no mapagbalin a government owned and controlled corporations dagiti 26 a government hospitals iti intero a pagilian, maaramidda nga economic enterprise.

Kinuna ti bokal a no maaramid  nga economic enterprise dagitoy nga ospital, dumakkel ti pamastrekanda ket isu ti gastuenda a pangpasayaat ti serbisioda kadagiti umili.

Innayonna a no mapagbalin a GOCC dagiti government hospitals, maakomodar amin a PhilHealth members ket lumawa ti coveragena.

Inyunay-unay ti bokal a saan a madakamat ti HB 6069 dagiti district hospitals iti probinsia ti Ilocos Sur agsipud ta dagiti laeng 26 a government hospitals ti ituding ti nasao a gakat a mapagbalin a GOCC a pakaibilangan ti Ilocos Training and Regional Medical Center iti San Fernando City, La Union.

Karaman pay a sakawen ti nasao a gakat ti Baguio General Hospital and Medical Center,  Cagayan Valley Medical Center, Veterans Regional Hospital,  Regional Medical Center, Dr. Paulino J. Garcia Memorial Research and Medical Center, Jose B. Lingad Memorial Medical Center, Bicol Medical Center (Naga City), Bicol Research Training and Teaching Hospital (Legaspi City), Quirino Memorial Medical Center, Jose R. Reyes Memorial Medical Center, Rizal Medical Center, Amang Rodriguez Medical Center, San Lazaro Hospital, Vicente Sotto Memorial Medical Center, Eastern Visayas Regional Medical Center, Corazon Locsin Montelibano Memorial Regional Hospital, Western Visayas Medical Center, Northern Mindanao Medical Center, Southern Philippines Medical Center, Zamboanga City Medical Center, Cotobato Regional and Medical Center, CARAGA Regional Hospital, Davao Regional Hospital, ken Mayor Hilarion A. Ramiro, Sr. Regional Center and Training Hospital.

Ni Bacolod Representative Anthony Golez ti nangipila iti HB No. 6069, wenno “An Act Creating National Government Hospital Corporations” ket impasa ti Kamara daytoy idi Mayo 16, 2012.

Maipresentar met iti Senado ti SB 3031 (National Government Hospital Corporate Restructuring Act) ni Sen. Franklin Drilon iti daytoy a panaglukat ti Kongreso.

Kinuna ni Singson a pabor pay ni Secretary of Health Enrique Una iti HB 6069 agsipud ta maiyalubog daytoy iti coverage ti PhilHealth program.

Kinuna  ti chairman ti committee on health ti sangguniang panlalawigan a dina maawatan no apay a konkontraen ti sangguniang panlungsod ti Zamboanga ti nasao a gakat sana innayon  a “narigrigat no ma-privatize dagiti government hospitals no dida suportaran ti nasao a gakat.#