Footer

Sangkaballing laeng a daga

TI NAKAPIMPIMAN a ladawan  dagiti mannalon a nagdaliasat iti 1,700 a kilometro manipud pay iti Bukidnon iti dua a bulan bayat ti panagkampoda iti sanguanan ti Department of Agrarian Reform ti pammaneknek  iti dakkel a nagkamtudan ti linteg ti reporma ti agrario.

Taliawentayo ti napalabas.

Idi 1995, naiyawat ti estate ni Norberto Quisumbing, Sr. kadagiti 137 Higaonon a mannalon ket inyisio kadakuada ti DAR ti certificate of land ownership award.

Ngem nangipaulog ni Executive Secretary Ruben Torres iti pammilin a nangsarurong iti aplikasion ni Quisumbing a konbersion ti dagana  manipud iti agrikultura iti agro-industrial ta ipasdek kano  ti baknang ti maysa nga akademia, cultural center, museo, biblioteka, parke, hotel, restaurant, pabalay ken dadduma pay.

Ngem saan a nagmata ti kari ni Quisumbing. Inlakona ketdi ti paset ti daga iti San Miguel Foods Inc. nga ita, kayat daytoy a pagbalinen a pagtaraknan dagiti baboy.

Iti baet ti panagprotesta dagiti mannalon, kinuna ti DAR nga awan ti hurisdiksionna iti nasao a banag gapu ta ti Opisina ti Presidente ti nangipalubos iti konbersion ti daga.

Ti panagtagikuada iti daga a sinuksukayda ti iruprupir dagiti mannalon isu a nagdaliasatda manipud iti Bukidnon agingga iti Manila tapno idanonda ti ir-irukenda iti Presidente.

Ngem saan ida a sinango ni DAR Secretary Pangandaman ken uray iti kaaddada iti ridaw a sumrek iti Malakaniang, dida nakita uray anniniwan laeng ni Executive Secretary Eduardo Ermita.

No adda leksion a naadal dagiti Sumilao farmers iti daytoy a panagsakripisioda a nagpa-Manila, isu ti agdadata a kinapudno nga iti daytoy a pagilian, nangato unay ket saanda a maabut ti pedestal a pagtaktakderan dagiti agtuturay a naisaad kadagiti puesto a natudingan a mangtaliaw kadakuada nga agbibiag iti parabur ti daga. Kasta met a kasla apro iti karabukobda ti kayariganda a kasla gabat laeng a tirtirisen dagiti nabibileg a tattao nga agkuykuyakoy iti koridor ti turay idinto nga adda met karbenganda a maikkan iti respeto kas umili ken agindeg iti daytoy a pagilian.

Iti kabayagdan iti siudad, awan pay ti nagbanagan iti arungaing dagiti mannalon. Uray sangkaballing laeng a raya ti namnama, awan pay nga imparipirip ti maraem a dadaulo ti agrario ti daga.

Makunami: ditoy itan ti pangipakitaan ti gobierno no adda kaikarian kenkuana dagiti mannalon a sangkakunana a sadiri ti pagilian.

Sangkaballing laeng a daga ti dawdawaten dagiti mannalon iti aglaplapusanan a sanikua dagiti nabibileg. Saan la kadin a maikaasi ti gobierno daytoy a kiddawda?

Iti isasangbay ti Paskua, daytoy koman ti isagut ti Malakaniang kadakuada, sagut a siguraduenmi a tagipatgen dagiti mannalon iti nalablabes pay ngem iti bagida.#