Sanitary landfill, maluktan

CANDON CITY – Maluktan iti mabiit ti maysa a sanitary landill a pagikabilan dagiti basura ditoy siudad, segun iti City Environment and Natural Resources Office.

Kanaig daytoy, rinugian daytoy nga opisina ti namarbarangay tapno maipaganetget ti kinapateg ti waste segregation.

Kinuna ni Engr. Ismael Ganaban, CENRO officer ditoy siudad, a mayimplimentaren ti panaglalasin kadagiti basura a bunagen dagiti dump truck a maibasura iti sanitary landfill.

Kinunana a maysa a truck ti agbunag iti para kadagiti marunot (biodegradable), kas kadagiti sobra a naeng, taraon, papel idinto a sabali ti agbunag kadagiti saan a marunot (non-biodegradable) kas kadagiti landok, plastik, styrofoam ken dadduma pay.

Impalagip ni Ganaban nga iti uneg ti pagtaenganen ti pakalasinan dagiti basura, ket sa laeng mairuar dagitoy no addan dagiti truck nga agbunag. Mapakaammuan dagiti agindeg iti panagiruarda kadagiti basurada babaen ti megaphone.

“Kapaliiwan ngamin a no maibuntog dagiti basura iti ruar, bukitkitan ken iwarawara dagiti aso,” nakuna ni Ganaban.

Kinuna ni Ganaban a kabaelan ti maluktan a sanitary landfill a pagbasuraan iti uneg ti 15 a tawen.#