sinursuran-banner-sqSinursuranNi Jobert M. Pacnis

Santo Papa Dagiti Tao: Agyamankami!

Sinursuran: Kolum ni Jobert M. Pacnis
(Maudi iti dua a paset)

Nupay medio nadismaya dagiti kailian idi inwaragawag ti Santo Papa iti Palo, Leyte, a saanen a matuloy dagiti dadduma a programa ta masapul nga agsubli iti Kamaynilaan iti ala-una iti malem gapu ngarud iti dumakdakes a panawen.

Nupay kasta, naawatanda met laeng. Para iti seguridad ti Santo Papa. Ti napateg, sinarungkaranna ida. Nga uray apagdarikmat laeng, nabunga ken nakallalagip dagiti imbatina nga adal:

Ti panamagtalinaed a sipapakumbaba iti pada a tao ken agdaydayaw a kanayon iti Dios. Ken ti di pannakalipat iti Nasantoan nga Ina. Saan kano a rumbeng nga italimudok ti imatang iti didigra a sumangbay. Ketdi, iti ayat ti Dios. Di a rumbeng a sumina Kenkuana. Ta iti ikakarapet nga agnanayon, awan ti parikut ken allawig a di malasatan a sibaballigi.

Saan nga agpannakkel. Iti panagpakadana kadagiti Leytenio, kiniddawna—nupay tao ti Dios—ti panangikararag koma kenkuana para iti natalged a panagsublina iti Kamaynilaan. Wen, uray no kunaen nga isu ti kaasitgan iti Namarsua, impamatmatna—a sipapakumbaba—ti panagpapada ti amin iti sanguanan ti Dios. Ket masapulna la unay met dayta panangikarkararag kenkuana.

Ayaten dagiti ubbing. Manen, kas maysa kadagiti nakaam-ammuanna a kas Papa, saanna a sinamir ti nakilangen kadagiti kailian. Adda dita a pasardengenna ti pope mobile a luganna tapno mabendisionan ken maubbana dagiti ubbing.

Am-ammo unay ti Santo Papa a naayat kadagiti ubbing. Kayatna nga agbalintayo amin nga ubbing, kas ibagbaga ti Nasantuan a Surat. Maysa ngamin a galad dagiti ubbing, a kayatna a tuladentayo, dayta kinamanagtulnog. No ania ti ibaga iti ubing, tungpalenna a sitatallugod. Wen amin a sungbatna. Agtalek la unay kadagiti ibagbaga dagiti nagannak kenkuana.
Kas Kristiano, agtulnogtayo koma ngarud iti nagannak kadatayo amin. Agtalektayo a para amin iti pagimbagantayo dagiti ibilbilinna nga aramiden a maannong iti Nasantuan a Surat.

Maysa pay a pakalaglagipan ken ni Santo Papa ti dina panagusar iti lugan a bulletproof wenno ‘tay di serken ti bala a para koma iti talgedna bayat ti pannakilangenna kadagiti tao. Wen, ta kas maysa nga adipen ti Dios, adu latta met dagiti mangipangpangta iti biagna. Naruay latta dagiti mayat a mangipatli kenkuana. Malagip nga idi tawen 1995 nga isasarungkar ni Pope John Paul II iti pagiliantayo, naduktalan dagiti otoridad ti kaadda ti mangpatay koma kenkuana. Ti dakesna ditoy, di koma naduktalan dagiti otoridad no di nauram ti pasdek a nagdagusan ti suspek.

Ngem anian a kinapakumbaba ni Lolo Ikko wenno Pope Francis. Kasano ngarud a makalangenko dagiti tao no mapupokak iti lugan? kunana man. Sinaludsod dagiti arsobispo no di mabuteng a “nakalukat” ti luganna. Sungbatna: “Maaramid koma iti apagkirem. ‘Tay malpas a dagus.” Kayatna a sawen, saanen a maparigat pay no adda mangpanggep iti biagna. Maysa laeng a bala, nalpasen, kasta.

Ti ketdi nalawag ditoy, natalek kadatayo a Pilipino. Saanna a pagbutngan ti panangiwaragawagna iti naimbag a damag. Inkumitna ti amin iti Namarsua. Asino koma ngarud ita ti kabutengna no kaduana nti Dios?

Maysa pay a nalawag, saan a politiko tapno kasapulanna ti bulletproof a lugan ken adu a badigard. Nanumo laeng nga adipen ti Dios, saanna a kasapulan ti mabambantayan ti seguridadna no mabalbalin.

Itoy a banag, saan ngata a nagkuyegyeg ti rikna dagiti politiko?

Ti karit, wenno ad-adda a maitutop a makuna a bilin, ni Santo Papa kadagiti agtutubo (ken mabalin nga iti sibubukel nga umili) iti Unibersidad ti Santo Tomas a panangipateg iti nakaparsuaan, naimbag la unay a maakem wenno maikkan-biag. Ammo la unay ti Santo Papa ti dakkelen a namalbaliwan ti panawen. Kas dadaulo ti Simbaan, akemna nga ipalagip kadatayo ti masapul a panagkutitayon sakbay a maladaw ti amin.

Makakulding iti rikna ti maysa nga ubing a nagsao iti sanguanan ti Santo Papa iti UST. Apay kano a palugodan ti Dios a mapaspasamak dagiti banag a pakaidaddadanesan dagiti kas kenkuana (a maysa nga abandoned child)? Urayna la insangit—ta nalagipna ti kasasaadna.

Ngem nalawag ti kinuna ni Santo Papa: No dimo ammo ti agsangit, saankanto nga agbalin a naimbag a Kristiano. Anian a nagbagas! Maysa a dakkel a sakripisio ti agbalin nga Anak ti Lawag.

Nakasublin ni Santo Papa iti Vatican. Dagiti imbatina nga adal, ken pagtuladan, saan koma nga agnadnad iti kaawanna. Itukit dagitoy iti kinataotayo tapno agrusing, agsulbod, dumakkel ken agbunga—‘tay bunga a mangyeg iti kappia ken ayat iti tumunggal maysa.
Kaasiantayo dagiti agkasapulan a kakabsat tapno kaasiannatayo wenno bendisionannatayo ti Namarsua. Agserbitayo iti kanunumuan tapno makapagserbitayo met iti Dios.

Manen, Lolo Ikko, agyamankami!#