sinursuran-banner-sqSinursuranNi Jobert M. Pacnis

Santo Papa Dagiti Tao: Agyamankami!

Sinursuran: Kolum ni Jobert M. Pacnis
(Umuna iti dua a paset)

Misericordia y compassion iti Espaniol. Mercy and compassion iti Ingles. Dayta ti tema ti ibibisita ni Pope Francis iti panagbisitana iti pagiliantayo itay Enero 15-19, 2015.

Mercy, awa iti Filipino. Compassion, habag ngata? Ngem di kad’ agkaarngi ti kayat a sawen ti awa ken habag? Wenno malasakit ket ngata dayta compassion kas naynay a nangngegan iti panagirakurak dagiti adda iti telebision?

No iti Ilokano, asi wenno panangngaasi ti pakayulogan ti mercy; kaluoy no iti Bisaya. Ngem awan ti matiliwko a kaibatoganna ti compassion iti Ilokano. Panangipateg? Wenno panangipaay ti bagi tapno agserbi?

Segun ken ni Lingayen Archbishop Socrates Villegas, dadaulo ti Catholic Bishops’ Conference of the Philippines, “asi ti Dios” kano ti compassion.

Asi ti Dios? Saan kad nga iti asina kadatayo, indatonna ti bugbugtong nga Anakna? Nagserbi ngarud ni Hesukristo para iti pannakasubbottayo. Anian a panagayat, panangngaasi ti Dios kadatayo? Ket dayta ngarud a compassion-na kadatayo, kayatna nga ipariknatayo met kadagiti kakabsat.

Iti isasangbay ti Santo Papa, kangrunaan a rantana ti pannakakita ken pannakisarsaritana kadagiti biktima ti kalamidad idiay Leyte. Kayatna a yeg kadakuada ti namnama, ti pammatibker a mismo a nagtaud iti Dios.

Iti pay laeng eropuerto iti Villamor Airbase idiay siudad ti Pasay, saanen a matinnigan ti dagum, no labsen ti agsao, ti bilang dagiti umili nga agur-uray, mangpasangbay ken ni Santo Papa. Saan a maitugotan kadakuada ti puyat, bannog ken kettang iti kaundayen a panagur-urayda tapno laeng personal a maimatanganda ni Santo Papa. Dayta laeng a pannakakitada, lumag-anen ti riknada ket la maminpinsan a maagasan dagiti bambannog, ken mapabaro ti kinataoda.

Napintas pay la ti panawen, nupay napigsa ti angin, idi agdisso ti Sri Lankan Airlines iti eropuerto ti Villamor Airbase a nagluganan ti Santo Papa a bimmisita iti pagiliantayo kalpasan a nasarungkaranna ti pagilian a Sri Lanka. Adda pay laeng iti uneg ti eroplano, a sumirsirip iti tawa, nakaragragsaken dagiti kailian a nakaimatang kenkuana. Permi a panagririawda. Welcome, Pope Francis! yik-ikkisda. Ket ad-addan idi imburuang ti ruangan ti eroplano, nga immuna a sinarabo ti napigsa nga angin a nakaitayaban pay ti skull cup-na, a kasla di nabannog a nagbiahe.

Ni met Santo Papa, kasla nasigkatan iti toothpick ti ngiwatna ta saan a mapulpulsot ti isemna kadagiti simmabat kenkuana a kailian. Banag a nangted iti nagpaiduma a rikna kadakuada. Nupay sumagmamano laeng a segundo iti pannakakitada, a naasideg, kasta la unay ti pinarnuayna a ragsak iti kaunggan ti tunggal maysa. A mabalin a daytoy ti pagubbogan dagiti napintas, napintek a pampanunot para iti pagimbagan ti sapasap.

Pannakapabaro ken pannakapatibker ti pammati nga agtaud iti natudingan a Santo Papa Dagiti Tao.

Saksi ti sibubukel a lubong no kasano a sinabat dagiti kailian ni Santo Papa, aglalo idi napan iti Tacloban, Leyte a yan dagiti kakabsat a biktima ti bagyo a Yolanda. Saan a nagbalin a tubeng ti bagyo nga Amang tapno sarabuen, pasangbayen dagiti Leytenio. Signal number 2 iti lugar kadayta a kanito. Ngem sikakaysa latta dagiti agindeg a nangsarabo iti Santo Papa a nagsuot met iti kapote a kas kadakuada.

Anian! Saan a magatadan a panagsakripisio makita laeng ti Papa iti apagkanito!

Ta kasta la ngarud met ni Santo Papa kadakuada. Ken kadatayo a Filipino. Mabalinna koma nga ikansela ti ipapanna iti Leyte kadayta nga aldaw gapu iti pangta ti bagyo. Ngem intuloyna latta ti nagbiahe ta dina kayat a paayen dagiti mangur-uray kenkuana. Masapul a yegna kadakuada, isuda a kangrunaan a rason no apay a bimmisita iti pagilian, ti “baro a namnama” wenno ti kaadda ti namnama iti baet dagiti napasaranda.

Kunana ngarud: italektayo ken ni Hesus ken iti Napateg nga Ina ti amin.

Kadagiti insayangkatna a misa iti Manila Cathedral, Mall of Asia ken Quirino Grandstand, madlaw la unay no kasano ti kinauneg ti debosionna iti Birhen Santa Maria nga inatayo. Madakamatna latta kadagiti mensahena.

(Adda tuloyna)