Footer

SARITA: Agpakasaren ni Uliteg Antokoy (Maikadua a paset)

Iti daydi nga aldaw, nupay alas tres ti idadanon ti nobio ni Kapid Olga, kalkalpas pay laeng ti pangaldaw ngem addaytan nga agur-uray ni Uliteg Antokoy. Medio nakargaanen ti bagina iti agua de pataranta. Insabbikelna pay ti paltik a 9mm a paltogna.

“Agtalnaka kadi, lakay. Ania ngarud ket bugbugianen ta balasangmo,’ inyatipa idi ni Anti Mayyang idinto nga agan-anug-og met ni Olga.

“Ania koma no bugbugian. Uray dida as-asawaen ti garampingat nga anakmo no dida maparuar dagiti kidkiddawek. No saan koma a nasapa unay a nagpamaya daytoy gatel nga anakmo, awan koma ti kastoy a problema. Sapay no di la tay agatladog ti nangipuged kenkuana,” inradies ni uliteg.

Mannalon ti ama ti nobio ni Kapid Olga.

Saan a nagbayag, simmangpet dagiti dumanon. Nagluganda iti agkinodkinod a kuliglig. Saan pay a nakatugtugaw dagitoy no ar-arigen, inaritaktaken ida ni uliteg iti sao.

“Diak kayaten ti palpalandok,” imbikagna idi rugian koman ti lakay nga albasiador ti agdaniw. “Awan ti inay-ayabak a mangsungbat kadagiti planom nga idaniw. Ti laeng makunak, matuloy ti kasar no kabaelanyo dagiti kiddawek kas nababayan. No kunayo nga awan maaramidakon ta kinargaanen ti sal-it nga anakyo daytoy gatel nga anakko, nagbiddutkayo. Saanyo met a gamden ti aglibas ta no adda man planoyo a kasta inton bigat met laeng, dakayon ti topiko iti radio ken headline iti pagiwarnak. Sakbayna gayam, no didak pay am-ammo, siak ni Jose Recacho Madriaga Alias Komander Antokoy, ti nalatak a brodkaster iti telebision,” indiskurso ni uliteg.

Kasla naapradan iti siit ti karabukob dagiti dimmanon. Dida la ketdi ninamnama a kasta ti ipasabat ni uliteg Antokoy  kadakuada .

“Ita, kakabsat, kayatko nga agbalin a naisangsangayan ti maaramid a kallaysa. Tallo a baka, lima a baboy, sabali laeng ti manok, kalding ken aso a mapulotan kas sagana. Ayabakto amin dagiti kameng ti Pakidilutan Press Club. Iti bisperas, dua a kombo ti agtokar. Sakbayna, masapul a maiyawat ti sien mil a sab-ong ken singkuenta mil a sinusuan ken sabali pay a singkuenta mil a nagubbaan. Maipan dayta iti libreta de bangko a nakanagan iti balasangko. Ania, kabaelanyo met laeng?”

Dimmadakkel ti anges ti ama ti nobio iti nagngegna. Pimmuraddaw met ti inana aglalo idi inranta ni uliteg Antokoy nga ingato ti gayadan ti polona ket timmungraraw ti  .9 mmna.

Naparuar ti nalalakian dagiti kiddaw ni uliteg Antokoy babaen ti panangisaldada iti talon ken panangilakoda iti kuligligda.

Kasla maad-adasan iti pigsa ti nobio iti kaaldawan ti kasarda. Dandani pay natuang idi isuotna ti singsing iti ramay ti nobia isu a  nakatugaw lattan iti panagtuloy ti seremonia.

Mayat ti isem ni uliteg idi agpaala iti ladawan malaksid idi kagrupona dagiti  abalayanna. Inrantana a pinagsabat dagiti napuskol a kidayna ken pinakarona ti tammina.

Agingga ita, saan pay a makadap-aw dagiti agassawa iti pagtaengan da uliteg ta saan pay a naala ti manugangna ti riknana. Iti naudi a panagkitami ken ni kapid Olga, naibagana a nagbalin metten a nerbioso ti asawana sipud daydi idadanonda. Sa naduktalanna nga adda pulida nga agkissiw isu a kabutengna nga ipasiar iti balayda.

Malem ti Sabado. Agawidak koman kalpasan a naiyawatko ken ni uliteg ti napasadaak ngem inggawidnak. Kas iti sigud, adda latta sangsanguenna a marka demonio.

“Apay, uliteg, dikan sa metten ammo ti mausawan sipud idi naammuam a nakasikog ni Jun. Mamatiak iti kunam a ganagan ti bagi ti arak ngem kas met laeng iti mula ti bagi a manglaylay no maikaadum ti ganaganna,” impasaksakko.

“Ania ketdin aya, kaanakan. No uminumka, matayka. Saanka nga uminum, matayka latta. Ne! Iyalam man ketdi. Danggayannak, barok,” inyawat ketdi ni uliteg ti baso.

Inawatko ti baso. Napanunotko a nasayaat met no kasangok ita ni uliteg bareng dumngeg iti pammagbagak. Kimmutsaraak iti kaliente a pulutanna.

“Kasano ngaruden ti trabahom, uliteg, no baybay-am met ti bagim? Malasin met ngarud dayta langam iti telebision a problemadoka. Sapay no di nagadu ti mangid-idolo kenka,” impatiray-okko.

“Karma daytoyen, barok, iti namay-ak iti asawa ni  Olga.”

“Saanmo a panunoten dayta, uliteg. Inaramidmo laeng ti pagsayaatan ni kapid. Dimmawatka man idi iti dakkel, napan met kadakuada nga agassawa. Saanmo met a tinagikua.”

“Mariknak met itan ti rikna diay karaho nga abalayak. Kapilitan nga ilakok dayta dyip. Saan a bale ti maparti ta mautangko met ngata dagitay baka ni tatangmo wenno dagiti baboy tay kabsat ni Antim a Mayyang,” kinuna manen ni uliteg Antokoy a nagkintayegak. Saan a gapu ta utangenda dagiti baka ni Tatang no di ti posible a panangilakona iti dyip nga ipaspasadak. Masapul a makapanunotak iti wagas tapno diak maawanan iti pagsapulan.

“Ania ketdin aya, angkel. Asino ngad ti di agtitinnulong no saan a datayo. Amin a parikut, adda solusionna. Ammom aya no inton bigat ken rummuar tay tarakenmo a numero.”

(Adda tuloyna)