Footer

Aplat (Maudi a paset)

Saanen a nagusisa. Namles. Pinaayabanna ni Andre.

Nagdakiwas ti panunotna bayat ti panagdaliasatda. Apay a pinaayaban ti executive secretary?

Nagtarus iti opisina ni Executive Secretary Soliman. Ngem limmidem ti rupana idi mataldiapanna ni General Luzano a nakasikkawil iti sanguanan ti lamisaan ti sekretario.

“Agtugawka, Angelo,” kinuna ni Executive Secretary Soliman.

Nagtungpal ni Lieutenant General Castro. Inurayna ti sumaruno a sawen ti sekretario.

“Nabasak ti  manipesto nga indatagmo,” kinuna ni Executive Secretary Soliman. “Sakbay nga iyumanmi iti Presidente, napagtinonganmi ken ni General Luzano a kapatangdaka nga umuna.”

“Adda kadi maisingasingyo a pakapalag-anan dagiti soldado, Mr. Secretary?” inamadna.

“Sangsanguen ita ti pagilian ti krisis iti politika ken ekonomia. Isingasingko ti panagtitipkeltayo tapno napigpigsatayo a mangrisut kadagitoy a parikut.”

“Iti nalawag a pannao, agulimekkami, Mr. Secretary?” dimmagsen ti timek ni Lieutenant General Castro.

“Agsasaruno dagiti welga ken demonstrasion,” kinuna ni General Luzano. “Umad-adu ti krimen. Pumigpigsa dagiti taga-ruar a kabusor ti turay. Tapno maguped dagitoy a riribuk, masapul ti panagkaykaysa iti AFP.”

“Kabayatanna, ipalikudtayo pay laeng dagiti an-anek-eken dagiti soldado nga adda iti babaentayo, saan a kasta, General?”

“Bassit ti parikutda no maidilig iti agdama a parikut ti pagilian,” nakuna ni Executive Secretary Soliman.

Tinaliaw ni Lieutenant General Castro ti sekretario. Ania ti impaammalda kenka? nairidisna iti unegna. Mansion iti Nueba York? Librito ti banko iti Switzerland?

“Apay a dika agbakasion?” insingasing ni General Luzano. “Agsublikanto inton natalna ti aglawlaw satayonto pagsasaritaan ti indatagmo a parikut.”

Immirut ti gemgem ni Lieutenant General Castro iti ima ti tugaw. Kellaat, nagbaliw ti panagkitana kadagiti kasangsangona. Saandan a maraem a turayen. Nagbalinda nga aplat – aplat a kimpet iti turay tapno agkunnot iti parabur!

“Ania ti makunam, Angelo?” sinaludsod ni Executive Secretary Soliman.

“Ladingitek, Mr. Secretary,” pinilitna a pasimbengen ti timekna. “Diak maitured a tallikudan lattan dagiti nagtalek kaniak.”

Timmakder ni Lieutenant General Castro. Intarengtengnan ti rimmuar.

MINATMATAN ni Lieutenant General Castro ti sampagita. Nalaylayen dagiti bulongna. Ad-adda a limmitem dagiti sangana a nagsepsepan dagiti aplat iti panangdayas ti nakusnaw a lawag ti agpakpakadan nga init.

Rinugianna a pugsitan ti mula. Nagtayab nga immadayo dagiti aplat ket nagdissoda iti bulong ti rosas. Sinurotna ida a pinugsitan agingga ti nagkuripaspasda iti daga.

Adda pannakapnek iti barukongna idi ipaknina ti pagpugsit. Tinaldiapanna ti sampagita. Makaungarto pay ngata?

Ad-adda a limmidem ti rupana idi sumiplot kenkuana ti nadara a demonstrasion iti sakaanan ti rangtay ti Mendiola idi rabii. Iti kaudian a report a naawatna, liman ti natay ken pinullo dagiti nadangran!

Narugianen ti panagsayasay ti dara, naisipna. Iyetnag kadi ti Presidente ti linteg-militar?

Kalpasan ti panagbuggona, simrek iti salas. Nadatnganna ni Jun nga agbasbasa iti sopa. Indisso daytoy ti basbasaenna sa immasideg.

“Adda koma dawatek kenka, ‘Pang,” kinuna ni Jun.

“Ania kadi?” inamadna.

“Agikkatkan a soldado, ‘Pang, ita ta nasapa pay.”

Pinerrengna ti anakna. Agikkat? Katimbeng ti biagna ti kinasoldadona!

“Matuptupraanen ti liklikudanyo, ‘Pang,” intuloy ni Jun. “Kayariganyo ti basura nga agal-alingasaw ti buyokna!”

“Adda pay nabati a sumagmamano a disente a soldado, Jun,” kinunana. “Maysaak kadakuada.”

Nagkiriring ti nalabaga a telepono. Agbitbitek ti pispisna a nangpidut iti auditibo. Dakes ti nagparikna kenkuana. Dagiti laeng opisial ti RMM ti makaammo iti numero ti teleponona.

“Tiniliw dagiti kameng ti Presidential Guard Batallion da Lieutenant Col. Santos ken tallo a junior officers, sir,” kinuna ni Col. Oandas.

“Apay?” immirut ti gemgemna iti auditibo.

“Pinanggepda kano a patayen ti Presidente!”

“Saan!” nayesngawna.

“Saan a pudno ti pammabasolda, sir,” kinuna ni Col. Oandas. “Pambar laeng dayta ni General Luzano a mangaresto kadagiti kamkameng ti Reform Military Movement. Agturongda itan iti balaymo tapno umaydaka tiliwen!”

Nagtupa ti sangi ni Lieutenant General Castro. Dina impagarup a maaramid dayta ni General Luzano.

“Ania ti aramidentayo, sir?” sinaludsod ni Col. Oandas.

Saan a nagtimek ni Lieutenant General Castro. Tinimbangna ti nakaipasungalngalanda. No matiliwda, malungsotda la ketdi iti pagbaludan. Nadagsen ti pammabasol a maikontra kadakuada. No makirangetda met, kayariganda ti simutsimot nga agsebba iti apuy!

“Napakaammuakon dagiti kakaduatayo, sir,” nagtimek manen ni Col. Oandas. “Sisasaganada a sumurot iti aniaman a pangngeddengmo.”

Nakitemna ti sangina. Kayariganda ti ayup a naipiskot iti pader. Awan ti nabati a pagpilianda!

“Ania ti pangngeddengmo, sir?”

“Ukkonem dagiti kakaduatayo,” imbilinna. “Agtitipontayo iti Kampo Crame. Ipasdektayo sadiay ti sarikedkedtayo!”

“Yes, sir.”

Indissona ti auditibo. Tinaldiapanna ni Jun a nakamulengleng kenkuana.

“Makaammokan ken ni Mamangmo,” nakunana. “Agpaknikayo!”

“Saankayo nga agmaymaysa, ‘Pang,” nakuna ni Jun. “Awagak dagiti lider dagiti nadumaduma a gunglo tapno pakaammuanda dagiti kamkameng. Agbarikadakami iti sanguanan ti Kampo Crame!”

Piniselna ti dakulap ti anakna. Tinung-edanna ni Sarhento de la Cruz. Rimmuarda iti balay. Limmuganda iti kotse. Madamdama pay, insiweten ti lugan a rimmuar iti inaladan.

Iti aglawlaw, nagkaradapen ti sipnget. Ngem iti nadalus a pingping ti langit, mangrugin nga agrimat dagiti bituen.#