Footer

Aplat (Umuna a Paset)

Nagmattider ni Lieutenant General Angelo Castro iti ridaw ti minuyongan ket kasla kulibangbang dagiti matana a nagakar-akar kadagiti naipattopattok a sabong a digdigosen ti nadungngo a lawag ti apagtangkayag nga init. Agin-inakbay ti ayamuom nga iyeg-ipanaw ti mannakigayyem a pul-oy. Dina naigawid ti panagarko ti isemna ket iti apagdarikmat, napunas ti irteng ti barukongna, karirikna a masansan nga isangpetna manipud iti Kampo Crame.

Idi rabii, nadagsen manen ti riknana a naggawid. Awan nagudilan dagiti imbaonna nga agpalutpot iti pannakapapatay ni naggobernador Tongson, napinget a lider-oposision iti Amianan. Kasla asuk a nagpukaw dagiti saksi a nakaimatang iti panangkautibo dagiti nakauniporme nga armado a lallaki iti pasado gobernador iti sanguanan ti maysa a nalatak a panganan, tallo a bloke ti kaadayona manipud iti estasion ti polisia. Sumagmamano nga oras kalpasanna, nasarakan ti natatek a bangkayna iti likudan ti pukol a monumento ni Dr. Jose Rizal.

Kapkapnekan ni Lieutenant General Castro a politika ti motibo ti pammapatay. Dakkel ti suspetsana a kameng ti militar dagiti nangkautibo ken ni naggobernador Tongson. Ngem kasla nakareppet dagiti imana a mangipatungpal iti linteg gapu iti kaawan ti saksi.

Immanges ni Lieutenant General Castro iti nauneg. A, sabalin ti rupa ti militar. Simbolon ti pammutbuteng ken pammapatay!

Kas hepe ti PC/INP, arapaapna ti panagbalin ti militar a pagwadan ken pagraeman a bitbitibiten dagiti agtalek nga umili. Dayta ti nangiduron kenkuana a mangbuangay iti Reform Military Movement. Ngem kasla adda nabileg nga ima a mangbangbangen iti panagsantak ti gunglo. Dakkel ti atapna a ni General Luzano, Pangulo ti Presidential Guard Batallion, ti adda iti likudan ti bangen. Dida agkasunguan iti heneral.

Winagwag ni Lieutenant General Castro ti ulona tapno maiwagsakna ti irteng a sumallukob manen kenkuana. Ginaw-atna ti guantes iti sab-it sana inyusong. Nagrukob ket sidudungngo a nangappupo iti mangrugin nga agbukar a rosas. Rinugianna a rukiten ti aglawlaw ti masetas. Kinapatpatangna daytoy a kasla ubing.

Nagkuretret ti mugingna idi mataldiapanna ti sampagita iti abay ti rosas. Apay a kasla kuribateg daytoy? Kinapet ti sakit?

Inasitganna ti mula sana sinukimat. Mangrugin nga umamarilio ken aglukot dagiti bulongna. Binidingna ti maysa a bulong. Naitangkarang iti matana dagiti naggaarimutong a babassit ken marakapas a tumatayab. Aplat!

Nagmurareg ni Lieutenant General Castro. Kaano nga inaplat ti sampagita? Apay a dina nadnadlaw iti kallabes?

Timmakder ket innalana ti pagpugsit iti suli. Ngem naduktalanna nga awanen ti linaonna.

Baonekto ni Selmo a gumatang iti insektisidio, nakunana iti nakemna. Masapul a mapaksiat dagiti aplat nga agkunnot iti taraon manipud iti bulong ken sanga ti sampagita.

Nagwengweng ti relona. Kinitana ti oras. Alas siete. Adu ti agur-uray a trabahona iti headquarters.

Inuksotna ti guantes sana insab-it. Nagbuggo iti gripo. Nagpakusina. Naisaray-ob iti agongna ti nabanglo nga ayamuom ti lutlutuen ni Evelyn. Dayta ti magustuanna iti asawana, dina ipabus-oy kadagiti katulongan ti pannakaisagana ti kanenna.

“Idasarankan?” inamad ni Evelyn.

“Wen,” insungbatna idinto a nangtempla iti kapena. “Awan immawag kaniak iti telepono?”

“Ni Col. Oandas,” kinuna ni Evelyn. “Dumaw-asdanto kano iti opisinam ken ni Lieut. Col. Santos.”

“Ni Jun, di pay bimmangon?”

“Saanko a riniing ta ammok a napuyatan. Pasadon alas dose idi sumangpet.”

Saanen a nagtimek. Ammona lattan ti naggapuan ni Jun. Naangay ti People’s Rally idi rabii iti Liwasang Bonifacio.

Limmidem ti rupana. Nangrugi ti natamnay a panaglangenda ken ni Jun manipud idi mapapatay ti maysa a nalatak a lider-oposision iti MIA. Sa ita, ti nadara nga eleksion a natibnokan iti sapasap a panagkusit. Patien ni Jun nga adda pannakaibiangna kadagitoy a napasamak.

Ngem nadalus ti konsensiana. Kinapudnona, timmulong ti Reform Military Movement iti pannakaipagna ti nadalus ken natalna nga eleksion. Ngem anian ta saan a nagtengtengnga dagiti dadduma a sanga ti militar. Pinaaramatda kadagiti rinuker a politiko!

Immanges iti nauneg. Ania ti aramidenna tapno mapapatina ni Jun a dina minulitan ti sinapataanna a pagrebbengan?

Kellaat a napukawna ti ganasna a mangan. Timmakder kalpasan ti panangibbusna iti kapena.

Inyawat ni Evelyn ti pamlesanna. Simrek iti banio. Ngem uray idi agup-uperen iti shower, agay-ayuyang ti saludsod iti mugingna: kaanonto ti pannakadisiplina dagiti kameng ti militar?

Nakasaganan ti unipormena idi makadigos. Namles.

“Umayka mangaldaw ditoy balay, ‘Pang?” inamad ni Evelyn.

“Awan la ketdi ti pakatalaanak iti headquarters,” insungbatna.

Inagkanna ti pingping ti baketna sa limmugan iti kotse. Pinagandar ni Sarhento de la Cruz ti lugan. Madamdama, pampanurnorendan ti EDSA.

Apay a kayat a kapatang ni Col. Oandas? simmiplot iti panunotna. Adda kadi pakainaigan ti binuangayda a gunglo?

Pinidutna ti nakupin a pagiwarnak iti abayna. Limmidem ti rupana idi maitangkarang iti matana ti paulo ti damag: Riwriw ti nagrali iti Liwasang Bonifacio!

Marugian kadi manen a maiparukpok ti dara iti kalsada ti siudad? naitanamitimna.

(Maituloyto)