Footer

SARITA: Awan ti agbilang a di agpullo (Maikadua a paset)

“Dayta ngarud ti ikitaantayo ita ti solusion,” binagi met ni Konsehal Omar.

“Ania ngata no yad-adutayo ti grupo dagiti agronda?” insuhestion ni Angkel Dexter, ti kaubingan ken tsikboy kadagiti tanod. “Uray tallo laeng, Kap. Maysa iti Purok Amianan, kasta met dita Abagatan. Ket ti maikatlo, iti haywey.”

“Mayatak iti kuna ni Atanud,” inkanunong ni Konsehal Teody. Nalpasna ti kinamaestro ngem dina pay naipasa ti eksamen iti namitlon a panangpadasna. Idi nauman, nagtarayen a konsehal ket naglayus ti botosna. “Ken tapno nasaysayud, ania ngata no aramatentayo ti teknolohia, Kap?”

“Ania ti kayatmo a sawen, Konsehal?”

“Usarentayo ti selpon, Kap. Mangkitatay’ iti area-tayo ti talkentay’ unay a lumugar. Ket isu ti mangi-text kadatayo no adda karkarna a mapaliiwda iti yanda. Kas koma kadagiti umanaw-aw nga aso…”

“Napintas dayta a napanunotmo, Konsehal,” kinuna ni Uliteg. “Ania, mayatkayo kakadua?”

Nagwenda amin.

RINABIIN  a rummuar da Uliteg. Idauluanna dagiti agronda iti haywey. Ni Met Konsehal Teody iti amianan idinto a ni Angkel Ron iti abagatan. Ngem makalawasen a kasta ti ar-aramidenda, awan pay ti nakemmegda a baribar ti kararuana

“Nakautobda met la siguro,” kinuna ni Uliteg kadayta nga agsapa.

“Sapay la koma, Lakay,” kinuna met ni Ikit Iyang. “Pagdandanaganka la unay no kasta a rummuarkayo.”

“Napabutnganda  siguro iti kaaddayo nga agronda, Uliteg,” insampitawko. “Wenno agsisiimda laeng iti napintas a gundaway sa umatakeda manen?”

“Ania ti kayatmo a sawen, Kaanakan?”

“Baka ‘ton isardengyo ti agronda, Uliteg, ket aggunayda manen.”

“Sammet ngata,” kampante ni Uliteg. “Adu ti pinusgak nga agsiim…”

Ngem iti maysa nga agsapa, addayta manen ni Konsehal Itong nga umanangsab nga immay nagibrodkas. Nabtak kan’ ti lima kadagiti street lights.

“Aglablabesdan!” intebbag ni Uliteg.

“Ania ngarud ti aramidentayo, Kap?” inkudkod ni Konsehal Itong. “Adu payen dagiti mangmangngegmi a sao a dika kan’ epektib a lider! Problema ti barangay, dimo kano ammo a solusionan!”

Nangemkem ni Uliteg. “Nasiribda met. Inranada nga adda napanantayo,” inngilangilna.

Dinar-ayan da Uliteg ti bisperas ti kasar ni Lakay Eddie a Hawayano idi rabii. Immayna in-landing ni Manang Alma a karissabong.

Napanda amin nga opisial da Uliteg tapno awan ti makuna ti agpasken uray payen dagiti kalugaranmi. Ngem isu met ti innala a gundaway dagiti buong-ti-ulo da Uliteg.

“’Bagam kadagiti kalugarantayo nga adda miting ‘ton bigat ti malem,” kinuna ni Uliteg.

“Wen, Kap!” inyisem ni Konsehal Itong.

Ngem anian a suronko ta maymaysa metten nga slice ti bread ti imbatina nga inkape iti apaglukat la itay a tinapay.

Binaonnak ni Uliteg a mapan agala iti leddeg iti buyonda idi rummuar a mapan makiboda. Kayatko ti sumurot ngem inatipanak. Sabagay, addanto met latta ketdi yawidna.

Paborito ni Uliteg ti leddeg aglalo no kasta a lepleppas a nalanitan ti boksitna.  Pangdismolar iti taba, sangkakunana.

Nanam-ay ti agala iti leddeg iti buyon da Uliteg ta adda impasokna a bulong ti niog a pagkaptan dagiti leddeg. Dayta la mangiyaon ket presto, agpuroskan iti leddeg.

Apagbiit a nakaalaak iti dua kalteks. Iti itatakdangko, isu met ti pannakasaripatpatko iti grupo da Manong Apping. Sumalsalogda iti buyon ni Lakay Andoy. Nakaisakbatda iti pagkoriente.

Ti grupo da Manong Apping dagiti barrairong a babbaro iti haywey. Awan panggedanda ngem agkakaimas dagiti pulotanda no kasta a maranaak ida nga agiinum iti tianggi da Anti Sheng. Di man la tubngaren dagiti nagannak kadakuada ti aramidda. Kasano, awan met panawen dagitoy kadagiti annakda. Napatpateg ti sugal kadakuada.

Naglingedak iti pinuon dagiti bayog iti suli ti buyon ni Uliteg. Tallo kadagiti barkada ni Manong Apping ti timmaneb. Nagbati ni Manong Apping, ken dua pay a kaduana, iti sang-at. Taliawda a taliaw.

Agsiimda la ketdi ta amangan no umay sumarungkar ni Lakay Andoy ditoy buyon.

Nasiribda met, nakunak. Iranada nga adda agpasken, ket adda sadiay dagiti opisial, sada agsibrong.

Dua a dalag ti nakorienteda. Daras nga insakoda ket napandan. Nagawidak metten.

Inestoriak ti nakitak ken ni Uliteg idi mangrabiikamin. Igado, adobo ken leddeg ti sidami. Saanen a kutien ni Uliteg dagiti karne. Nauman iti bodaan. Ngem permi ketdi ti pamsaakanna iti leddeg.

Kasta unay ti isem ni Uliteg iti naammuanna. A nakaburburtiaak!

(Adda tuloyna)