SARITA: Awan ti agbilang a di agpullo (Maudi a paset)

SIMMUROTAK ken ni Uliteg idi agpa-auditorium kadayta a malem. Adun dagiti nadanonmi a kalugaranmi. Kinse minutos pay sakbay ti naituding nga oras ti miting. Nagpuestoak iti likud ti tallaong.

Nairugi ti miting. Imbatad a dagus ni Uliteg ti makagapu no apay a nagpamiting.

“Kiddawenmi koma ngarud kadakayo, Kakabsat, ti panagtitinnulongtayo tapno marisut daytoy a problema ti barangay,” kinuna ni Uliteg.

Timmakder ni Lakay Mando. “Ne, Kap, apay ngay nga ipasayo ti rebbengna a trabahoyo?” inkusilapna. “Isu ngarud nga impatugawdakayo tapno kitaenyo ti pagsayaatanmi!”

Uray la limmabbasit ni Uliteg.

“Agpayso ti kinuna ni Kasinsin,” impukkaw met ni Baket Liba. “’Nia laengen ti serserbiyo nga opisial no diyo met maannong ti akemyo? Awan mamaay ti ipapasueldomi kadakayo!”

Ne, adda met utek ni Baket Liba, naisipko. Kuna ngamin ni Ma’am Judith a maestrami idi iti Aralin nga agtaud kano kadagiti buis ti umili ti sueldo dagiti opisial. Ngarud, rumbeng a supapakanda babaen ti napudno a panagserbida. Ngem sabagay, damagko ket nagmistra kan’ met idi iti kinder.

Di pay nakasungsungbat ni Uliteg, addayta manen ni Lakay Mando. “Ibagayo laeng, Kap, no diyon kabaelan ti mangidaulo tapno ammomi ti ar-aramidenmi.”

“Nagalas daytoyen a lakay,” indayumudom ti maysa nga ina iti sanguanak.

“Wen ngarud, ‘Birat,” naisungbat. “Nagsayaat ti sasawen ni Kapitan ngem dayta ketdin mangbarbarusngi ti ammona. Sumangkamaysa met dayta a Baket Liba. Koma met no di ammo a diamper ti korienteda!”

“Saan nga iti dayta, Ama,” kinuna ni Uliteg. “Ti laeng kayatmi koma ket isu ti panagtitinnulongtayo.”

“Kapuyak kunam ketdi, Kap!” naipukkaw. Nalasinko ni Mang Danny nga uliteg ni Manong Apping a naggapuan ti timek. “’Bagayo ketdin nga agpayso no dim’ kaya ta siakon ti agtugaw!” Sa pimgaak iti uray-la-nga.

Nagkakatawa ti tallaong.

Sabali daytoyen, naisipko. Pagtitinnulongandan ni Uliteg. Agkakabagian da Lakay Mando, Baket Liba ken Mang Danny. Kabagian met ida ni Mang Selmo a nakalaban ni Uliteg iti kinakapitan idi 2007.

Insenias ni Uliteg kadagiti tanod a yadayoda ni Mang Danny. Madlaw pay ngamin a nakainum daytoy.

Intuloy ni Uliteg ti nagsao idi awanen ni Mang Danny. Adu ti nangikari kenkuana a tumulongda iti pannakarisut kadagiti agdama a parikut ti barangay.

RIMMUAR manen da Uliteg kadayta a kidem ti rabii. Pasado alas onsen idi makasangpet. Apaghusto a nalukagak ta nagtaul ni Labang. Kunak no addan agtakaw kadagiti baud ni Uliteg.

Damag iti kabigatanna ti pannakatiliw da Manong Apping. Naaktuanda kano dagitoy a mangpagpag-ot kadagiti nabatbati a mula iti Barangay Garden. Adda kano nangiteks kada Uliteg ti kaadda ti grupo da Apping iti asideg ti garden.

Ngem pinalubosan met la ida a dagus ni Uliteg idi agkarida a didan ul-uliten. Ngem ketdi, pinagdalus ida da Uliteg iti garden tapno mulaanda.

Kabigatanna, nasapa nga immay ni Anti Alling. Natakaw kano ti uppat a manokda.

“Adda kadi atapem?” inamad ni Uliteg.

“Awan, Kap.”

“Ala, dika agdanag ta paimbestigarko ti amin,” impasigurado ni Uliteg.

“’La man, Kap. Numona ta tarakenko dagidiay…”

Rimmuar a maymaysana ni Uliteg iti karabianna. Dinan inuray dagiti kaduana.

Kabigatanna, nasarakanda laengen da Manong Apping a nakaraked iti dua a poste ti CAGELCO. Aglitlitem dagiti kammuolda. KIBORKAMI ITI BARANGAY. DIDAKAMI  TULTULADEN! dayta ti naipinta iti badoda.

“Ammoyo no asino ti nangkasta kadakayo?” inamad ni Uliteg kadakuada. Addan sa aminen a pumurok ditoy nagbedngan ti barangaymi ken ti Brgy. Palloc iti daya.

“Dimi nalasin, Kap!” insungbat ni Manong Apping.

“Ta ania ngamin ti inaramidyo?”

“Kababain, Kap, ngem daytoy ti agpayso,” kinuna ni Manong Berting a makaluluasit. “Sinangatmi dagiti pakatmi a sigay dita buyon,” inwagisna iti laud. “Permi a pasagawisiwmi a timmakdang ta adu ti naalami. Idi kuan, kellaat nga adda nangpalek kadakami iti likud. Nakusbokami ta iti patongmi ti pinuntiriana. Dimi nailasin ta nakaabungot. Awan ti naaramidanmi ta siuulawkami pay laeng. Kagapgapumi ngamin a naginum iti balay da Bansong,” maysa kadagiti kaduada ti kayatna a sawen.

“Pinangtaannakami pay, Kap,” diwig a diwig ni Manong Caloy a nagkuna. ”No dikami kano pay la nga agbalbaliw, lalatennakamin iti sumaruno!”

“Paguyodennakami kano iti nuang, Kap!” insaninglot ni Manong Kiko. “No saan, ipaanudnakami kano iti baybay…”

“Gunggonayo!” adda nangilaaw. “Dinakay pay la ngarud inuloyan!”

“Ket ania ngarud ita?” inamad ni Uliteg.

“Isardengmin ti madi nga aramidmi, Kap,” kinuna ni Manong Apping. “Pramis!”

“Ta apay ngamin, a, nga ar-aramidenyo ti kastoy?”

“Kayatdaka koma ngarud a dadaelen, Kap,” ni Manong Berting. “Eleksionto manen ket adda mayat nga umagaw iti puestom…”

Napaisem ni Uliteg. Ammok lattan nga ammona no asino. Ni Mang Selmo la ketdi. Isu ngamin ti maal-alimadamad a sumango manen ken ni Uliteg.

SAANEN nga agpayso a sinunotan da Manong Apping ti aramidda. Dida payen agin-inom iti nasanger.

“Pammutbuteng met la gayam ti kasapulanda!” inyisem ni Uliteg iti maysa a malem a nadakamatko kenkuana ti grupo da Manong Apping. Pakpakanenmi dagiti baudna.

“Nabagas man ti isemyo, Uliteg?” kinunak.

“Kasapulan iti utek iti panangrienda iti barangay, Kaanakan,” kinunana ketdi.#