SARITA: Awan ti agbilang a di agpullo

PAKPAKANEK dagiti baud ni Uliteg idi umanangsab ni Konsehal Itong a sumungad. Kunam no kamkamaten ti sangapulo nga agballa nga aso. Nganngani pay naitikleb idi layawenna ti ruangan. Ayna, umay man ngatan makikape! Kastana ket…

“Ni Kap, Anton?” inyal-alna.

“’Da ‘ta uneg, Konsehal,” kinunak. Insardengko ti obraek. “Apay?”

“’Ibagam man nga addaak,” intugawna iti agrungrungarong a ramut ti mangga iti sikigan ti poltri. “Importante kano kunam.”

“Sumrekka lattan, Konsehal,” kinunak. Kasta met ti awidna no dadduma. Adu pay ti asikasuek.

“Ayabam la bassiten ni Kap,” kinunana ketdi.

Kapitan ni Uliteg Sabas ditoy Ammubuan. Maikadua a terminona itan. Gapu ta agbasbasa ni kasinsin Nathan a bugbugtong nga anakda ken Ikit Iyang idiay siudad ti Tuguegarao, innaladak a kadkaduada. Pagbasaendak kano agingga a makaturposak. Itoy a panagseserrek, first yearakton iti Ballesteros National High School.

Pitokami nga agkakabsat. Marigatan la unay dagiti nagannak kadakami ta kasano ket awan met masnop a panggedanda. Makitaltalon ni tatang. Aglakolako met iti nateng idiay ili ni nanang no kasta a dapon. Isu a kasta la unayen ti yamanda idi imbaga ni Uliteg Sabas a pagbasaennak.

Nadanonko ni Uliteg nga adda dumdumoganna a papel iti lamisaan iti kosina kabayatan ti panagkapena. Imbagak ti kaadda ni Konsehal Itong.

“Pinastrekmo koman, a,” kinunana.

“Intugawna met lattan dita paraangan, Uliteg,” kinunak. “Sigsigud met nga agdiretso lattan. Siguro, a, ket adda immuna a nagkapeanna,” inkatawak.

“Lokoka nga ubing,” inyisem ni Uliteg.

Aglimapulon ni Uliteg. Ngem di madlaw ta ammona a taraknen ti salun-atna. Managwatwat ken naimis iti taraon. Managisem pay, banag a kaykayatan dagiti kalugaranmi ta dida maamak nga umasideg kenkuana.

Nagkuyogkami ken Uliteg a rimmuar.

“Sumrekka pay, a, Konsehal,” kinunana idi makitana ni Konsehal Itong.

“Saanen, Kap,” kinuna daytoy. “Ditoy lattan.”

Intuloyko metten ti ar-aramidek itay.

“Sinapsapam man,” kinuna ni Uliteg.

“Wen, Kap, ta umayko ibaga ‘diay trigardtayo…”

“Apay?”

“Nagrurugitdan, Kap! Awanen ti langlangada uray kapimpintatayo idi napan a lawas. Dagiti met dadduma, natubtobda.”

Nasiputak ti panaglawalawa ti  abut ti agong ni Uliteg. Ammok lattan a makapungtot. Dayta ti pagilasinan ni Ikit Iyang.

Naaramid iti haloblaks dagiti trigard a naipanurnor iti agsumbangir nga abaga ti kangrunaan a kalsada. Namulaan daytoy iti kalamansi. Agsabongen dagiti dadduma. Permi nga ayamuomda.

“Asino ti akin-aramid?”

“Awan ti makaammo, Kap!”

“Aniat’ kuna dagiti tanod?”

“Awan kano met ti nasalamaanda idi rabii, Kap.”

“Imbestigarenyo, Konsehal,” immandar ni Uliteg. “Rumbeng nga agbayadda!”

“Sige, Kap!”

“NAGALAS met dagitan a kalugaran!” impugtit ni Ikit Iyang idi maammuanna ti immayan ni Konsehal Itong a nasapa. Aggagao iti pammigatmi.

“Wen ngarud,” inngilangil ni Uliteg. “Asinoda, ‘ya, ngata?”

“Asino pay no di dagiti mammartek!”

“Maammuakto laeng, agsaganada!”

Ngem di pay nalnalpas ti imbestigasion da Uliteg, sabali manen a parikut ti immay inyangsab ni Konsehal Itong kadayta nga agsapa. Natagtagbat kano dagiti dadduma a pinuon ti kalamansi! Nagdiretsuanna ti nagkape. Uray la nakidkid ti sobrami a palaman idi pulagidanna met ti pandesal a pabulonna. Ania ketdin, aya, daytoy a konsehal a pannakaradio ni Uliteg!

“’Nia metten!” immesmes ni Uliteg. “Marmaruamdan!”

“Ania ngarud ti aramidentayo, Kap?” inkabukab ni Konsehal Itong.

“Bagaam amin a tanod ken konsehal. Emergency meeting kunam,” imbilin ni Uliteg.

Kalpasan ti maysa nga oras, addan dagiti napaayaban. Binaonnak met ni Uliteg a napan gimmatang iti meriendaendanto.

“Pudno ‘ta sinaom, Konsehal,” kinuna ni Uliteg ken ni Konsehal Ulling a nasangpetak. “Adda la ketdi mangsubsubok iti lideratok.”

“Dayta ti masapul a maammuantayo, Kap!” insarurong ni Angkel Ron a hepe dagiti tanod. “Kanayonkami met nga agronda ngem no apay a dimi masalamaan ida. Paramanak koma ida ket iti kalkalainganna. Kitaek man no dida agbulbullagaw ditoy bellang a batutak a sagut pay ‘di lilong!”

“Iti met panangutobko, Kap,” insarurong ni Lilong Fabian, ti kalakayan kadakuada a konsehal, “kayatda nga ibabain ti lideratom iti kasta adda pamkuatanda a mangpadakes kenka kadaytoy masungad nga eleksion ti barangay.”

Nasuroken a sisenta ni Lilong Fabian ngem naparagsit pay laeng a lakay. Sumurotsurot latta nga agronda iti rabii.

“Dakkel ti posibilidadna dayta, ‘Tang,” kinuna ni Uliteg. “Saan la ngarud a siak ti puntiriada. Datayo amin…”

(Adda tuloyna)