Sarita: Basolko kadi? (Maudi a paset) | Tawid News Magazine - Weekly Ilocos News 📰

Basolko kadi? (Maudi a paset)

“Apay?” kinunana apaman a nakabawi ti pannakaiduronna. Masidsiddaawan.

Agluplupiasen ti naggian iti basok isu a masapul nga ipattog diay dadduma. Intakderak. “Saludsodem ta bagim no apay, Manang. Gapu iti kaaddam, sika la a sika ti makitkita. Amin a dayaw, ayat ken atension mapan kenka. Mangibatika met a, di mo la a bukbukodan.”

Inarakupnak iti nakair-irut. “Ading ni agpanunot iti kasta, diak maaramid. Ania ti aramidek tapno mamatika kaniak?”

“Ti agpukawka iti biagko,” imbagak.

INKUSAYKO  ti ulesko ket nagdagsen nga imbangonko ti bagik. Sinapulko diay tsinelasko iti sirok ti katrek babaen ti panaglawlaw dagiti sakak. Insapinko. Turongek koma ti banio ngem apaman a nalabsak ti pagattao a sarming, nagsardengak. Kinarawak dagiti matak. “Basolko kadi?” kinunak bayat ti panangsagsagidko kadagiti eyebugsko.

“PUMANAWKAYON  a di pay nagpakada?” timek ni  Tatang nga agtimtimpla ti kapena sadiay bassit a lamisaan, uppat a metro ti kaadayona iti ‘yanko. Napan ni Manang iti ayanna ket inagkanna ti pingpingna.

“Tang, mabalin a makasaoka?” inyarasaasna. Nagtugawda a dua.

Nagtalinaedak a sitatakder.  Sipsip a talaga! kinunak iti bagik.

Pasaray tumaldiap ni Tatang iti ‘yanko. Tiltiliwenna ti matak. Idi mautoyanak, tinallikudak isuda. Rummuarak koman ngem adda nangigawid iti imak. Napasangoak.

“No adda man saksakiten ta nakemmo, iruarmo,” kinuna ni Tatang bayat ti panangig-iggemna iti imak.

Diak nalapdan ti bagik ket diak napupuotan nga insawang dagiti an-aneng-engko.  “Sika’y ti makagapu. Dakayo ken dayta dungdunguenyo nga anak.”

Napanganga ni Manang. Nagtarayak a rimmuar iti balay nupay diak ammo ti pagturongan dagiti sakak. Nadanonko ti kalsada. Dagus met a summurot ni Manang. Awit-awitna dagiti libro ken bagmi a nangawag iti naganko. Idi timmaliawak, dakkel nga aniniwan sadiay likudanna ti nangpadakkel kadagiti mulagatko. Nakaparpardas a tumartaray…… Naiwaris dagiti libro ti kalsada.

NASEDSED payen ti suelo a pagbadbaddekan ni Tatang. Agsublisubli ti matak a mangsursurot ti tunggal pagturongan dagiti dapanna. Kellaat a naglukat ti ridaw ti siled a nagpuniponan ti adu nga oras ken panawenmi. Natayag a nakakagay iti puraw ti inluana. Nagdardaras a simmabat ni Tatang.

“Dok, ania’t kondisionna?” agpigpigerger pay ti bibigna a nagkuna.

Imparabaw ti doktor ti imana iti abaga ni Tatang. “Napakaruan ti patongna ket nasken a maikkat ken masuktan a dagus ti kidneyna tapno maisalbartayo. I am sorry.”

Nagtupak ti lubong ken ni Tatang. Napakapsutan la unay iti nangngegna.

Mabalin a mapukaw ni Manang? Mapukaw isunan ti biagkon. Dayta ti nabayag a tarigagayko, di met? Ngem apay a diak makarikna ti ragsak? Apay nga ad-adda a dagsen ti nakem ti bumalbales kaniak? Agpigpigerger dagiti tumengko a timmakder ti bangko a pagtugtugawak. Tinurongko ti siled. Naklaatak ta nagarubos dagiti luluak ti innak naimatangan. Ni Manang agngangabit ken ni patay…

Bayat ti innak panangmatmatmat iti langa ni Tatang ken ti nakitak a ladawan ni Manang, maysa a desision ti nabiag iti panunotko. “Nasken a maipatungpalko,” kinunak.

Anian a kinaragsak ni Tatang idi maammuanna nga adda nagboluntario a mangidonar ti maysa a kidneyna para ti isasalbar ni Manang. Palalo ti panagyamyaman ni Tatang.

Naipatungpal ngarud ti pannakaopera ni Manang ti maikaduana a rabii sadiay ospital. Agarup lima nga oras ti kinuna ti doktor ket maysa a mapugpugsat nga anges ti naisalakan.

“Dika unay nga agbanbannog ta saan a kas idi ti bagimon ta naikkatanka iti maysan,” kinuna kaniak ti doktor apaman a maeksamennak.

“Yes, dok. Thanks.”

Uray la  dimmakkel ti matak idi kellaat a naglukat ti ridaw. Mata nga adda danum nga nganngani agtinnag ti simmabat.

“Sika?” arig di sumngaw nga inyebkas ni Manang.#