Footer

SARITA: Damo a panagukrad (Umuna a Paset)

DAMO a sabong, inkallatik ti panunotna. Kasapulan nga ilalaen!

Ngem immalsem ti rupa ni Manang Espie idi mataldiapanna ti alimbubuyog nga umas-assibay iti masetasna. Ginammatanna ti iit a sagad sana insaplid. Ngem saan a napuntaan ti alimbubuyog ket bimmanesbes nga immadayo.

“Saankan nga agsubsubli!” indayamudomna. “Saan a sika ti nakaisangratan ti sabong ti rosas!”

Naukas met laeng ti karenken iti muging ni Manang Espie idi insangbay ti pul-oy ti apagdillaw nga ayamuom. Dua lawasna laeng iti ospital ngem adun ti rimmukbosan ti masetasna. Ita, addan sabongna. Nangigis ti isemna. Sino ti mangipagarup a maparukbosna daytoy sangkaputed a sanga a napidutna laeng iti abay ti basura?

Napnuan dungngo a nangappupo iti sabong. Ngem dina nakita ti siit a liningdan ti bulong ket nariknana laengen ti natarumamis a tiradna a naidalubdob iti dakulapna. Napaannay. Piniselna ti sugatna agingga iti timbog ti dara. Simmuknor ti saem.

Minatmatanna ti siit. Napaisem idi agangay. Naisipna: dakkel ti akem ti siit iti pannakasaluad ti sabong!

Agdaydayyeng a nangbagkat iti paso sa simrek iti nailet a siledda ken ni Aleta. Indissona ti paso iti bassit a lamisaan iti abay ti tawa.

Ditoyka, kasla ubing a kinapatpatangna ti masetas, nataltalgedka ditoy uneg.

Rummuar koman ni Manang Espie idi mataldiapanna ni Aleta. Napirpir ti bibigna. Kasla maladaga ni Aleta a nakakurunikon iti papag. Dinan napuotan no ania nga oras a simmangpet. Aglaklako ni Aleta iti balut ken sigarilio iti sanguanan ti Diana’s Greenfields.

Nagbiit nga aglabas ti panawen, inkallatik ti isipna idinto a kasla adda batumbalani ti nakadaya a pakabuklan ni Aleta a nangtaringguyod iti matana. Nagintek ti matana iti simmantita a rupa, sa iti agpangato-agpababa a munturod ken iti narakab a patong a kinepkepan ti maong a shorts. Tumapogton ni Aleta iti maikasangapulo ket lima a tawenna. A, adunto nga Adan ti paggurigoren dayta a pammagi! nakunana iti nakemna.

Ngem naulpan ti rupa ni Manang Espie idi sumiplot iti panunotna ti naminsan nga inkissiim ni Mr. Arreola, ti manager ti Diana’s Greenfields: Balasangen ni Aleta, Espie!

Dayta a paripirip ti nangburibor iti nakemna ken nakabuklan ti maysa a pangngeddeng: akkalenna ni Aleta iti daytoy nga impierno ita ta nasapa pay. Dina kayat a lak-amen ni Aleta ti naglasatanna. Dina kayat a maalian ti balasangna iti nagarampang ken nariribuk a panagbiag dagiti babbai nga agrikrikos iti lubong ti nalamuyot nga ayug, arak ken panaginkukuna!

Dayta ti gapuna nga arig sirutenna ti sinturonda nga agina tapno makaurnong laeng. Uray sadino a lubong ti pakaisadsadanda, makaadayoda la ketdi iti daytoy nga impierno a nakaigarangugonganda.

Ngem kasla mangsutsutil ti panawen. Gapu iti pannakaarbisna iti panaglabana, nagsakit. Nagtinnag a pulmonia. Intartaray ni Aleta iti ospital. Naguyod ti urnongna agraman ti iduldulin ni Aleta iti dua a lawas a panaggianna iti ospital.

Nagsay-a a bulon iti yaangesna iti nauneg idinto a dina napupuotan nga inaprosan ti dakulapna. Naisipna: apay nga adda maidalubdob a saem sakbay nga agukrad ti tarigagay?

Rimmuar iti inaladan. Pinanurnorna ti kibbakibbakol nga agpaabagatan a kalsada. Nakarikep pay laeng dagiti tawa dagiti malabasanna a balbalay. Ditoy Barangay Dos, kasla panniki dagiti agindeg a mailibay iti aldaw sadanto agdakiwas iti rabii.

Matuparnan dagiti nataratar a pasdek-pagpalpaliwaan. Adda iti maikatlo iti kannigid ti Diana’s Greenfields.

Nagmattider ni Manang Espie sana tinangad ti kasla padeppa a karatula iti ngatuen ti ruangan a napalikmutan kadagiti babassit a bombilia ken nakaisuratan babaen ti nalabaga a letra ti nagan ti beerhouse. Iti abay ti nakarikep a ridaw, naipaskil ti pakaammo ti kaadda ti floor show a pakaitampokan ni Mystery Dancer. Gimmick ni Mr. Arreola tapno ad-adu ti maawis nga agpalpaliwa iti beerhouse.

Immanges iti nauneg sa bimmallasiw. Nagna iti sikigan. Iti likud, dua a siled ti naiyapiring iti kusina. Ditoy ti pagturogan dagiti sangapulo a babbai nga agpapaay iti Diana’s Greenfields.

Nagmusiig idi makatadog iti kusina. Natuontuon dagiti pinggan ken baso iti sementado a lababo. Naiwarawara dagiti rugit iti birri a suelo. Timmaray ti nadugsak a bao nga agmarmarutmot iti taraonna iti basura.

Sangadanganen ti kangato ti init iti muging ti Bantay Abut idi makainnaw ken maidalimanekna dagiti lunglongan. Innalana ti buyboy iti likud ti rikep sana sinagadan ti suelo.

Nagpusipos idi makangeg iti danapidip iti likudanna. Ni Janet.

“Nasapaka man a bimmangon ita, Janet?” nakunana.

“Adda koma ibagak, Ate,” kinuna ni Janet.

“Problema kadi?”

“Ni Ernie… dagdagennak nga agtiponkamin.”

(Maituloyto)