Daytoy a Dagaang

Sarita ni Jobert M. Pacnis
(Tuloyna)

Adda panganan iti sango ti pasdek. Kinitak dagiti naka-display a masida. Nakalanlanit ti pannakaluto dagiti karne. Uray dagiti nateng!

“Mano ti maysa nga order ti karne?” sinaludsod ti adda iti masanguanak a maysa a pamalkaten a baket nga agedad iti nasurok a singkuenta iti pattapattak.

“Singkuenta, mam,” insungbat ti pamalkaten met laeng a baket nga akinkukua ket ngata iti panganan.

“Kasano kaadu ti maysa nga order?” nasaludsod manen.

“Kasdiay, mam,” naitudo lattan ti ise-serve ti kaduada a bumalasitang iti maysa kadagiti lamisaan.

“Nagbassit metten,” insanamtek ti sarsarunuek.

Wen nga agpayso, kasla laeng dua kutsara ti sangaorder nga igado idi kitaek ti kinuna ti aglako.

“Mahal ang karne at rekado, Lalo na ang bawang… tatlong daan isang kilo!”

“Ket ‘ta gulayyo?”

“Beinte singko. Ganun karami ang isang order,” kinuna payen ti aglako ta amkenna ket ngata nga amaden manen ti sarsarunuek no kasano kaadu ti maysa nga order.

Isu la nga isu a tagibassitek.

“Nagnginan…” inwingiwing ti baket iti sangok. “Saan ngaruden.” Ket timmallikuden a nagturong iti pasdek.

“Eh, di ‘wag!” indayamudom ti aglako. “Makakain mo ba pera mo?” inkusilapna ti likudan ti baket. “Ano sa’yo?” inkitana kaniak.

“Madamdamaakton, ate,” kinunak. “Tinitingnan ko lang kung meron ako ‘nung paborito kong ulam…” Ngem kinaagpaysuananna, kaslaak met iti pamalkaten a baket a mabassitan ken manginaan la unay iti maysa nga order ti masida. Nagrigat ti agsapul ti kuarta, giem!

“Ano ba ‘yun?” dinamag ti aglako. “May pinapaitan kami dun sa kalan.”

“’Yun, ate,” impatiray-okko lattan. “Adunto met pay la siguro damdama no maalak ti rantak dita NSO.” Nupay ti koma dinengdengna a binalsig a rabong ken saluyot a nasagpawan iti kurkuros ti kayatko a sidaen. “Balik na lang ako mamaya…”

Ti isemna!

Ngem nangpidutak lattan iti dua nga skyflakes iti aglaklako iti sidiran ti panganan. Inyawatko iti babai nga aglaklako ti nabukel a beintek. “Magkano?” isu pay laeng ti panagdamagko.

“Sampu isa, kuya.”

Urayak la napakiet. Ngem ania pay, alangan nga isublik ket nalpaskon a pinidut. Nakaro met la unay ti gatad ti magatgatang iti sango dagiti pampubliko a pasdek. No choice ta adayo met ti sabali pay a paggatangana nalaklaka bassit. Agtraysikelka pay a mapan iti highway iti asideg ti CVMC.

Napardas ti pannagna ti pila. Addaakon iti uneg a nakatugaw. Pasado alas nueben. Iti monitor: NOW SERVING 160. Naikkat ti kettangko a naguray iti ruar ta malaksid a nakatugawakon, nalamiis pay iti uneg gapu dagiti naimuntar nga erkon. Sangapulo dagiti adda iti sango ti cashier a nakapila. Lima a kliente ti maawagan kada agbaliw ti numero it monitor.
Asidegen a mai-flash ti numerok idi rumimbaw ti timek ti maysa kadagiti kliente a makipilpila iti sango ti cashier.

“Follow-up lang sa akin, a. Tinatanong kita, miss,” kinuna ti agedad ngata iti kuarenta a babai nga aglanglanga a propesional, “kung meron na dito ‘yung kailangan ko but you ignored me!”

Napasardeng dagiti padak a nakatugaw kadagiti kudkuditenda iti selpon kada tablet-da. Naiturong amin nga imatangmi iti babai nga agrekreklamo.

“Tapos ngayon nakukulitan ka na?” ti latta babai. “Kanina pa ako pabalik-balik dito. Sinabi ng isa kanina sa isang window na meron na ‘yung request ko nun at i-follow up ko lang dito sa iyo… ngayon sasabihin mo na wala? Ano ito, pinagpapasahan ninyo ako? What kind of service you are extending to us?”

Nakamisugsog ti cashier a maseknan. Permi a pakissiimda iti kaabayna iti window. Kasla awan laeng kadakuada ti mapaspasamak a panagalburoto ti babai.

Ngem di nagpatingga ti babai. Sinangona dagiti dua a mangmanmanehar iti pila iti sango dagiti window idi kasla di maikaskaso. “Where is the office of the highest official here? I would like to talk to him!”

Maysa a lalaki nga empleado ti rimmuar iti maysa kadagiti ridaw iti masikigak. Masiguradok nga empleado gapu iti unipormena.

“Bakit, ma’am? Anong problema?” naalumamay ti timekna nga immasideg iti agrekreklamo a babai.

“That cashier is not courteous enough to deal with client,” imbullad ti babai a nangitudo iti irekreklamona.

“Punta tayo sa office, ma’am, at pag-usapan natin ang problema… kasama ang inirereklamo ninyo,” kinuna ti lalaki.

Ket nagturongdan iti rimmuaranna itay a ridaw.

“Nakaro ngamin unay dagita dadduma nga empleado no dadduma,” intanabutob ti kaabayko. “Kunam no asinoda!”

(Adda tuloyna)