SARITA: Gasat iti Lukong ti Dakulap (Maikatlo a paset)

Dakkel ti ayatko nga agtuloy iti kolehio ngem namnamaek a didakon pagtuloyen da Angkel Isio.  Iti Manila ti pagbasaan ni Insan Angie. Medisina ti alaenna.

Makalawas sakbay ti panaglulukat ti klase, pinaayabannak ni Angkel Isio.

“Isaganam dagiti aruatem. Sumurotka ken ni Angie,” kinunana. “Kayatko nga adda kaduana. Ammom metten, saan a naruam nga agmaymaysa. Napia nga addaka a mangilaba ken para lutona.”

Imbaga ni Angkel Isio a pagbasaennak iti secretarial kas gunggonak iti panangkadkaduak ken ni Angie. Immannugotak a dagus nupay saan a dayta ti kayatko nga adalen. Abogasia ti arapaapko a tun-oyen a kurso.

Nangabang ni Angkel Isio iti maysa a kuarto iti asideg ti pagbasaanmi tapno saanmi a problema ti aglugan pay.

Ap-apalak ni Insan Angie. Agsasarunson dagiti paw-it da Angkel Isio. Masansanda pay umay bisitaen. Rummuarda iti bigat ket malemton a sumangpetda. Kas impadpadamag ni Insan Angie, napanda nangaldaw iti mall, sada nagbuya iti sine.

Adda met it-ited ni Angkel Isio nga alawansko. An-anusak ti kinabassitna. No dadduma, diak payen agmerienda tapno adda maurnongko. Adu dagiti kasapulak iti klase ket napia la nga adda madadaan a busbosek. Mabainak met nga agpasig nga umutang ken ni Insan Angie. Pagsayaatanna ta ikarawaannak no kua ni Insan Angie.  No dadduma, awagannak iti selponna tapno pagmeriendaennak. Impadawatna kaniak ti naumaanna a selpon tapno adda pangtawagak kenkuana no kasapulak. No kasdiay a nalabon ti ited ni Angkel Isio, pasaray iragpinannak nga igatangan iti tisirtko. Napalalo a yamyamanko kenkuana.

“Asino pay ti agsinnakit no di data a dua?” inkatawana no kasdiay a makitana a maka-luaak no adda isagutna kaniak.

“Asino pay ti agsinnakit no data a dua?” inkatawana no kasdiay a makitana a makaluaak no adda isagutna kaniak.

NARUROS dagiti bulan iti kalendario. Kaasi ti Dios, nangato ti promediok. Ngem adda nadlawko ken ni Insan Angie. Masansan nga aglangan iti klasena. Ngamin, no agpasiar iti kaserami dagiti barkadana, masapada a rummuar ket rabiinton no sumangpet. Iti naminsan, naangotko nga agat-arak. Nasursurona payen ti agsigarilio.

Diak ammo no nakaammuan ni Angkel Isio ti ar-aramiden ni Insan Angie. Maysa a malem, simmangpet iti kaserami ket inungtanna ti anakna. Nairamramanak pay a naglak-am iti saona.

“No dimo maipamaysa ti agbasa, nasaysayaat laengen nga aggawidkayo,” imballaagna kadakami.

Inkari ni Insan Angie a dinan ul-uliten ti inaramidna.

Sumagmamano a lawas a nagtalna ni Insan Angie. Ngem di mabayag, nagsubli manen ti madi nga aramidna. Kimmaro pay ketdi. Agpupokda iti dagusmi ket agsigarilioda iti marihuana wenno agsusop iti shabu. Inallukoynak a maki-pot session kadakuada ngem nagkitakitak. Diak kayat a mailuodak iti droga. Adun ti nabasbasak a nadadael ti masakbayanda gapu iti droga.

“Madagannak, Insan, amangan no madamag ni Papangmo ti ar-aramidem,” nakunak kenkuana.

“Dika madanagan, awan ti pakaammuanna ta nalimed daytoy ar-aramidenmi,” kinuna ni Insan Angie.

Maysa a malem, nadatngak ni Angkel Isio iti dagusmi. Sinumarianak.

“A-awan met ti napalpaliiwko, Angkel,” inlibakko.

“Ala, nasayaat no saan nga agpayso ti nadamagko,” kinunana.

Nasapa a simmangpet ni Insan Angie iti dayta a malem. Nalimed ngamin a pinatulodak iti text nga adda ni Papangna iti kaserami.

Ammo ni Insan Angie ti pagkapsutan ni Angkel Isio. Idi dinillaw ni Angkel Isio no apay a rimmapis, kinunana a mapuypuyatan nga agbasa kadagiti leksionna, sana innayon nga agkurang dagiti abastona gapu iti kaadu ti paggastuanna iti klaseda.

Idi agpakada ni Angkel Isio, nangigis ti isem ni Insan Angie ta nawadwad ti impapetpet ti amana.

Iti panaglabas dagiti aldaw, nailuod ni Insan Angie iti dakes a barkada. Pinalagipak ta tumawagtawag ni Angkel Isio nga agdamag kaniak no kasano ti panagbasana.

“Dinak biangan!” inwitwitna kaniak. “Ammok ti ar-aramidek!”

Naklaatak iti kinagubsang dagiti balikasna. Nagbaliwen a naminpinsan ni Insan Angie. Nailuoden iti droga.

Maysa a malem, nasangpetak ni Insan Angie a nakamulengleng iti tawa. Dinamagko no adda problemana.

Kellaat a naganug-og. “M-masikogak,” nakunana.

Naklaatak. “Sino ti ama?” inamadko.

Nagwingiwing idinto a nagarubos ti luana. Napagsasaipko dagiti pasamak. Adda pot session a dinar-ayanda nga agbabarkada. Talloda a babbai. Uppat dagiti lallaki. Idi naulawdan, nagsasalada. Madamdama, naguyosda amin ket nagsisinnublatda a kinanaig dagiti lallaki.

“D-diak ammo no sino ti ama ti adda iti saklotko,” nagtigerger ti timek ni Insan Angie.

(Maigibusto)