SARITA: Kas iti panawen (Maikadua a paset)

Nariknam a mangrugin a kumaem ti kuddot ti darang ti nakamulagat nga init ta nakasandoka laeng ken nakaputot iti maong ken nakasapatos iti goma.

Dinamagmo iti bagim: Agsubli kadi ti arapaap a di naragpat, iti sabali a panawen, iti sabali a paset ti lasag ken dara? Dimo ammo no maragsakanka wenno saan. Nalabit a maragsakan, nalabit a saan. Maragsakan ta no agmata daytoy nga arapaap, dakkel a dayawmo nga amana ta maaddaanka iti padi nga anak. Dika maragsakan ta ammom nga awan makaammo iti masakbayan.

“Apay a kayatmo ti agpadi, aber?” diretso dagiti pamulagatem iti paningkitenna. Ta mamatika a ti mata ti tawa ti kararua. Nasken a tumamdagka kadagiti matana bareng no matannawagam ti kinasinseridadna. Ti kinasenseridadna ti isyo ditoy a nasken a maidasigmo.

“Astig!” kinellaatna a pinusipos ti kararet ti baniitna, nagkumpakumpas dagiti maselan a takiag, ket kinatawaannan ti agkulkulipagpag a sangadakulapan nga ikan iti murdong ti banniit. “Yes, maikapito!”

Naannad a nangikkat ti lumabaga nga ikan sana inkabil iti linaga nga alat ti agsagap a naipasanggir iti nakailad nga uppat nga agpa ngata a bagi ti niyog.

Nakapadawika met. Maikalima. Kasla tangan ti ima manen. No mabalbalin dimo koma alaen dagitoy ngem inkapilitan tapno adda met  makuna a nabanniitam.

“Dakdakkel pay ti pigar tay kaal-alak ngem dayta!” nagellek toy anakmo.

“Masigang pay ti ipon a kasla mukat, anianto la ket daytoyen!” imbalesmo.

“Awan ti siit ti ipon. Dayta ket kasla kasikkil ti steel brush ti siitna,” nagpaggaak manen.

Sinukatam iti dakdakkel a sima ti banniitmo. Dakdakkel met ti inkabilmo nga appan a bagi ti inukisam a binalo a pasayan iti gagemmo a dakdakkel itan ti mabanniitam. Imbalatbatmo ti banniitmo iti kaadalman a paset ti danum a mangrugin nga agmurmuray. Datdatlag ti baybay ta dildilpatanna ti biagmo, a kas iti panangdilpatna kadagiti batbato ken babatting a tangrib iti igid babaen kadagiti sagsasangakammet nga agburak a dalluyon iti yan ti pagay-ayaman-pagdigdigosan dagiti dua a babbalasang a kaanakam ken dagiti dua pay nga annakmo a babbai. Rinupangetam dagiti agkinkinnarera a minibus nga agpaabagatan iti ngatuenyo a kalsada a naitikap iti tumeng ti bantay. Kumurikor iti lapayagmo ti ungorda ken napuskol ti ipugsoda a gita a samal ti lubong. Pinug-awam ti barukongmo. Iti itatangadmo, awanen ti nakitam a milat iti asul a langit.

“Saan a napintas ti agpadi…” insintirmo.

“Respectable!” nagbaw-ing ken inradiesna pay iti panangibalikasna.                                               Kaskala napapispisan iti nangngegmo, daydiay uray la nariweng ken nagwengweng dagiti lapayagmo ken nakakita iti tallo nga agtayyetayyek a bituen. Nagpanunotka iti sabali a rason a pangupay wenno pangsuot iti kinasensiridadna.

“Anak, ti padi, saan a propesion–”

“…maysa a bokasion!” inyagawna a kasla ketdin namnamaenna dayta nga imbalikasmo.

“Ayye, ket no angpep laeng ti abito ket diakon kinabaelan, sikanto la ketdin, lukdit!” ngimmato pay ti bosesmo ta kasla napitik dagiti piditpiditmo.

“Nagseminaristaka met aya?” pasikig ti taliawna ket uray la naglibbi ta kasla di mamati. Ugalina ti aglibbi ken agngilangil no adda dina patien a mangngegna wenno buybuyaenna.

“Wen met a. Idta Immaculate Conception Regional Seminary idta Vigan.”

“Sika a. Ngem no siak, kayak! Mas nalalaingak sa met ngem sika, he-he!”

“Ayye, saan a bastabasta ti agpadi. Kasla umusok iti abut ti dagum ti padi. Nalaklaka pay nga adayo nga umusok-usok ti agsangsangdo a nuang iti abut ti dagum ngem ti makapagpadi! Kasta ti kinarigat ti agpadi.”

“Ayos dayta a, saan a boring! I love challenges, you know!”

Kasla napang-or iti baseball bat ti bukotmo ta uraymo la inyarukong ti nangngegmo.

“Nagtaud iti pusom dayta nga ibagbagam wenno iti utekmo?”

“Agpada… Yahoo!” Naggarakgak ta adda manen  sangadakulapan nga ikan nga agbitbitin iti murdong ti banniitna idinto ta awan pay ti mariknam a dimmawi iti banniitmo.

(Adda tuloyna)