Footer

SARITA: Kas iti panawen (Maikatlo a paset)

Nupay kasta, adda dua a nabanal a banag a napadawi ti mugingmo a dakkel a pangublagmo tapno agsanud iti daytoy nga arapaapna.

“Yo! Iti seminario, awan ti VHS!” Ngamin, VHS ti pangigasgastosan ti inunaam kadagiti maurnongna iti alawansna. Kaay-ayona dagiti pelikula nga adventure ken animated films. No saan a gumatang, agupa iti VHS.

Napanganga ti inunaam. Kasla nakangngeg a tuleng. Ngem saan a pulos a nakapalag ti ikan kadagiti ramramayna a pinatibker ti barbel ken grips ken ti binigat a panagpallapallayogna iti imbartengmo a de uno y media a tubo iti bayyabas ken iti adigi ti ruangan a pagibitbitinam iti naihanger a linabaan. Naannad ti panangikkatna ti sima iti ngiwat ti ikan sana impisok iti nganga ti alat-agsagap nga alatna. Dimo kabaelan ti maaramid dagiti ramramayna: ti panangpidutna a kasla pandesal iti rabaw ti lamisaan iti bola ti basketbol babaen ti maysa laeng nga imana. Nasisikkil ken atitiddog dagiti ramramayna.

Nabayag a nauraymo ti sungbatna.

“Urayen a… ania ngarud…”

“Yo! Iti seminario, awan ti country music! Amin a kanta solemnidad…”

“Alleluia. Allelulia….!” nagkanta, sa insublina ti banniitna iti babaet dagiti tangrib.

Kaskala agkabkabukab iti walopulo ket walo nga apro ti manok, nakapapait ti isemmo. Dimon sa ketdi mabugiaw ti arapaapna?

Nalagipmo nga iti naminsan, imbagam nga agbasanto sadiay Philippine Military Academy ta adda met utekenna, natayag, nabisked a pammagi ket bagayna ti agbalin a kameng ti AFP, ken dakkel a dayaw ti maysa nga ama ti kinaadda ti anak a heneral iti armada, ngem nagsuyaab ketdin a kasla daytay panagnganga ti sumikbab a buaya, sa kalpasanna nagsanapsap, kinamangna ti sirok ti bayyabas iti likudan ti balayyo; madamdama pay,  namulagatamon nga  uray la  tallo katukkolen ti kukotna. Impalawagmo pay iti naminsan no apay a naaddaan ken kasano a sumaren ti voltage drop ti komplikado a sirkito ngem dina man la tinaliaw ti nakadippa a libro ni Bernard Grob. Ania ti kaykayatmo, nurse wenno teacher? kinunam pay iti naminsan, ngem naglibbi laeng sa nagrupanget a kasla dina nagustuan ti nangngegna. Nalimed a palpaliiwem no ania ti arapaapna ngem napaayka. Awan ti ibagbagana nga ambisionna. Sa ita, ibagana a padi?

Tinaliawmo ti kaabaymo. Agrungrungiit ta agkulkulipagpag manen iti murdong ti banniitna ti bumerde nga ikan nga agnay uppat a ramayan ti kabanalna.

“Papang, nalalaingak ngem sika, kunakto met! No dika nakapagpadi, makapagpadiak!” Ket imparintumengna ti kupas a maongna iti panangipisokna ti ikan iti nganga ti alat-agsagap.

Urayka la nagtulakak iti tinilmonmo nga angin. Kunam la no natappalan iti packaging tape ‘ta ngiwngiwmo. Inyalismo ketdi ti banniitmo. Umanay kadin dagiti nangngegmo a mangrukod iti kinasinseridadna?

“Huu! Gala kayo dia, ta manmerienda kayo ni!” nagsaggaysaan dagiti ima ni baketmo ti baso ken cake nga ipaypayapay. Nakitam nga dagiti dua nga adien ti inunaam  ken dagiti dua a babbalasang a kaanakam a naggiinnuna a tumakdang sada kimmamang iti sirok ti nalayog a logo a yan ti sementado a tugaw ken lamisaan a nakaiparabawan dagiti balonyo.

Nariknam ti umuna nga aplaw ti angin. Nalang-abmo ti lang-es. Nakariknaka iti sidduker ta immapay iti panunotmo a mauborka la ketdi iti di agpulsot a kantiaw ta malakisid a daddadakkel, ad-adu pay ti nabanniitan ‘toy anakmo ngem sika. Ania, nakapkapuy ti ama ngem ti anak?

“Padasek man ‘ta banniitmo, papang!”

Dika nakapagkedked idi iniggamanna ti banniitmo. Intulokmo a kasla mangiyawat iti symbolic key ti naupay nga arapaapmo idi nga agpadi, nga isu itan ti mangituloy. Ket kunam iti mugingmo: adtoy ti banniit ti arapaapko idi nga agpadi ngem di natuloy ket sikan a, ti mangituloy. Ala ngarud, anak, bendisionannaka koma ti Namarsua.

Inkabilna ti banniit iti nagbaetan ti dua a tangrib.

Nagprotestaka a dagus. Kurangna laengen ti placard ken megaphone iti inka panagyagyag. “Apay a dita met? Saan a dita, a! Adda kadi met ikan dita?”

“There’s no room for violent reaction, please. Kasla adda kuebana dita nga apon dagiti ikan. Dakkel la ketdi daydiay napadawik itay ta nagutad ti sikbabna.”

Awan pay ngata ti dua a minutos, napartak ti panangpusiposna iti kararet ket inkumpakumpasna ti banniit nga itag-aytag-ay-paluklukan-itag-ay ket agkulkulipagpag ti kasla takiag ti kalukmegna ken nasurok a sangadangan ti kaatiddogna nga ikan a nalabaga ken turikan iti puraw. Nabileg a nakigubal dagiti nasiken a ramramayna a guantisado iti nalamuyot a nangisit a lalat a nangkammet iti asang ti agkulkulipagpag nga ikan kabayatan ti panangikkatna iti sima.

Baliktad sa ketdin ti lubong? Nalalaing nga agpayson toy anakmo ngem sika!

(Adda tuloyna)