SARITA: KAS KAGITA TI KOBRA (Maudi a paset)

Nalipatam kadin a nurse ti dati a kaayan-ayatmo? Isu ti nangagas iti sugatmo,” kinuna ni Father Eugene.

Liniputannak, Eugene!” inridis ni Kobra.

Saanmo a maawat a saan a dakayo ti agkagasat?”

Isu ti makaigapu no apay a kastoyak ita.”

Ta bagim ti pabasolem iti kasta a nagbanagam, Emmanuel. Ngem saanen a dayta ti nasken ita. Ti napateg napakawannakan ti ina ti putotmo”.

Ania ti kayatmo a sawen?”

Putotmo daydi sikog ni Arianna nga inlunodmo nga agbalin a retarded. Imet idin ni Arianna ti bunga ti pannakalipatyo sakbay a nakitipon iti daydi Jake.”

Timmakder ti padi ket nabati a nakaul-ulimek ni Kobra.

Kalpasan ti tallo nga aldaw, makapagnan ni Kobra. Nagpakada iti gayyemna a padi.

Agyamanak iti tulongmo, Eugene. Ngem sakbay a pumanawak, adda koma dawatek a pabor kenka.”

Iti aniaman nga oras gayyem,” siaalumamay a sungbat ti padi.

Kayatko nga itedmo ken ni Arianna ti amin a linaon ti bag nga adda kenka. Uray iti kasta laeng a wagas a matulongak iti panangpadakkelna iti ubing,” kinuna ni Kobra.

Saanmo kadi a kayat a makita ti anakyo?”

Saanen. Diak kayat a makitana ni Boy Kobra.”

Emmanuel?”

Boy Kobra, Eugene. Nabayagen a natay ni Emmanuel Sto. Domingo.”

Timmallikud ni Boy Kobra sana inunor ti dalan nga umadayo iti simbaan. Ngem di pay nakaadayo, rimmuaren dagiti polis iti kimlebanda. Nakapaturong kenkuana dagiti igamda. Kapilitan nga ingngato ni Boy Kobre dagiti imana.

Mabalin nga ilunodnak ngem itoy laeng a wagas a matulonganka nga agbalbaliw, gayyem. Saannaka a baybay-an ti Dios,” nakuna ni Fr. Eugene idi iluganen dagiti pannakabagi ti linteg ni Boy Kobra iti police car.

Diosmo laeng, Eugene! Sipud pay napukawko ni Arianna, linipatko metten nga adda Dios. Kunak no mapagtalkanka ngem sika gayam ti mangirubo kaniak. Manipud ita, lipatemon ti panagpagayamta, Eugene!” iimper-ak ni Kobra.

IMMANGES iti nauneg ni Boy Kobra. Kasla baklayna ti nabantot a lubong iti panagriknana.

Sangapulon a tawen a naitangkal iti pagbaludan. Nagbalin a maysa laengen a dakes a ladawan iti napalabas ti San Luis.

Ni laeng Fr. Eugene Garcia III ti saan a nanglipat. Kada lawas a mangmisa iti “uneg” ngem pulos a saan a simmango ni Boy Kobra. Adda pay daydi panangiyawat ti gayyemna iti santo rosario. Ngem impisokna iti napudot a digo.

Ngem itay laeng napan a lawas a rugin ti kuaresma, napuotan ni Boy Kobra ti bagina nga immasideg iti padi.

Nabannogakon, Father,” kinunana.

Inarakup ti padi sana kinuna: “Saan pay a naladaw ti amin, Emmanuel.”

Maawatnak pay ngata ni Arianna?”

Mamakawan pay ti Dios, anianto la ketdin iti anakna? Nabayagen nga ur-urayen ni Arianne ken ti anakmo… ni Emmanuel II… ti panagsublim…”

Naammuanna nga agraduar ni Emmanuel II ita a kalgaw iti Akademia. Kayat kan ti ubing a suroten ti tugot ti amana a maingel a soldado.

Ammon ni Emmanuel II a sika ti amana. Impudno amin ni Arianna…” kinuna pay ti padi sakbay a nagturong iti kapilia ti pagbaludan.

Nabayagen a nakapanaw ti padi ngem nakamulengleng pay laeng ni Boy Kobra.

Plang! Plang!”

Mangrugin ti misa,” nakuna ni Kobra iti bagina.

Nagtalinaed a nakamattider iti abay ti ridaw ti seldana. Manipud iti yanna, makitana dagiti padana a balud nga agturong iti kapilia tapno makimisa.

Namingminganna ti ladawan iti paid. Kasla sumarut ti mata ti Nadungngo a Rupa a kumitkita kenkuana.

Inyusongna ti kamisetana a nagmarka iti sango iti “Bagong Buhay”. Binirok dagiti dapanna ti sandalia iti sirok ti katrena ket nakalaglag-anen ti riknana nga agturong iti kapilia ti pagbaludan.#